Dili, 1 Augostu 2024 (RCC)- Nesesidade familia obriga Mario ho Julio tenki buka osan liu husi fa’an sasan lao tuir dalan ninin hodi responde ba nesesidade lor-loron nian no selu ba oan sira nia eskola.
Iha entrevista ho Mario da Silva Bello ho idade 41, husi munisipiu Baucau hela iha kampung baru informa ba jornalista Rcc katak nia tenki buka osan liu husi fa’an livru lao tuir dalan ninin kapital Dili nian nune’e bele responde ba nesesidade lor-loron nian no ajuda fali familia iha foho.
“Tanba moris nesesidade obriga ha’u tenki buka osan liu husi fa’an livru Lao tuir dalan ninin, livru sira ne’ebe ha’u fa’an ne’e ba sosa tutan fali lori mai fa’an fali ho folin ne’ebe mak la hanesan, livru sira ne’e folin hahu husi 1 dolares to’o 5 dolares, hanesan ami sosa 5 sentavus entaun fa’an fali ba 1 dolar 3 dolares fa’an fali ba 5 dolares ami menan uitoan deit, osan ne’ebe hetan husi faan livru uza fali nesesidade lor-loron nian no balun ajuda ba familia sira iha foho,” informa Mario
Nia hatutan tan katak kada loron ida ema sosa livru depende ba sira nia sorti deit dalaruma ema sosa no dalaruma mós ema la sosa ida maibé, nia nafatin pasensia hodi kontinua fa’an livru iha dili laran.
“Loron ida depende deit ba ami lao ema sosa entaun ami bele uza maibe ema la sosa ami pasensia lao nafatin hodi fa’an ami lao iha dili laran ami lao no domina hotu tanba ami fa’an kleur tiha ona.ami lao ba fa’an livru problema laiha tanba ami lao hodi buka moris deit,dader hahu husi tuku 9 ne’e ha’u fa’an ona livru to’o fali lokraik tuku ne’en mak foin fila ba uma.mensajen husu ba maluk sira ne’ebe mak hakarak buka osan labele hein deit servisu diak maibe bele buka osan liu husi fa’an livru lao ne’e diak liu tan,”Dehan nia
Iha sorin seluk Julio Pereira Dos Santos ho Idade 58 hela iha Bairo Pite Aldeia Sama Tani hateten nia hakarak fa’an mainan labarik nian tanba ne’e uluk kedas tempu okupasaun Indonesia nian nia fa’an tiha ona, no nia moris depende deit ba sasan hirak ne’e.
“Ha’u fa’an sasan hirak ne’e uluk kedas tempu okupasaun Indonesia nian ne’e,ha’u fa’an tiha ona, iha tinan 1987 ne’e ha’u komesa fa’an mainan ha’u nia moris ne’e uluk kedas ho ida ne’e,ha’u hahu fa’an sasan ne’e uluk kompletu kedas husi labarik tinan ne’en ba to’o tinan sanulu,maibé agora ha’u idade ona, no ha’u nia oan mós barak entaun ha’u diside fa’an de’it buat ne’ebé mak kama’an de’it hanesan sasan sira labarik ni’an ne’e,” Julio informa.
Nia salienta tan katak sasan sira nia fa’an ne’e depende ba ema barak de’it,tanba fa’an mainan sira ne’e haree ba labarik de’it se labarik barak entaun nia mos hetan osan barak no osan sira nia hetan sustenta ba nesesidade lor-loron nian no selu oan sira nia eskola.
“Loron ha’u fa’an iha dader dalaruma ha’u hetan osan 10 to’o 15 dolares, depende ba ema barak de’it,tanba ha’u fa’an sasan sira ne’e haree ba labarik de’it se labarik barak entaun ha’u nia sasan sira ne’e folin dader ha’u sai husi uma to’o mai iha fatin ne’e mak labarik barak, entaun ha’u mós hetan osan, no osan sira ne’ebé ha’u hetan uza ba nesesidade lor-loron nian ,sustenta ba ha’u nia oan sira nia eskola ,tanba agora ha’u nia oan sira komesa eskola hotu ona iha ensino primaria no sekundaria ,sasan sira ha’u fa’an ne’e uluk ha’u sosa iha indonesia,maibé agora xina iha ona entaun ha’u sosa iha loja sira besik ne’e de’it,ha’u sosa plastik ida 1 dolar balun 1 dolares 50 centavus,”dehan Julio.
Negosiante ne’e mós hato’o hela mensajen ba joven sira ne’ebé mak hakarak buka moris hanesan nia bele lao tuir nia dalan.
“Mensagen ba alin joven sira ne’ebé mak hakarak lao tuir ha’u bele halo tuir maske balun halo hanesan ha’u halo ne’e la hatene maibé tenki esforsu ba tanba liu husi buat sira ne’e mak ita hodi hetan osan,”nia hakotu.
Jornalista :Romana Salsinha
Editor : Luhamutu.
