DILI, 19 Fevereiru 2024- (RCC) – Koordenadór Komisaun Zona Ekonómia Sosiál Merkadu Timor-Leste (ZEESM-TL), João Mendes Gonçalves hala’o enkontru ho Primeiru-Ministru, Kay Rala Xanana Gusmão hodi relata progresu servisu no aprezenta planu servisu atu hala’o dezenvolvimentu la’o balansu iha Oé-Cusse-Abeno.
João Mendes Gonçalves informa katak, estrutura (ZEESM-TL) kontinua hamutuk ho Prezidente Autoridade Rejiaun Admistrativa Espesiál Oé-Cusse Ambeno (RAEOA), Rogério de Fátima Tiago Lobato hala’o ona ekontru ho autoridade no entidades parseiru dezenvolvimentu sira hodi deskute planu servisu ne’ebé sei envolve ema hotu- hotu ninia partisipasaun.
“Ami Hala’o tiha relatorio rejiaun nian maka Ami bele prepara planu desemvolvimento ba Oecussi nian. Molok nee sei prepara enkuadramanetu legal hodi estabelese entidade juridika ida neebe maka sei kaer desemvolvimento ekonomika Iha Oecussi nian hodi troka zona ekonomia especial i merkadu sosial ( ZEESM)”, Dehan João ba jornalista hafoin ekontru ho PM Xanana iha Palasiu Governu, Dili.
Eis Ministru Ekonomia hatutan, hafoin simu pose iha loron 31 Janeiru 2024, ekipa hala’o kedas enkontru rutina hodi halo planu no deskute enkuadramente legál sira.
“Hau nia planu dahuluk maka sei halo relatorio Estadu rejiaun nian hodi haree situasaun atual saida maka halo tiha ona hodi nunee planu saida maka presiza halo tan iha futuru dezemvolvimento iha RAEOA” tenik nia.
Nia hatutan tanBainhira prepara tiha planu no enkuadramentu, ho tán prozesaun orsamentál hodi lori mai Primeiru-Ministru hodi aprezenta ba Konsellu Ministru.
Koordenadór ho Autoridade RAEOA lideradu Prezidente Autoridade, Rogério Lobato hala’o ona reuniaun ho Lideransa Komunitáriu sira, setór privadu no Organizaun La’ós Governu balun iha Oé-cusse, alende ne’e ho parseiru dezenvolvimentu hodi serbisu hamutuk.
“Hakarak harii sistema ida servisu hamutuk ho parseiru dezemvolvimento neebe Autoridade maka iha poder ka desizaun no kontrolu ba apoiu neebe sira fo. Neebe sei kria unidade koordenasaun ida hamutuk para kada fulan tolu reuniaun hodi haree progressu servisu no kria matriz ida hodi bele kontrola diak liu tan apoiu sira hosi parseiru dezemvolvimento hodi evita duplikasaun servisu sobre pozisaun projetu,” nia informa.
Entretantu, ekipa ZEESM-TL sei halo hela preparasaun hodi halo rekrutamentu tanba servisu espesífiku hodi prepara planu dezenvolvimentu, enkuadramentu servisu no projesaun orsamentu presiza barak liu mak tékniku profesionál, péritu iha área setoriál hanesan pekuária, infraestrutura, sosiál, edukasaun, saúde nomós área temátika hanesan rekursu umanu ne’ebé sei rekruta iha tempu besik.
Jornalista: Mika Silva
Editor : Luhamutu
