Dili, 17 de Janeiro de 2024 (RCC)- Iha reuniao Konsellu Ministrus ne’ebé hala’o iha Palásiu Governu quarta-feira aprova ona projetu Rezolusaun Governu ne’ebé aprezenta husi Vise-Ministra Solidariedade Sosiál no Inkluzaun, Céu Brites, hodi nomeia Arlindo Pinto ba mandatu tinan tolu hanesan Prezidente Konsellu Administrasaun Institutu Nasionál Seguransa Sosiál, nune’e, mós hanesan Prezidente Konsellu Fundu Rezerva Seguransa Sosiál.
Diploma ne’e hateten katak Arlindo Pinto iha reputasaun ne’ebé di’ak no durante ninia karreira profisionál, hala’o ona kna’ar ne’ebé halo nia iha koñesimentu, formasaun téknika no esperiénsia kualifikada ne’ebé hatudu kapasidade diresaun no hatudu ninia adekuasaun perfil hodi dezempeña kargu ida-ne’e”.
Konsellu Ministrus mos aprova ona projetu Dekretu-Lei ne’ebé aprezenta husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, kona-ba regulamentu Konsellu Nasionál ba Soberania, Seguransa Alimentár no Nutrisaun iha Timor-Leste (KONSSAN-TL).
“Projetu Dekretu-Lei ida-ne’e ninia objetivu mak atu estabelese kuadru normativa ida ba implementasaun polítika seguransa alimentár no nutrisionál ne’ebé efetiva iha nasaun ne’e.
Diploma refere define kompozisaun no responsabilidade KONSSAN-TL nian, estabelese Grupu Traballu Interministeriál no Sekretariadu Tékniku Permanente ida atu apoia koordenasaun no ezekusaun ba polítika sira-ne’e’’.
alem de ne’e propoin mós hodi kria reprezentasaun munisípiu sira atu asegura implementasaun ne’ebé desentralizada no efikás husi diretrís sira ne’ebé estabelese ona ho nia objetivu finál mak atu garante abordajen ida ne’ebé koordenada no efisiente iha promosaun seguransa alimentár no nutrisionál iha Timor-Leste.
Rekorde katak Presidente cesante Longuinhos Armando ninia mandatu lolos termina iha tinan 2025, maibé Governu liiu husi reuniaun konsellu ministru extraordinariu ezonera Longuinhos iha segunda feira (15/01).
Jornalista: mika silva Editor ; Luhamutu
