25.7 C
Dili
Thursday, 20 June 2024
spot_img

Sorumutuk Konsellu Ministrus nian iha loron 27 fulan-marsu tinan 2024

Konsellu Ministrus hala’o sorumutuk iha Palásiu Governu, Dili, no aprova projetu Proposta Lei, ba alterasaun daruak husi Lei n. 8/2009, loron 15 fulan-jullu, kona-ba Komisaun Anti-Korrupsaun, ne’ebé aprezenta husi Prezidénsia Konsellu Ministrus.

Husikedas Komisaun Anti-Korrupsaun ne’e harii, ejizénsia husi kuórum deliberativu reforsadu atu hala’o eleisaun ba ninia Komisáriu difikulta ona prosesu eleitorál ne’ebé normál no regulár, nune’e afeta funsionamentu órgaun polísia kriminál espesializadu iha kombate ba korrupsaun. Ho diploma ida-ne’e, Komisáriu sei bele eleitu ka ezoneradu ho maioria absoluta husi Deputadu sira iha Parlamentu Nasionál, no sei elimina rekizitu katak tenke pelumenus katoluk haat husi Deputadu sira marka prezensa ne’ebé hala’o hela funsaun.

Proposta Lei ida-ne’e determina mós katak Komisáriu ne’ebé mandatu remata ona kontinua hala’o nia knaar to’o titulár foun simu pose, nune’e bele garante kontinusaun servisu públiku no atinje misaun ne’ebé sai hanesan objetivu hodi kria Komisaun Anti Korrupsaun.

***

Konsellu Ministrus aprova mós projetu Dekretu-Lei kona-ba rejime espesiál bolsas estudu ba setór justisa, ne’ebé aprezenta husi Primeiru-Ministru, Kay Rala Xanana Gusmão.

Bolsas ne’e ho objetivu atu finansia kursu ensinu superiór hodi hetan grau lisensiatura, mestradu no doutoramentu iha siénsias jurídikas husi sistema sivilista, formasaun iha medisina legál, asaun formasaun profisionál,  formasaun espesializada ba formadus sira Sentru Formasaun Jurídika no Judisiária, no estájiu profisionál hodi hala’o profisaun ida. Programa ne’e sei finansia husi Fundu Dezenvolvimentu Kapitál Umanu no jere husi Grupu Traballu ba Reforma Setór Justisa, liuhusi orientasaun Primeiru-Ministru nian.

***

Konsellu Ministrus, tuir projetus ne’ebé aprezenta husi Ministru Obras Públikas, Samuel Marçal, delibera hodi aprova  adendas kontratus tuirmai ne’e:

ICB/046/MOPTC/2017 – Kona-ba estensaun períodu konstrusaun ba projetu melloria no manutensaun estrada Baukau- Venilale – Vikeke: Lote 2 Venilale – Vikeke (Sta 27+120 – 62’101), ne’ebé sei implika estensaun prazu kontratuál to’o loron 29 fulan-juñu tinan 2025;

RFP/003/MOP-2018 – Kona-ba estensaun kontratu servisus supervizaun nian ba obras hadi’a estrada entre Baukau – Venilale – Vikeke: Lote 2 Venilale – Vikeke (Sta 27+120 – 62’101), ne’ebé sei implika kustu adisionál ida ho valór kontratu dolár rihun 903 no estensaun prazu kontratu nian to’o loron 30 fulan-juñu tinan 2025;

LIB-001-MOPTC-2018 – Kona-ba konstrusaun estrada 2,5 km tan iha Projetu Reabilitasaun no Manutensaun ba Estrada Distritál sira – Pakote 2 Seksaun: Bazartete – Tokoluli (Sta. 16+02 – Sta. 32+045), ne’ebé sei implika kustu adisionál ho dolár amerikanu milloins 1,55 no estensaun prazu kontratu ba loron 184.

***

Ikusliu, Konsellu Ministru delibera hodi fó poder tomak ba Ministru Ensinu Superior, Siénsia no Kultura, José Honório da Costa Pereira Jerónimo, hodi asina Memorandu Entendimentu  ida ho Governu Reinu Kamboja iha área ensinu superiór no siénsia. REMATA

Related Articles

- Advertisement -spot_img

Latest Articles

ARKIVU.
RCC.