27.3 C
Dili
Friday, 14 June 2024
spot_img

Inan Faluk Angelina Soares ho Aurora Alves  Nia Moris Depende Ba Nasi Bungkus no Fatuk Tasi

Dili, 12  Februari 2024 (RCC)- Inan Faluk Angelina Soares ho Aurora Alves  sira nia moris depende de’it ba faan iha dalan ninin hodi sustenta necesidade família nian.Faluk Angelina Soares faan  nasi bungkus  iha Ponte CPLP Comoro nian okos durante tinan 10 nia laran  no  Aurora Alves Oliveira ne’ebé nia moris depende mós ba fatuk tasi  ne’ebe  nia halibur iha tasi ibun pantai kelapa Dili durante tinan rua ona.

Inan faluk Angelina Soares ba jornalista Rádio Comunidade Comoro,iha  Segunda -feira nee konta katak tanba nesesidade uma laran mak obriga, inan faluk  ho idade 41, husi munisípiu Bobonaro, ne’ebé dadaun hela iha Beto Leste, suku Madohi, postu Administrativu Dom Aleixo, munisípiu Dili, hetan osan depende de’it ba fa’an  nasi bungkus tanba husi nasi bungkus ne’ebé nia faan bele sustenta ona nia nesesidade uma laran no bele selu mós oan sira nia eskola.

Inan faluk ne’e hateten mai faan nasi bungkus iha  Ponte CPLP nian okos  durante tinan sanulu nia laran ona tanba oan nain haat eskola ida feto primeiru agora dadaun hala’o hela nia estudu iha banku universitáriu iha semester VII tan nune’e mak deside tenke faan nasi bungkus tanba la iha servisu seluk atu halo maibé  moris mak depende duni ba faan nasi bungkus ne’e de’it.

No nasi bungkus ne’ebé nia faan kada loron nia halo falun sanulu de’it no falun ida ho folin $ 0.25 maibé di’ak ida ema hola hotu no di’ak ida lae, maibé inan faluk ne’e nafatin iha vontade hodi  faan nasi bungkus iha fatin refere tanba rendimentu ne’ebe hetan  maske iha oituan de’it maibé bele fo ba oan sira hodi lori ba eskola, katak Angelina Soares.

Maibé tuir inan faluk ne’e nia hanoin  karik servisu ruma mak iha inan faluk ne’e hakarak muda an sai husi fatin ne’e maibé servisu laiha tanba ne’e  tenke ser faan mak nasi bungkus ne’e ona tanba faan nasi bungkus  bele sustenta nesesidade uma laran no bele selu  oan sira  nia eskola, esplika  Inan faluk Angelina Soares.

Iha sorin seluk Inan feton Aurora Alves Oliveira mai husi munisípiu Liquica, hela iha Matruak, suku Fatuhada,  postu administrativu Dom Aleixo Munisípiu Dili, iha oan nain sia maibé nia moris depende de’it ba fatuk tasi ne’ebé nia halibur iha tasi ibun hodi selu oan sira nia eskola no mós sustenta nesesidade uma laran nian.

Inan feton Aurora haktuir fatuk ne’ebé nia halibur mai husi  tasi  ne’ebé baku sai no inan ne’e hili  hodi ense ba saku sira hodi fa’an atu bele sustenta moris, no mós  fatuk ne’ebe nia halibur iha tipu  oin_oin  ho  folin hanesan kada saku ida   $ 5.00 maibé ba fatuk boot sira  bou hamutuk ne’e mak fatin ida ho folin $ 50.00 nune’e mós  dala ruma ema mai hola hatun tan ba folin $ 40.00.

Maske nune’e inan feton Aurora nafatin iha vontade hodi  halibur fatuk sira ne’e no kada loron ida  nia halibur fatuk saku sanulu maibé depende ba fatuk ne’ebé tasi baku sai mak laiha inan feton ne’e tur hein de’it nia fatuk sira ne’ebé nia halibur ona hodi hein ema mai sosa maibé wainhira persija mak foin ema  ba hola  hanesan iha tempu ema halo haris fatin mak ema foin ba hola no  di’ak ida ema hola too saku rua ka tolu ou se lae hola saku oan ida de’it  no  la’ós  hola loron -loron  maibé fulan ida hanesan ne’e maka foin ema mai hola, esplika inan feton Aurora Alves.

Maibé inan feton ne’e  la halerik ba governu hanesan ema sira seluk tanba la toman desde uluk too agora, “la husu ba governu tenke tau matan ba ami hanesan nia maluk sira seluk halerik no tuir loloos la bele hanesan ne’e tanba ita nia moris ne’e ita mak depende rasik la’ós estadu mak obriga atu halo ida ne’e lae ne’e ita nia moris ita mak buka moris ne’e buka hanesan ne’e mak hodi han hemu labele halerik ba estuda tanba ita iha liman fuan sanulu iha ne’e ita buka rasik labele depende ba estadu maibé karik estadu iha hanoin lao ba mai hare ita fo ajuda ita tenki simu maibé atu halerik ba estadu ne’e lae” hakotu inan feton Aurora Alves Oliveira.

Jornalista : Tonia Neto

Editor : Luhamutu

Related Articles

- Advertisement -spot_img

Latest Articles

ARKIVU.
RCC.