Dili 24 Jullu 2024 (Rcc) – Joventude husi Munisipiu Manufahi Postu-Administrativu Alas Lamenta Tebes ho Grupu Balun Uza Naran Veteranus Hodi Kansela Konstrusaun Estrada Wedau-berek iha Loron 14 Fulan Juñu 2024, Ne’ebé mak Lansa Direta Husi Ministeriu Obras Publiku.
Tuir konferensia imprensa, porta voz Nelson de Araújo Fernandes haktuir ba jornalista sira iha fatin Jardin 5 de Maio katak, komunidade alas sente triste tanba hare’e liu husi média sosiál iha Pagina Xanana ba Ema hotu no média HATUTAN katak, projetu kontrusaun Estrada ne’ebé iha fulan kotuk lansa direita husi Ministeriu Obras Públika, agora kansela fila fali Estrada refere, kuarta (25/07/2024).
“Atu responde ba hadia ekonomia familia mak governu sentral nia responsabilidade tenki hadia infraestrtutura sira iha area rural no remotas sira hodi bele fasilita movimentasaun komunidade/povu nian ba iha merkadu no bu’at seluk tan ne’ebé ligadu ba sira nia vida Ekonomia. Maibé hahu husi ita ukun an ne’ebé kompleta ona tinan rua nuluresin rua 22, ho governasaun ba dala hitu ona, maibé iha governasaun sira liu ba Povu Alas sei halerik nafatin ba Dezemvolvimentu ba Infraestrutra hanesan estrada ne’ebe prinsipal tebes hodi fasilita sira ba movimentasaun transporte ne’ebé defisil tebes. Iha Loron 14 fulan Junho 2024, Governo, Liu Husi Ministro Obras Publiku hamutuk ho Autoridade Munisipiu Manufahi, Autoridade Postu-Administrativo Alas, Veteranos, Igreja, Lia Na’in kultura no komunidade husi Posto Administrativo Alas halo ona serimonia lansamentu Primeira Pedra ba Projeto Estrada We Dauberek-Alas. Haksolok ne’ebé rai Alas hein to’o mai ona, moris kmanek ne’ebé povo alas hakarak mosu mai ona, Matawen, halerik no harohan tinan naruk nian iha ona resposta. Maibé infelizmente iha semana ida ne’e nia laran povu alas sente fuan laran dodok tebes ho informasaun ne’ebé fó sai liuhosi Média Sosiál Pagina Xanana ba Ema hotu no média HATUTAN katak, projetu kontrusaun estrada Alas kansela, iha ne’ebé informasaun ne’e rasik fó sai husi Ministru Obas Publiku katak, iha grupu Alas oan balun ne’ebé uza naran Veteranu hodi ba hasoru Exelencia Primeiru Ministru atu bele kansela estrada refere”. Dehan Porta Voz Nelson de Araújo.
Porta voz ne’e salienta tan katak husu ba IX Governu atu dada fila fali orietasaun ne’ebé mak fó ba ministru obras publiku hodi hapara projetu Estrada, tanba ne’e joventude alas husu presidente autoriedade munisipiu ho administrador sira atu halo karta urjente ba primeiru ministru.
“Tanba ne’e ami husi Juventude no Estudante Postu Administartivu Alas hakarak hato’o ami nia pontu ejizensia sira hanesan tuir mai ne’e, ami Juventude no Estudante sira husi Postu Alas husu ba 9° governo konstitusional Ne’ebé lideradu husi maun boot Kayrala Xanana Gusmão, atu dada fila orientasaun Ne’ebé fó ona ba Ministru Obras Publiko hodi hapara projetu estrada Wedauberek Alas. Ami Husu ba Ministerio Obras Publiko, atu buka solusaun urjentemente hodi resolve problema refere, tanba kansela Projeto Estrada WeDauberek- Alas la’os Solusaun ne’ebé Povu Alas hein no hakarak. Ami Husu ba presidente autoridade Munisipiu no Administrador postu Alas atu halao urzentimente ho Sua Exelínsia PM no MOP hodi labele hapara projetu Estrada wedauberek Alas. Ami Estudante no Juventude Alas Tomak La Satisfeitu ho Intervensaun husi Ministro Obras Publico, Samue Marҫal ne’ebe hateten katak Governu Laiha Tempo Atu Resolve Problema” Tenik Nelson.
Nia afirma tan katak grupu ne’ebé halo impedimentu ba projetu refere la representa populasaun Alas tomak ho nune’e husu ba konsellu veteranu munisipiu Manufahi atu toma medida ba grupu individu ne’ebé mak uza naran veteranu hodi halo impedimentu ba projetu Estrada Wedau-berek ne’e.
“Tanba povu deposita konfiansa ba ukun na’in sira hodi Resolve problema Povu nian. Ami ezizi ba Conselho Veteranos Munisipiu Manufahi no Posto Administrativo Alas atu toma medida ba grupo ou individo sira ne’ebe uza veterano nia naran hodi impede projeto Estrada wedauberek Alas. Ami Estudante no Juventude postu-adminitarativu Alas hakarak afirma katak grupu ou individu ne’ebe mak halo inpedimentu ba estrada Wedauberek Alas la reprezenta 11,484 populasaun Alas, ho nune’e ami husu ba Ministru Obras Publiko, atu labele hola desizaun hodi retira kompanhia husi obra kontrusaun Estrada diresaun Wedauberek Alas. Ami estudante no juventude Postu-Administrativu Alas Kondena aktus ne’ebé mak grupu balun halo hodi fó terus nafatin Povu Alas atu labele asessu ba estrada. Husu Ba Ministro Obras publico atu konsidera ba seremonia cultural ne’ebe katuas lia nain postu-Administrativo Alas halao ona liu husi halo ritos kulturais iha loron lansamento primeira pedra. Tanba ritos culturais ne’e sai hanesan konkordansia entre Ita Ema ho Natureza,” Hakotu Nelson.
Jornalista : Leo Alves
Editor : Luhamutu
