Dili 09 Fevereiru 2024 (RCC) – Ministériu Edukasaun sei tau dokumentus Fraternidade Humana iha kurikulu eskolar ne’ebé hetan ona rezolusaun husi Parlamentu.
“ Ohin dader ha’u iha enkontru ho Prezidente Repúblika ne’ebé mai atu simu orientasaun no husu Ministériu Edukasaun atu buka hahú prosesu desiminasaun ba dokumentu fraternidade umana ne’ebé hetan ona rezolusaun husi Parlamentu Nasionál maibé Dokumentus fraternidade ne’e la’ós hetan de’it rezolusaun husi Parlamentu Nasionál maibé hetan mós asina husi Grande Immam no Papa Francisco. Tanba ne’e ME simu no sei asume responsabilidade tomak atu garante katak dokumentu fraternidade umana ne’ebé asina ona husi Grand Immam no Papa Francisco kona ba dokumentu ne’e atu bele hatama iha kurikulum ME ne’ebé oras ne’e iha faze halo revizaun ba kurikulum terseiru siklu nune’e mós ME hatama mós matéria fraternidade umana iha formasaun ba professor sira”, haktuir Ministra Edukasaun, Dulce de Jesus Soares ba jornalista sira hafoin remata enkontru ho Prezidente Repúblika,José Ramos Horta, Sexta _feira ne’e iha Palacio Prezidensiál, Bairo Pite, Dili.
Dulce esplika, tuir loloos sei hatama iha tinan ida ne’e nia laran maibé tanba prosesu hela maka ME sei servisu ho Gabinete Prezidensia Repúblika atu nune’e bele garante katak iha dokumentu ne’e simples maibé professor no estudante sira bele uza.
“Tanba ne’e dokumentu fraternidade umana hanesan dokumentu ofisiál ida atu nune’e ME hamutuk ho Gabinete Prezidensia Repúblika sei halo esforsu hotu-hotu atu simplifika dokumentu ne’e ho imajen ruma tan hodi nune’e bele ajuda professor no estudante sira atu bele útiliza iha eskola sira, nia akresenta.
Entertantu husi dokumentu ne’e rasik iha vantajen ba Timor Leste tanba ne’e Parlamentu Nasionál halo rezolusaun ida no hotu-hotu konkorda adopta dokumentu ne’e iha Timor Leste.
Jornalista : Tonia Neto
Editor : luhamutu
