Dili, 04 Abríl 2024 (RCC)_Prezidente Repúblika José Ramos Horta apresia tebe-tebes situasaun kalma iha iha tempu Paskoa tanba la hanesan uluk ita rona sempre iha tuda malu no sona malu iha fatin – fatin.
Iha intervista ho Primeiru Ministru Kay Rala Xanana Gusmão iha Palacio Prezidensiál Bairo Pite Dili iha kinta-feira ne’e hafoin remata enkontru ho Prezidente Repúblika ba jornalista sira katak, Prezidente Repúblika José Ramos Horta apresia tebe-tebes tanba situasaun kalma tebes no la hanesan uluk ne’ebé lor-loron ita rona ema tuda malu, sona malu no mós baku malu ne’ebé kompara ho tinan ida ne’e iha duni maibé iha oituan- oituan tanba ne’e Xefe Estadu apresia tebe-tebes no sente admira ho prosisaun. Paskoa ba tinan ida ne’e ema barak mak partisipa no la iha problema tanba ne’e hatudu katak iha ona husi komunidade sira hanesan joven, katuas, ferik sira iha ona konfiansa ba estabilidade.
Nune’e mós Xanana hatutan , Xefe Estadu dehan komparasaun entre tinan ida ne’e ho tinan kotuk liu ba la dun hare ema halo movimentu hanesan hala’o prosisaun hamutuk ho sarani sira sa’e foho iha Oecussi ho situasaun ne’ebé kalma no fila ho kalan boot maibé ema fila la iha problema.
“Tinan kotuk-kotuk ita ladún haree movimentu ne’ebé ema ba ho konfiansa, ne’e mak ha’u dehan ita nia sarani sira hakarak mós hatudu ba Xefe Estadu katak la’ós sira de’it mas Xefe Estadu mos halo prosisaun sa’e foho iha Oekusse ho situasaun kalma ne’ebé ita bele hetan Misa Paskua ninian to’o kalan bo’ot ema la’o fila ba uma maibé laiha problema” dehan Xanana
Aliende ne’e mós Xanana hato’o ba prezidente Repúblika kona ba aprova ona rezolusaun ne’ebé atu prolonga suspensaun arte marsiais ninian.
“Aproveita dehan ba Prezidente Repúblika horseik ami aprova rezolusaun ida atu kontinua suspensaun arte marsiais ninian, la’ós tanba kastigu la’e, atu kontinua tanba sei presiza nafatin situasaun suspensaun ninian, Tanba iha eskola balun alunu sai mestri ba arte marsial ba grupu ida, baku fali professor, professor pertense ba grupu ida baku alunu sira, duni alunu sira husi grupu seluk ne’e mak iha rezolusaun ne’e mós halo proibisaun ba mestre sira kahur fali buat ida ne’e iha fali eskola nia laran, tanba ne’e mak kontinua fulan neen tan hodi hadia nafatin” katak Xanana.
Enkuantu iha tempu ne’e tomak sei buka influénsia atu nune’e bele motiva arte sira ne’e tamba temi naran arte entaun sei loke kompetisaun ida hodi hatudu hanesan Taekwondo no Karate hodi nune’e bele ba kompete iha rai li’ur atu nune’e bele muda mentalidade no bele lori medalla mai Timor Leste, hakotu Xanana.
Jornalista : Tonia Neto
Editor : Luhamutu
