Dili, 05 Agustus 2024 (RCC)- Roberto Sarmento de Oliveira nudar embaixador foun Timor Leste (TL) promete sei kontinua haklean relasaun bilateral entre TL ho Repúblika Indonezia.
Iha entrevista ho Roberto Sarmento de Oliveira hafoin simu toma da posse husi Prezidente Republika Jose Ramos Horta iha Palacio Prezidensial Bairo Pite Dili, iha semana rua liu ne’ebe simu kargu hanesan embaixador foun reprezentante Timor Leste ba Repúblika Indonezia, haktuir ba jornalista sira katak, halo audensia formal ho Prezidente Republika ne’e hanesan simu orientasaun diretivas husi xefe estadu hodi nune’e bele kontinua haklean nafatin relasaun bilateral entre TL ho Indonezia, Segunda (05/08/2024).
“Ohin dader hetan oportunidade mai halo audensia formal de pois de simu tomada de pose iha semana rua liu ba no ohin mai hasoru Xefe Estadu hanesan simu orientasaun no instrusaun ka diretivas oinsa bele halao hau nia kna’ar ho didiak nudar hanesan embaixador, reprezenta Timor Leste iha Indonesia hodi buka moris hotu -hotu para haklean nafatin relasaun bilateral entre TL ho indonezia”, dehan Roberto Sarmanto.
Ho nune’e nia afirma, mensajem ne’ebe simu husi Prezidente Republika maka hanesan halao servisu ho kapasidade ne’ebe iha atu bele kria kooperasaun ho mekanizmu foun hanesan iha defeza, seguransa, edukasaun, ekonomia no mos ekososial kultural ninian hodi nune’e bele reforsa liu tan TL nian adezaun ba Asean.
“Prezidente nia mensajem maka hala’o servisu ho kapasidade ne’ebe maka iha atu bele dezenvolve no bele kria liu tan mekanizmu ka koperasaun foun hodi bele haklean kooperasaun iha area sira seluk ne’ebe maka ita iha ona hanesan iha defeza, iha seguransa, iha adukasaun, iha ekonomia, iha ekososial kultural ninian, maibé, iha momentu ida ne’e Timor mos iha hela ambitu atu sai membru ba Asean tau lezita ho nasaun ne’ebe maka besik teb-tebes ho Indonezia tanba ne’e bele buka oinsa atu explora kooperasaun diak liu hodi nune’e reforsa Timor Leste niaadezaun ba Asean atu nune’e ita nia mehi atu bele kuntribui ba organizasaun rezional hanesam ba asean bele mos hanesan ho membro asean sira seluk,” katak Roberto Sarmento.
Nia mos esplika liu tan katak, durante iha ninia mandatu, nia sei buka, oinsa atu bele hetan solusaun ne’ebe diak, liu-liu ba iha area fronteira nian atu nune’e bele haklean liu tan paz no estabilidade iha fronteira.
“Hanesan ita hotu hatene katak ita nia fronteira ne’ebe maka liga diretamente ho Indonezia ne’ebe maka liga diretamente ho Indonezia hanesan fronteras rai no fronteras tasi, tanba ne’e iha mandatu hau nian hau sei buka oinsa atu bele hetan solusaun ne’ebe mak bele fo benefisiu ba ita nia nasaun hanesan nasaun vizinho liu-liu kria ambiente ne’ebe maka nakonu liu tan ho espiritu de solidaridade ho amizade ne’ebe diak atu nune’e bele haklean liu tan paz no estabilidade iha fronteira,” esplika Roberto Sarmento.
Aliende ne’e mos nia akresenta tan katak, iha orientasaun seluk ne’ebe simu husi Prezidente Republika maka hanesan liga ba vizita Prezidente Jokowi nune’e mos Prezidente eleitu foun Prabowo Subianto ne’ebe sei mai vizita Timor Leste, tanba ne’e sei organiza diak ho instituisaun relevante hodi nune’e bele kontribui liu tan ba pasu foun entre Timor Leste ho Indonezia.
“Orientasaun sira seluk hanesan ita hotu hatene katak sei iha posibiladade ida vizita Prezidente Jokowi nian ka Prezidente foun atu mai ita nia rai karik ami sei halo koordenasaun no komunikasaun diak liu ho instituisaun relevante konserteza liu husi ita nian ministeriu Negosius Estranjeirus ho Prezidente Republika ho gabinete Primeiru Ministru nian katik vizita nee realiza ita organiza ho didiak atu nune’e bele kuntribui liu tan ba passu foun iha relasaun bilateral entre Timor Leste ho Indonezia,” hakotu Roberto Sarmento.
Jornalista : Tonia Neto
Editor : Luhamutu
