DILI 02 DE FEVREIRO 2024 (RCC) SEKRETARIADU ESTADO FORMASAUN PROFISIONAL EMPREGO LIUHUSI DIRESAUN NASIONAL EMPREGO EXTERIOR HALA’O KOMUNIKADU IMPRENSA ABERTURA PROGRAMA AKOMPAÑAMENTU FAMÍLIA BA IHA AUSTRALIA. IHA KAIKOLI
Iha komunikadu Diretór Jeral Sefope Carlito Rosario Cabral hatete Programa akompañamentu família nudár programa pilotu ida husi eskema PALM liu-husi akordu entre governu Timor-Leste no Australia. Programa ne’e sei oferese oportunidade ba traballadór sira eskema PALM hó kontratu tempu naruk ni’an, hamutuk ema na’in atus-rua (200), atu lori sira-nia família sira bá Austrália. Programa pilotu akompañamentu família nia objetivu maka atu hamenus impaktu sosiál negativu sira kona-ba separasaun família.
“Governu Austrália iha kompromísiu atu suporta traballadór Timor-oan sira husi eskema PALM hó kontratu tempu naruk atu lori sira-nia família, maibé tenke hó empregadór kompaña sira-nia konkordansia, tanbá ida ne’e empregadór kompaña sira maka sei iha papél importante atu suporta traballadór no família sira-nia aplikasaun hahú husi inísiu prosesu aplikasaun to’o remata.”Sesaun informasaun kona-ba pilotu akompañamentu família disemina ona ba família sira ne’ebé eligivél iha fulan Dezembru tinan 2023. Iha sesaun informasaun ne’e, DNEE fornese ona informasaun klaru kona-ba prosesu oinsá atu partisipa iha programa refere. Traballadór hó sira-nia família imediatu sei halo desizaun hamutuk no ko’alia hó empregadór kompaña sé karik sira interese.
Diretor Jeral hatutan ba traballador sira ne’e hakarak familia atu tuir tenke tuir kriteria iha programa pilotu ne’e: 1. Hare fila-fali kriteria husi programa akompañamentu família iha PALM nia website.2. Traballadór tenke ko’alia hó ninia empregadór/kompaña. Traballadór presiza empregadór kompaña nia suporta atu aplika, nomós iha kritéria ne’ebé empregadór/kompaña maka tenke prienxe. Ezemplu; labour hire companiesAjensia sira la eligível. Sé traballadór serbisu ba labour hire companyAjensia, então nia labele la eligível atu aplika. 3 Sé empregadór/kompaña eligível, no konkorda atu suporta traballadór nia aplikasaun, traballadór tenke husu empregadór atu imprimi formuláriu aplikasaun liu-husi eskema PALM nia website hodi fó ba traballadór atu prienxe. 4. Traballadór tenke prienxe formuláriu refere hó kompletu, asegura katak perguntas iha formuláriu ne’e hatan hó kompletu. Traballadór sei entrega formuláriu ne’e ba empregadór/kompaña. 5. Empregadór sei reprezenta traballadór hodi aplika ba Programa Akompañamentu Família.
“Nia salienta tan Liña Tempu ba Aplikasaun: 1. Aplikasaun ba programa ne’e hahú loke ona iha dia 26 Janeiru to’o 23 Fevereiru 2024. 2. Selesaun ba aplikasaun sei halo iha fim do Fevereiru to’o Marsu klaran. 3. Notifikasaun kona-ba rezultadu selesaun aplikasaun sei halo kedas iha fulan Marsu klaran. 4. Empregadór/família hahú prosesa/aplika família sira-nia visa iha fim do Marsu. 5. Sé família sira hetan visa duni, sira tenke partisipa iha sesaun informasaun kona-ba preparasaun nomós lalaok moris iha Australia iha inísiu fulan Maiu. 6. Família sira ne’ebé selesionadu sei viagem ba Australia iha fulan Maiu klaran.”
Dala-ida-tán atu emfaze katak empregadór kompaña mak sei iha papel importante atu aplika em nome de traballadór no família ba Programa Akomapañamentu Familía. DNEE ninia papel maka atu fasilita informasaun sira kona-ba programa refere ba família sira iha Timor no kordena serbisu entre PALM, empregadór no família. Ami mós sei taka avizo iha pajina Facebook SEFOPE-DNEE nian, atu nune’e família sira bele iha informasaun klaru liu. Programa pilotu ida ne’e sei loke ba totál família atus-rua (200), ne’e signifika katak sei iha tán oportunidade tuir mai iha tinan ida ne’e nia laran ba traballadór sira seluk atu lori sira-nia família ba Australia.
JORNALISTA: MIKA SILVA
EDITOR: LUHAMUTU
