Dili 7 Marsu 2024 (RCC)-Konsellu Imprensa Halo Sosializasaun Lei Komunikasaun Sosiál No Regulamentu Direitu Resposta No Ratifikasaun ba Pesoal Sira Ne’ebé Hala’o Kna’ar Nu’udar Ofisial Relasaun Publika Ka Ofisial Média Iha Liña Ministerial no Entidade Administrative Indireta Sira.
Presidente konsellu imprensa Otelio Ote hateten média officer posizaun ida ne’ebé mak importante no papel ida husi meius komunikasaun sosial, tamba ne’e sosializasaun ne’e importante tebes hodi hametin relasaun entre konsellu imprensa ho média officer.
“Sosializasaun ne’e importante tebes ba relasaun konsellu imprensa ho média officer sira, sosializasaun ne’e sei esplika kona-ba lei komunikasaun no artigu ida ko’alia kona-ba direitu resposta no direitu ratifikasaun, ita bo’ot sira nu’udar média officer ka nu’udar porta voz ba governu, ita bo’ot sira posizaun ida ne’ebé mak importante tebes, ita nia papel husi meius komunikasaun sosial ministeriu sira, porta voz nu’udar ema ne’ebé hato’o informasaun lolos ba públiku ita senti hanesan seidauk kompletu ka presiza halo di’ak liu tan. Ita nia lei komunikasaun mosu iha tinan 2014 depois konsellu imprensa foin estabelese iha tinan 2016, iha tinan hirak nia laran ami servisu makas liliu atu estabelese instituisaun ida ne’e, iha tinan dahuluk ita hari’i konsellu imprensa, iha daruak hametin periodu datoluk haburas, entaun agora buka hametin relasaun entre konsellu imprensa nomos instituisaun média sira hotu, entaun ita nia korenti tenki metin duni atu ita hatan ba publiku liuhosi informasaun sira ne’ebé publika iha média sira, tanto informasaun sira ne’ebé media sira buka rasik ka informasaun ne’ebé mak ita servisu na’in ba meius komunikasaun iha Governu divulga rasik”. Dehan Presidente konsellu imprensa iha salaun KI kintal bo’ot Dili
Nia Subliña média officer tenki bo’ok a’an lalais hatan ba notisia ka dadus ruma ne’ebé mak lalos, nomos tenki halo aprosimasaun ho ministru atu nune’e labele mosu konflitu entre jornalista ho média officer
“Tamba ne’e ita bo’ot sira tenki bo’ok a’an moris hodi hatan ba publikasaun kona-ba dadus ruma ka informasaun balun lo’os ka lalos ita bo’ot sira iha diretu resposta, iha loron tolu nulu hodi hato’o ita nia diretu resposta husi ministeriu kona-ba notisia ne’ebé mak kona-ba ita nia ministeriu, durante loron tolunulu ne’e média ofisial tenki hatene bo’ok hodi alerta ba ita nia superior atu hatan lalais prublikasaun ne’ebé karik halo ita la kontenti, kuandu liu ona loron tolu nulu ita la iha ona direitu tamba ita nia direitu lakon tiha iha tamba tarde foti direitu resposta, média officer tenki bo’ok a’an rasik hodi fó hatene ba ministru katak jornalista sira atu halo entrevista, ka média officer mak tenki buka jornalista husu ita bo’ot sira atu entrevista ministru ka la’e, atu nune’e aprosima ho ministru hodi hatan bele halo entrevista ka la’e, hodi nune’e prevene keta mosu konflitu entre media officer ho jornalista sira”., Tenik Nia
Partisipante Maria Lucia Trindade agradese liuhusi sosializasaun bele hatene kona-ba direitu atu assesu ba média sosial sira tamba dalabarak ema uza média sosial hodi desfama ema seluk nia naran.
“Ha’u orgullu no agradese tebes tamba bele tuir iha enkontru ida ne’e, ita hare’e katak agora utiliza ba média sosial ne’e dalaruma hamonu ema bele mos halo desfama ba ema seluk nia naran iha publiku, entaun sosializasaun ne’e importante tebes atu hatene katak ita mos iha direitu oinsa mak bele asesu kona-ba média, ita timoroan iha diretu atu bele ko’alia nomos atu hato’o informasaun ne’ebé mak di’ak iha publiku, bu’at ne’ebé mak ka’er iha sosializasaun ne’e mak ami tenki bo’ok a’an lalais no halo aprosimasaun ho jornalista sira seluk, tenki iha komunikasaun ne’ebé mak di’ak”. Hateten Partisipante iha Salaun KI Kintal bo’ot Dili
Partisipa iha atividade sosializasaun ne’e mai husi ofisial media iha ministeriu sira hotu nomos partisipa husi funsiunariu balun inklui mos jornalista sira. Sosializasaun atu hametin relasaun entre konsellu imprensa ho media officer nomos média sira seluk inklui mos jornalista sira.
Jornalista : Leo Alves
Editor : Luhamutu
