27.3 C
Dili
Friday, 14 June 2024
spot_img

Nota ba Inprensa : Governu Xina ho UNICEF kolabora hamutuk hodi suporta komunidade sira ne’ebé hetan impaktu husi inundasaun.

Dili, 19 Fevereiru 2024 – Governu Xina no Fundu Nasoins Unidas ba Labarik (UNICEF) lansa ona projetu ida ho valór millaun US$1.5 hodi kompleta apoiu Governu Timor-Leste nian ba komunidade sira ne’ebé hetan impaktu husi inundasaun.

Liu husi projetu “Asistensia Emerjensia ba labarik sira hodi hatán ba inundasaun no COVID-19 iha Timor-Leste,” ema na’in 146,000 ne’ebé afetadu husi inundasaun, sei asesu ba kualidade nutrisaun, edukasaun no servisu bee no saneamentu, ne’ebé sei ajuda atu rekupera husi estragus ne’ebé kauza husi inundasaun.

Inundasaun barak liu iha Timor-Leste nia istória foin lalais ne’e mak iha fulan-abril tinan 2021, ne’ebé akontese hasoru pandemia COVID-19 nia kotuk, no afeta munisípiu 13 hotu iha Timor-Leste, ho kapitál Dili no área sira ne’ebé hale’u área ki’ik sira ne’ebé hetan impaktu aat liu. Ema na’in hamutuk na’in 40 lakon sira-nia moris, uma-kain 30,367 liu mak hetan impaktu no hasai tiha husi bee moos, enkuantu atividade aprendizajen lakon tanba eskola 34 no sentru formasaun ba profesór sira hetan estragus.

Tuir estimativa Governu nian, totál estragus no lakon tanba inundasaun iha fulan Abril 2021 mak millaun US$307.7. Maski Governu no parseiru sira kontinua haka’as an nafatin, komunidade sira ne’ebé afetadu kontinua presiza asisténsia rekuperasaun, liuliu relasiona ho nutrisaun, bee, ijiene no saneamentu, no edukasaun.

“Governu Xina kontinua fó apoiu ba dezenvolvimentu Timor-Leste nian, hodi envolve iha kooperasaun besik ho Timor-Leste iha área infraestrutura, saúde, agrikultura no edukasaun. Projetu apoiu emerjénsia ida-ne’e, ne’ebé implementa hamutuk ho edifísiu UNICEF nian iha Timor-Leste, envolve fundu barak no durasaun projetu ne’ebé naruk liu, ne’ebé kobre sidade boot sira iha nasaun laran tomak. Projetu ne’e hein katak sei hetan benefísiu maizumenus labarik no feto na’in 150,000, ho objetivu atu fó asisténsia tanjivel ba sira-nia moris no edukasaun. Ami mós hein katak liuhusi projetu ida-ne’e, ema sira iha Timor-Leste bele simu apoiu no enkorajamentu husi nasaun amigavel sira hanesan Xina,” dehan S.E. Wang Wenli, Embaixadora Xina ba Timor-Leste.

Husi inundasaun ne’e, UNICEF servisu hamutuk ho Governu Timor-Leste hodi responde ba nesesidade urjente sira labarik no família sira-nian iha área bee no saneamentu, nutrisaun no edukasaun. Ho apoiu fulan 18 husi Governu Xina, UNICEF sei kontinua fó apoiu ba Governu Timor-Leste hodi responde ba efeitu inundasaun nian, no mós fó apoiu ba komunidade sira atu rekupera no reziliente liu ba dezastre sira iha futuru.

Iha munisípiu haat, Dili, Ainaro, Ermera no Baucau, sei kobre labarik na’in 83.000 ho servisu nutrisaun ne’ebé krítiku no feto isin-rua na’in 34.000 sei hetan apoiu ho servisu konsellu kona-ba nutrisaun no fó-susu. Apoiu ba asesu ba bee, saneamentu no ijiene (BESI), ema na’in 10.000 (uma-kain 2.000) husi munisípiu hirak-ne’e sei hetan servisu BESI ne’ebé di’ak liu. Iha edukasaun, projetu ne’e sei kobre labarik na’in 24.449 ne’ebé sei hetan benefísiu husi ambiente eskola ne’ebé di’ak liu iha eskola 34 iha Dili, Baucau, Lautem, Liquica no Manufahi.

“Rekuperasaun hafoin inundasaun, presiza resposta ba tempu naruk tanba komunidade sira ne’ebé afetadu hasoru ona vulnerabilidade oioin iha saúde, nutrisaun, edukasaun, bee no saneamentu, molok inundasaun akontese. UNICEF apresia apoiu ne’e husi Governu Xina, ne’ebé sei kontribui atu harii fila-fali servisu sosiál báziku ba labarik no família sira, no mós apoia estabelesimentu mekanizmu redusaun risku dezastre nian sira hodi hamenus impaktu husi akontesimentu klimátiku sira iha futuru,” dehan Reprezentante País UNICEF, Bilal Aurang Zeb Durrani.

Nasaun barak iha rejiaun Azia Leste no Pasifiku, inklui Timor-Leste, hasoru perigu no xoke klimátiku no ambientál oioin, hanesan udan boot no inundasaun. Ida-ne’e hamosu risku ba labarik sira-nia moris no sira-nia família. Iha ámbitu Fundu Global Dezenvolvimentu no Kooperasaun Sul-Sul nian, Governu Xina suporta hela edifísiu UNICEF iha Timor-Leste no Laos hodi fó asisténsia salvasaun moris ba labarik no família sira ne’ebé afetadu husi emerjénsia sira ne’ebé kauza husi klima, hanesan inundasaun.

////Fim

Ba informasaun detallu bele kntaktu:

Embaxada Xineza:

  • Xi Wang, Embassy of the People’s Republic of China in Timor Leste, Mobile number – +670 78174297; Email address – [email protected]

UNICEF:

  • Tapuwa Mutseyekwa, UNICEF Advocacy and Communication Specialist, Mobile number – +670 77231103; Email Address – [email protected]
  • Antonio Gomes, UNICEF Communications Officer, Mobile number – +670 77232441; Email address – [email protected]

Related Articles

- Advertisement -spot_img

Latest Articles

ARKIVU.
RCC.