Dili 08 Fevereiru 2024 (RCC)_ Relasiona ho seguransa rai laran ne’ebé la’o ho hakmatek iha tinan kotuk liu ba iha Natál no Ano novo ne’ebé la’o ho hakmatek tebes maka Prezidente Repúblika fo apresiasaun boot ba joven sira.
“Liu husi reuniaun dahuluk ne’ebé xefe estadu hala’o hamutuk ho PR no mós konsellu Defeza Seguransa (KSDS) iha Palacio Prezidencial Bairo Pite Dili iha loron kinta feira ne’e katak xefe Estadu fó apresiasaun bo’ot tebes ba joven sira no mós responsavel grupu arte marsiais no arte rituál sira hotu ne’ebé hasai tiha desizaun suspende sira nia atividade komesa diminui tebes bainhira ita selebra iha tempu Natál nian to’o ano novu remata no ikus fali mai mós la akontese buat ida tanba nee xefe estadu fó apresiasaun bo’ot tebes ba ida ne’e”, lia hirak ne’e hato’o husi Primeiru Mininistru, Kay Rala Xanana Gusmao, ba Jornalista sira hafoin remata enkontru ho Prezidente Repúblika iha Palacio Prezidensiál Bairo Pite, Dili.
Tanba ne’e Prezidente Repúblika José Ramos Horta fiar katak ho joven sira nia partisipasaun ne’ebé ho konsiénsia tebes ita bele hanoin daudauk ona oinsa mak ita bele hadia rai ida ne’e.
Nune’e mós Nia esplika katak, apresiasaun ida ne’e husi ministériu no membru sira KSDS mós fó apresiasaun daudauk ona kona-ba seguransa nasionál nian liu-liu haree krime organizadu, money loudry, tráfiku umanu no kona-ba droga, ne’ebé Xefe Estadu iha husu atu ita hotu-hotu atensaun ba ida ne’e atu nune’e ita bele kolabora hamutuk wainhira ema ruma konsumu droga no faan droga iha ne’e ka iha ne’eba fó hatene ba polísia no ministériu sira kompetente atu nune’e sira bele ba kaer ema ne’e maibé la’ós ba kaer baku soe hela maibé tenki lori mai atu rezolve tiha kazu sira ne’e.
Aliende ne’e mós ko’alia kona-ba ita nia preparasaun atu simu Papa Francisco ne’ebé sei mai vizita Timor Leste iha fulan Agustus tinan ne’e maibé ita sei hatene klaru liu husi komisaun ida ne’ebé mai husi Vatikanu iha fulan Maiu no komisaun husi Vatikanu ne’e rasik maka sei mai tan atu haree ita halo ona saida relasiona ho Papa nia vizita mai Timor Leste, hafoin sei ba hato’o iha Vaticano pois maka Papa mai.
Tanba ne’e ita sei ko’alia ho komisaun ne’ebé governu forma iha Timor Leste atu nune’e komisaun rua ne’e hala’o daudauk servisu balun tanba Papa Francisco mai ne’e iha fatin haat kedas hanesan dala uluk iha Papua New-Guine depois maka mai Timor Leste, hafoin ba Singapura no Jakarta tan nune’e Xefe Estadu husu ba governu no husu ba membru KSDS atu buka koordena ba malu hodi prepara daudaun kondisaun sira liu-liu seguransa nian iha ita nia rain, hakotu Primeiru Ministru.
Jornalista : Tonia Neto
Editor Luhamutu
