25.7 C
Dili
Thursday, 20 June 2024
spot_img

EU-ILO Tau Forsa Hamutuk Hametin Kadeia Valor Agroflorestal Iha Timor-Leste

8 Marsu 2024

DILI – Uniaun Europeia, iha kolaborasaun ho Organizasaun Internasional Traballu (ILO), fasilita workshop multi-stakeholder ida kona-ba agroflorestal nia kadeira valór iha Timor-Leste, iha ámbitu Projetu Agroflorestal ba Empregu no Reziliensia. Sorumutu ne’e halibur grupu parte-interesada oin-oin, inklui liña ministeriais relevante, doadór, parseiru dezenvolvimentu, akadémiku, setór privadu no organizasaun sosiedade sivíl sira, atu diskute no ezamina potensiál kadeia valor agroflorestal nian iha nasaun laran.

Metas prinsipál husi workshop ne’e mak atu tau hanoin no esperiénsia balun husi parte interesada sira ne’ebé partisipa hodi hametin rezultadu prinsipál sira husi estudu no análize ba kadeia valór agroflorestal ne’ebé hala’o husi Institutu Agrikultura Bogor (IPB) no Universidade Nasional Timor Loro Sa’e (UNTL). Estudu no análize ne’e hala’o tiha ona durante fulan rua hahú husi Janeiru 2024, ne’ebé kobre agroflorestal nia kadeia valór produtu agríkola prinsipál haat iha Timor-Leste: nuu, vanilla, konjac no kafé.

Workshop ne’e mós fó espasu ba partisipante sira atu fahe sira-nia esperiénsia iha setór agroflorestal liu husi identifika lakuna abilidade no oportunidade negósiu ne’ebé eziste iha produtu haat refere hodi hametin produtividade no hadi’a agrikultór sira-nia moris-di’ak. Aleinde ne’e, atu identifika mós formasaun sira liga ho agroflorestal ne’ebé nesesariu iha setór Edukasaun Teknika no Profisional (TVET) iha Timor-Leste.

Embaixador Delegasaun Uniaun Europeia nian, Marc Fiedrich, hateten katak estudu no análize ne’e sei fó apoiu ba dezenvolvimentu kapasidade ba foin-sa’e no feto sira, liuliu iha área rurál sira, iha setór agroflorestal no sei kontribui ba dezenvolvimentu empregu ne’ebé di’ak ka kriasaun auto empregu ka kompania rasik.

“UE fiar katak envolvimentu ativu husi parte-interesada sira iha projetu ida-ne’e nu’udar xave atu asegura katak formasaun iha agroflorestal tuir nesesidade no oportunidade setór privadu nian no koresponde ho membru komunidade sira nia abilidade. Liuhusi fornesimentu abilidade nesesáriu ba joven no foin-sa’e feto sira ne’ebé servisu iha área agroflorestal no iha área rurál sira, projetu ne’e sei kontribui atu hadi’a sira-nia kompeténsia, hasa’e sira-nia produtividade no asegura ekonomia ida-ne’ebé diversifikadu, sustentavel no sirkular iha Timor-Leste,” nia dehan.

Entretantu, reprezentante OIT, Tendy Gunawan, subliña importánsia husi sinerjia no koordenasaun entre parte interesada relevante sira. “Sujestaun sira husi parte-interesada sira-ne’e importante atu asegura katak ita-nia atividade sira aliña ho atividade husi parte-interesada sira seluk ne’ebé servisu iha setór ida de’it. Liuhusi fo sinerjia ba ita-nia esforsu no rekursu sira, ita fiar katak projetu ne’e sei fó benefísiu boot ba povu Timor-Leste.”

Informasaun jerál

Workshop ne’e hala’o hafoin lansamentu Projetu Agroflorestal ba Empregu no Reziliensia iha Timor-Leste iha loron 21 fulan Fevereiru liu tiha. Ho orsamentu totál millaun 5.9 euro ba tinan haat oin mai, Projetu ne’e ninia objetivu mak atu promove diversifikasaun ekonómika ne’ebé sustentavel no reziliente iha Timor-Leste liuhusi dezenvolvimentu setór privadu, formasaun téknika no edukasaun profisionál (TVET) ba integrasaun juventude iha merkadu traballu no hasa’e oportunidade empregu no empreendedorismu ho kualidade, liuliu ba joven feto no labarik-feto sira.

Ba informasaun liutan, kontaktu:

  • Kordenadora Komunikasaun, Delegasaun UE iha Timor-Leste

Susana Martins, [email protected] 

  • Ofisiál Press no Informasaun, Delegasaun UE iha Timor-Leste

Akito Ximenes, [email protected]

  • Ofisiál Komunikasaun no Informasaun, ILO Dili, Timor-Leste

Paul Pinto, [email protected] 

No bele vizita plataforma media Delegasaun UE iha Timor-Leste:

   

Related Articles

- Advertisement -spot_img

Latest Articles

ARKIVU.
RCC.