Díli, 22 Novembru 2024 (RCC) – Kada tinan Centru Nasional Chega (CNC) apoiu orsamentu 25-30 mil hodi servisu hamutuk ho grupu traballu labarik lakon no mós instituisaun balun hodi lori fila fali labarik ne’ebé lakon iha funu laran mai hasoru Família iha Timor.
“Direitor ezekutivu Centru Nasional Chega (CNC), Hugo Maria Fernandes hateten, CNC servisu hamutuk ho grupu traballu labarik lakon iha sosiedade Sivil barak no Ministériu Negósiu estranjeiru, Ministériu Justiça, Ministériu Solidariedade Sosial, Prezidénsia Repúblika, PDHJno mós sosiedade Sivil sira husi parte Indonézia no iha instituisaun públiku sira, hodi atividade ne’ebe ita bolu Reunifikasaun, tanba ne’e kada tinan CNC fó apoiu orsamentu to’o 25 mil ka 30 mil hodi reunifikasaun ba labarik lakon,” Dehan Hugo Fernandes.
Hugo Fernandes informa, Centru Nasional Chega iha inisiativa hodi fó apoiu desde 2017 to’o tinan ida ne’e, tanba ne’e tinan-tinan lori Maun sanulu ba leten, maibe tinan ida ne’e lori nain 5 de’it.
“Tinan-tinan ita lori nain sanulu ba leten, maibe tinan ida ne’e lori nain lima de’it, maioria mai husi fora de Jaban, hanesan lauesi, Jawa barat no Makasar, tanba ne’e hanesan inisiativa ida ne’ebé Centru Nasional Chega halo hodi apoia desde 2017 to’o tinan ida ne’e, ita lori tan nain lima ne’e mai hasoru sira nia familia, Ho nune’e total hamutuk 106 mak ita lori fila ona mai Timor, tanba uluk militar Indonézia lori sira ba sei ki’ik, balun tina 5 no balun tinan 10,” Nia informa.
Aleinde, Diretór ezekutivu Asia Justice and Rights (AJAR), José Luís Oliveira akresenta, durante tinan 11 sira hala’o servisu ne’e hodi buka tuir labarik sira ne’ebé lakon iha tempu funu laran, militar sira uza sai Taibeo hodi lori ba Indonézia.
“Servisu ida ne’ebé ami halo durante tinan 11 ida ona, ami hahú ba servisu ne’e desde 2013, tanba ne’e iha tinan ne’e ami lori tan ita nia maun alin nain 5 ne’ebé lakon durante funu, no sira barak maka uluk militar Indonézia maka uza sai Taibeo hodi lori sira ba Indonesia, tanba ne’e sira la’os kestaun referéndun ka otonomia mak hodi ba Indonésia, maibe sira uluk sei ki’ik oan, militar Indonésia mak lori sira sai Taibeo hodi lakon, balu kuaze tinan 49 ona separadu husi sira nia familia, no agora foin hetan oportunidade hodi fila mai,” Nia akresenta.
Nia salienta Tan katak, husi parte governu rua mak servisu hamutuk hodi hari’i komisaun ba buka ema lakon hodi entrega ba família tuir lei internasional.
“Servisu ida ne’e liu husi parte governu rua hodi implementa rekomendasaun Seaber nune’e mós rekomendasaun husi komisaun Verdade no amizade, komisaun bilateral entre Timor-Leste ho Indonésia ne’ebá hodi koalia kona-ba governu rua ne’ebe servisu hamutuk hodi hari’i komisaun ba buka ema lakon atu entrega fali família. Tuir lei internasional ema ne’ebè lakon forsadu, wainhira seidauk hetan komunikasaun ofisial ruma husi estadu, ne’e violasaun direitu umanu kontinua nafatin lakon, tanba ne’e estadu tenke esklaresimentu ofisial ba sira,” hakotu Nia.
Jornalista : Adelina Fátima
Editor : Luhamutu
