Dili, 06 Marsu, 2024 (RCC) Kada Tinan Kuaze Feto Rihun Ha’at Nulu (40.000) Mak Hetan Isin Rua Iha Timor Leste, No Porsentu Sanulu Resin Lima (15%) Mak Hetan Komplikasaun. Dadus Ne’e Fo Sai Husi Prezidente Fundu Nasoins Unidas ba Populasaun (UNFPA) Timor-Leste Bainhira Asina Nota Entendimentu Ho Governu Japaun Atu Estabelese Projetu Kuidadu Emergensia Obstetriku no Neonatu Baziku (KEMON-B) Iha Sentru Saúde Komunitaria 20 Iha Timor-Leste.
Prezidente UNFPA Domingas Bernardo ba jornalista hateten Timor-Leste sei refleta dezafius barak ne’ebé signifikantes tebes iha saúde materna ho neonatu, tamba tasa ho mortalidade inan a’as no bebe foin moris mos numeru a’as.
‘’Hanesan itu hotu hatene timor leste sei imfrenta hela dezafius barak ne’ebé signifikante tebes iha saúde maternal ho neonatu tasa ho mortalidade inan numeru a’as no bebe foin moris mos numeru a’as, tinan barak kuaze porsentu ne’en nulu resin walu (68%), sira ne’ebé mak mate sira hetan atendementu antenatal tamba saida maka sira mate, entaun ida ne’e hatudu katak iha lakuna balun atividade servisu nian, ida tan mak, inan Sira sei hakarak partu iha uma, lahetan asistente husi pessoal saúde, ne’ebé provadu, hau hanoin ida ne’e mos problema bo’ot ida ba timor leste ,no kada tinan timor leste kuaze rihun ha’at nulu 40,000 feto ne’ebé kada tinan isin rua no mais ou menus porsentu sanulu resin lima(15%) mak hetan komplikasaun, tamba ne’e ita presija hadia servisu sira ne’ebé esensiál atu bele suporta inan sira bainhira sira tur ahi ’’nia akresenta
Presidente UNFPA ne’e mos hato’o nia agradesimentu ba parte governu tamba bele halo esforsu barak ona hodi redus tasa mortalidade inan ho bebe iha timor-leste.
‘’Agradese tebes ba governu tamba halo esforsu barak ona atu redus tasa mortalidade inan ho bebe iha timor-leste, maibe numeru sira ha’u temi ne’e kontinua hala’o di’ak liutan, atu Tau servisu ne’ebé kualidade di’ak iha sentru saúde sira, hodi fornese servisu kualidade ba inan isin rua no bebe foin moris sira, ha’u fo hanoin de’it iha tinan rihun rua sanulu resin lima (2015) ministerio saúde hamutuk ho UNFPA, UNICEF ho WHO, ita halo ona planu ba KEMON-B ida ne’e objetivu ida atu hadia kualidade saúde maternal neonatal liu husi kapasitasaun ba profisional saúde hodi hadia maternidade sira atu bele fornese servisu ne’ebé diak ho objetivu jeral atu hatun mortalidade inan ho oan nian.’’
Iha sorin seluk embaixadór japaun ba timor leste Tetsuya Kimura akresenta katak projetu ida ne’e servisu atu hadia sentru saúde komunitaria rua nulu (20) ho objetivu hametin sistema kuidadu saúde primaria ne’ebé ezerse ona, no fornese kuidadu saúde inan ho bebe.
“ projetu ida ne’e servisu atu hadia sentru saúde komunitaria 20 ho objetivu atu hametin sistema kuidadu saúde primária ne’ebé eziste ona no fornese kuidadu saúde inan ho bebe ne’ebé foin moris kualidade, inklui kuidadu antenatal no kuidadu postnatal iha munisipiu sanulu resin rua,(12) projetu ne’e mos sei inkliu fornese ekipamentu mediku no laos mediku ho formasaun kapasitasaun ba pesoal médiku sira, ha’u vizita ona instalasaun rua hanesan iha likisa no atauro, tamba ne’e ha’u fiar katak ami nia koperasaun liu husi projetu ida ne’e sei hamenus mortalidade, inan ho pernatal iha timor-leste no saida de’it ba salvasaun ba feto sira nia moris molok partus, no depois salva bebe ne’ebé foin moris.
Japaun servisu hamutuk ho governu Timor-Leste iha saúde materna no saúde durante tinan barak ona ne’e duni embaisador ne’e fiar katak dezemvolvimentu rekursu humanu mak metas ida ne’ebé importante liu ba nasaun ida no melloramentu setor maka baze ba kualker humanu, nune’e mos ida ne’e abordajen ba saúde materna no saúde infantil konsistante bo’ot governu nian
Jornalista: sergio borges
Editor: luhamutu
