Díli, 23 Fevereiru 2024 (RCC) – Institutu Dom Boaventura de Timor-Leste ne’ebe hari’i iha Manufahi iha loron 11 Dezembru 2016 hamutuk ho Fundasaun Leo Laku Manufahi Riak iha Misaun no Vizaun atu prepara rekursu umanu ho Kualidade.
Iha komunikadu imprensa ne’ebé Jornalista RCC asesu katak, estrutura IBTL ho estrutura fundasaun LELAMAR hakarak hato’o ba publiku tomak relasiona ho IBTL nia lala’ok ne’e rasik.
“Ami estrutura sívitas akadémiku tomak hamutuk ho estrutura LELAMAR hakarak hato’o ba publiku tomak katak iha rai Manufahi hamri’ik tiha ona ho Institutu privadu ida ho naran Institutu Dom Boaventura Timor-Leste iha loron 11 Dezembru 2016, ho Vizaun atu forma ema ho koinesementu no kapasidade hodi desenvólve Siénsia Teknolójia Àrte no Kultura hodi fo’o progresu ba nasaun Timor-Leste.”
Tanba ne’e reprezentante estrutura Quitéria da Costa hateten, Kaer ba Vizaun, Misaun no objetivu sira IBTL nian, durante tinan 8 ona, ami ho kbi’it nato’on de’it iha dedikasaun, Komitmentu no sakrifísiu ne’ebé sívitas akadémiku tomak prepara hodi simu avaliasaun akadémiku IBTL nian mai husi Ajénsia Nasional para à Avaliasaun no Akreditasaun Akadémika (ANAAA) ne’ebé fo’o sai ona iha loron 9 Fevereiru 2024 ho valor C.
Iha biban ne’e estrutura IBTL no Fundasaun LELAMAR mós hakarak atu hato’o agradesementu ba parte hotu ne’ebé serbisu maka’as hodi ohin loron IBTL mós sai di’ak hanesan Institutu sira seluk.
“Ami mai iha ita bo’ot sira nia oin hakarak atu hato’o agradesementu bo’ot teb-tebes ba parte hotu ne’ebé durante ne’e servisu makas hodi ohin loron IBTL nia estatutu mós sai di’ak hanesan Institutu Privadu sira seluk. Tanba ne’e ho fuan ho laran tomak hakarak hato’o agradesementu espesiál Ministériu Ensinu Superior no ANAAA ne’ebé nafatin konsidera nafatin IBTL” Nia Deklara
Iha sorin seluk Prezidente ba Fundasaun LELAMAR, Vidál de Jesus “Riak Leman” hateten, ohin loron ami kontente la’os Fundador de’it maibé estrutura reitoria Dosentes, estudantes no inan-aman sira ne’ebe nia oan ba eskola iha ne’ebá ne’e hanesan pasu bo’ot ida mai ami tanba eskola ne’ebe hari’i iha Manufahi ne’ebá ho objetivu atu apoiu governu no apoiu mós inan-aman sira ne’ebé oan sira la asesu ba Eskola ne’ebé do’ok no li-liu sira kbi’it la’ek Osan laiha atu haruka oan mai Eskola iha Díli. Dehan nia.
“Enkuantu, Vise-Reitór Asuntu Administrasaun Finansas, Armando da Sílva hatutan, atu informa ba ita bo’ot sira katak durante IBTL eziste estudante atus-rua-resin maka ba ativu iha ne’ebá maibé agora da-dauk hela atus ida ha’at nulu resin maka iha IBTL no iha tinan 2023 estudante 14 maka Gradua ona”, Hakotu nia.
Jornalista : Adelia Fatima
Editor : Luhamutu
