Dili 16 Fevereiru 2024 (RCC)-Sekretariu Estadu Formasaun Profisional Empregu (SEFOPE) Lihosi Diresaun Nasional Eskterior Empregu (DNEE) Halo Seremonia Despedida No Assina Deklarasaun Ho Traballadór Timoroan Hamutuk 71 Hodi Ba Servisu Iha Korea Do Sul Iha Area Peska No Fabrika.
Sekretariu estadu sefope Rogério Aroujo Mendonça hateten objetivu husi seremonia ne’e hanesan atu fó hanoin ba traballadór sira atu servisu tuir regra no lei sira, traballadór ne’ebé mak halai sai husi sistema hetan problema família mak responsabiliza governu la responsabiliza.
“Traballadores ne’ebé mak atu destaka ba nasaun Korea, Australia no Japaun, Sefope sempre realiza seremonia despedida nia objetivu atu fó mensajem ka lia menon ba ita nia traballadores hodi ba servisu iha ema nia rain hanesan nasaun tolu ne’ebé mak ha’u temi ona atu nune’e sira servisu tuir duni regras ka lei nasaun ne’ebé mak simu ita nia traballadores. Mensajen husi governu, familia no entidade hot-hotu nia hakarak katak ita nia traballadores labele halai sai husi sistema, se ita nia traballadores halai husi sistema hetan problema, insedente ruma família mak responsabiliza ba ida ne’e agora se mak tuir prosedimentu regras ne’ebé estadu rua ne’e estabelese ona, se traballador ne’e hetan problema ruma iha servisu fatin família sei hetan benefísiu ka sei hetan netik bu’at ruma ne’ebé mak durante servisu husik hela ba sira nia família”. Dehan Sekretariu Estadu Iha Salaun Hotel Timor Lodge,Dili.
Nia akresenta durante ne’e traballadór timoroan ba servisu iha Korea iha area rua de’it, agora Governu Korea fó tan oportunidade ba Timor-leste iha area agrikultura, tamba ne’e antes atu prense iha area agrikultura presiza prepara joven sira nia kapasidade iha area agrikultór.
“Durante ne’e ita nia traballadores ne’ebé mak ba iha korea iha area rua de’it, peska no fabrika ne’ebé agora governu korea fó tan oportunidade mai Timor-leste hodi prense fila fali area agrikultur, entaun antes ita ba servisu hodi prense iha area agrikultura saida mak ita prepara ha’u hanoin husu ba jovem sira hot-hotu durante ne’e rona iha públiku katak estudante sira barak lakoi envlove ona iha eskola tekniku vogasional sira, husu ba ita bo’ot sira hola parte iha eskola tekniku sira ne’ebé mak ho area agrikultura, iha Natarbora, Bobonaro, Lautem se ita bo’ot sira iha ona kapasidade ne’ebé mak naton depois remata ita bo’ot sira mai tuir tan de’it formasaun lingua fulan neen hodi bele hetan oportunidade bele ba servisu iha korea”.Tenik Sekretariu estadu
Traballadór Vitor Tilman senti kontenti no agredese ba governu timor-leste bele servisu hamutuk ho Governu korea, hodi bele fó oportunidade ba sira hodi kore-an husi desempregu.
“Ha’u hanesan joven senti orgullu senti priviliziadu bo’ot tebes tamba prosesu lubuk ida mak ha’u liu, hahu husi teste topik to’o ohin finalmente ha’u hatais kaus Timor-leste ne’e kaus timor-leste bele hatais iha merkadu bele maibé atu hatais nia hamrik iha aeroportu ne’e defisil ne’ebé ha’u apresia tebes ba governu Timor-leste bele koopera hamutuk ho governu korea hodi bele fo biban ba ami joven bele kore-an husi desempregu, tamba desempregu sai hanesan problema bo’ot timor enfrenta ho biban ne’ebé mak ami hetan ami kontenti tamba ohin bele hamutuk ho fanília ofisialmente assina deklarasaun ho sefope”. Dehan Traballadór iha salaun Hotel Timor Lodge
Traballadór ne’e husu ba maluk joven sira tenki envolve an iha edukasaun naun formal sira, no nia kompromete sei la halai sai husi sistema.
“Mensajen ba ha’u nia kolega joven sira timoroan tomak pontus importante mak ita tenki investe ita nia an ba iha setor edukasaun, liliu iha edukasaun naun formal tamba ne’e mak liberta ita, ita husi foho mai iha Dili iha bu’at tolu mak, eskola, servisu no buka moris, husu ba maluk joven sira mai aprende lian korea iha sentru hot-hotu ne’ebé mak esiste iha kapital Dili, bu’at ida investimentu ne’e importante osan sai fasil tama difisil, saida mak ha’u planu mak ba servisu iha korea iha osan ruma, halo investimentu ba halo negosia hodi bele rendimentu hodi bele sustenta família nomos no selu eskola alin ho primo sira nian, promete katak sei la halai sai husi sistema tamba ohin iha promesa ne’e illegal prigu ne’e problema bo’ot ne’ebé mak ita hasoru, bu’at illegal ne’e hanesan ita oho an, tamba kooperasaun entre nasaun rua ne’e traballadór ne’ebé mak halai sai husi sistema hetan problema ita na’in rasik mak responsabiliza.Hakotu Nia
Jornalista : Leo Alves
Editor : Luhamutu
