Díli 26 Fevereiru 2024 (RCC) – Instituisaun Fokupers ho United Nations Population Fund halo Lansamentu Relatóriu Avaliasaun Kona-ba Mekanismu Referál Violénsia bazeia ba Jéneru iha Eskola no Prosesu fila hikas ba Eskola iha Timor-Leste.
Iha diskursu ne’e, Direitora ezekutiva Fokupers, Maria Fátima Pereira Guterres hateten, Fokupers hala’o ona iha tempu ne’e hodi aprezenta pontus balun.
” Fokupers nia esforsu hodi luta ba progresu asistênsia iha papél ne’ebé afeitada ona Violénsia bazeia ba Jéneru ne’ebé durante tinan 14 Timor-Leste implementa hela kona-ba lei kontra Violénsia doméstika, atu ita bele asiste hamutuk iha avaliasaun Mekanismu referál ba Violénsia bazeia ba Jéneru iha Eskola no prosesu fila hikas ba Eskola, Fokupers halo avaliasaun espesífiku ne’e atu realiza hodi komprende di’ak liu tan oinsá maka Eskola sira bele suporta foin-sa’e sira ne’ebé hetan esperiénsia asédiu seksuál, no fornese dádus ba governu hodi advoka ba formalizasaun polítika fila hikas ba Eskola. Fokupers observa ona katak foin-sa’e sira sei kontinua hasoru difikuldade atu fila fali ba Eskola hafoin sai husi Eskola tanba esperiénsia violénsia bazeia ba Jéneru liu-liu sira ne’ebe hetan violénsia seksuál ka insestu ne’ebé rezulta isin-rua no tu’ur ahi.” Nia deklara
Tanba ne’e, Maria Fátima Pereira Guterres hakarak hato’o agradesementu ba parte hotu ne’ebé kontribui ona realizasaun no avaliasaun ne’e to’o rohan.
“Fokupers hakarak hato’o agradesementu ba parte hotu ne’ebé konsege kontribui ona ba realizasaun no avaliasaun ne’e to’o rohan liu-liu ba Ministra Edukasaun no nia estrutura tomak husi nasional to’o munisipal hanesan Bobonaro, Díli, Ermera no Vikeke ne’ebé prontu oferese sira nia tempu hodi hola parte iha prosesu ne’e tomak”, Nia Informa
Iha sorin seluk, Assistente reprezentante United Nations Population Fund (UNFPA), Domingas Bernardo hateten, Violénsia bazeia ba Jéneru ne’e a’as teb-tebes.
“Tanba ne’e relatóriu ida ne’e sei ajuda rezultadu avaliasaun Mekanismu referál iha Eskola ho esénsial tebes atu bele ajuda ita hodi fo’o informasaun katak oinsá mak ita bele estabelese mekanismu referál ne’e di’ak liu tan. Tanba ne’e liu husi avaliasaun ida ne’e sei fo’o rekomendasaun ba ita hotu liu-liu ba Ministériu Edukasaun no ba parte relevante sira hotu atu bele kria mekanismu ne’ebé di’ak liu hodi fo’o protesaun ba labarik feto no mane sira durante prosesu insensívu no aprezensaun no importante liu tan atu kria espasu ne’ebé seguru iha Eskola ba labarik feto no mane sira atu aprende ho di’ak,” Hakotu nia.
Jornalista : Adelina Fátima
Editor : luhamutu
