Dili, 24 Jullu 2024 (RCC)- Eis Primeiru Ministru Taur Matan Ruak Informa ba Prezidente Repúblika relasiona ho asidente ne’ebé eis primeiru rasik hetan iha Atanbua.
Iha entrvista ho eis Primeiru Ministru Taur Matan Ruak hafoin remata enktru ho Prezidente Repúblika José Ramos Horta iha Kantiña Matak, resintu Palásiu Prezidensiál Bairo Pite Dili, haktuir ba jornalista sira katak, agradese tebes ba prezidente Repúblika tanba konvida ona eis-jeneral ne’e ho nune’e aproveita oportunidade ida ne’e hodi informa kona-ba asidente ne’ebé eis jeneral Taur Matan Ruak rasik hetan iha Atanbua, Kuarta (24/07/2024).
“Primeiru lugar agradese ba exelensia Prezidente Repúblika tanba bele konvida ha’u, hanesan exelensia Prezidente dehan ko’alia kona ba asuntu barak maibé ha’u aproveita informa asidente ne’ebé ha’u hetan iha Atanbua, ho nune’e ha’u hato’o ba prezidente atu nune’e bele hatene, tanba ne’e asidente ida ne’ebé akontese iha ita nia vizinu,” dehan eis-Taur Matan Ruak.
Nune’e mós eis-jeneral ne’e esplika liu tan katak, akontese asidente ne’e la iha planu entre TNI ho eis -jeneral Taur rasik, maibé derepente soke malu, bainhira fila husi Munisípiu Oecusse ho atividade partidu nian, tanba ne’e kazu refere rezolve ona hamutuk ho komandante batallaun tuir prosesu internu.
“Akontese asidente ne’e ami la planu, TNI mós la planu entaun ami soke malu iha ne’e ho nune’e ha’u husu atu taka kazu no mós husu atu la bele kastigu soldadu kondutor ne’ebé xoke ha’u nia kareta no husu mós atu sira respeita regras tranjitu nian, tanba iha kareta tolu mak iha ha’u nia oin polri nia kareta, konduladu nia kareta no mós ha’u nia siguransa nian kareta no sira mai fai los ha’u nia kareta, maibé, ha’u rezolve ona no ha’u hasoru komandante batallaun 744 konduladu tiha nia polri prosesu sira ne’e internu ha’u la hatene maibé ho ha’u ne’e ha’u husu atu taka, tanba hetan asidente ne’e ho atividade partidu nian,” Taur Matan Ruak informa.
Iha fatin hanesan Prezidente Repúblika José Ramos Horta mós afirma, hasoru malu ho eis- jeneral Taur matan Ruak, ko’alia kona ba viajen iha Oecuse no fila mai hetan asidente, tanba ne’e Xefe Estadu Jose Ramos-Horta hatete, asidente iha Dili ne’e lorloron akontese ho F-FDTL, PNTL, kareta baku fila, maibé, iha TNI rigurozu teb-tebes, tanba ne’e eis-jeneral Taur hatete la bele kastigu no hatudu fuan sentidu hodi rezolve de’it.
“Ami ko’alia hanesan foin dadaun Eis-Jeneral Taur hateteN kona ba nia viajen ba OecusE fila mai hetan asidente ne’e maka ha’u hatete iha Dili ne’e lorloron akontese ho F-FDL ho PNTL kareta baku fila ne’e akontese maibé TNI rigurozu tebes -tebes kuitadu, kondoutor ne’e, tanba ne’e mak maun bo’ot Taur hatete ba sira favor lalika kastigu nia, nia hatudu nia fuan hatudu nia sentidu estadu hodi rezolve de’it,” hateten Prezidente Horta.
Prezidente Repúblika mós salienta tan katak, konkorda ho eis-Taur matan Ruak ,katak taka kazu refere tanba rezolve ona tuir sentidu estadu.
“Ha’u konkorda ho eis primeiru Ministru ha’u hatete kedas hatudu ita nia sentidu estadu agora sira taka duni la ka la taka ne’e ita la hatene tanba ida ne’e sira nia disiplina militar ne’e la halimar, tanba ne’e maun bo’ot Taur informa kedas ba ha’u dehan katak la bele fo sai ho nune’e ha’u nonok kedas no ha’u la iha komentariu ba iha media sira,” hakotu Prezidente Repúblika José Ramos Horta.
Jornalista : Tonia Neto
Editor : Luhamutu
