DILI, 17 abril 2024 (RCC), Estudante Luciu ho Sr. Jacob Fa’an Sigaru no Pentolan Iha Dalan Ninin Kampu Baru Hodi Sustenta ba Nesesidade Uma Laran no Selu Eskola.
Iha entervista, estudante Luciu Correia hateten, deside fa’an sigaru hodi buka osan tamba inan aman laiha kbi’it atu selu eskola, ho nune’e hili fa’an sigaru hodi selu rasik nia eskola no selu mikrolete ba mai eskola.
“Ha’u hakarak fa’an sigaru, tamba ha’u nia inan aman nia forsa la iha, orsamentu la iha atu selu eskola, ho ida ne’e mak deside buka rasik osan hodi selu eskola, nia funan ne’e rai atu selu bemo, sosa hahán hanesan be’e no balun uza ba foto kopia no bu’at ne’ebé mak presiza lorloron nia, familia iha maibé familia la dun suporta, ne’e mak ha’u nia inan aman mesak la bele, ne’e maka ha’u esforsu atu nune’e bele hetan osan hodi selu eskola no bemo nian atu ba eskola, atu foto kopia ruma karik bele uza de’it, osan modal ne’e 51 dolares hanesan ne’e bele sosa ba sigaru marboro, suria, no LA, nia funan hamutuk 15 dolares , osan modal ne’e hetan rasik tamba eskola husi fundu Dezenvovimentu Capital Humanu ( FDCH) kada fulan hetan 600 dolares, restu ne’e uza sosa sigaru hodi fa’an, kada loron hetan osan 15 dolares”. Dehan Luciu iha kampu Comoro Dili
Nia salenta husu kolega sira atu buka rasik osan labele depende ba aman inan sira maibé tenki esforsu-an hodi hetan osan hodi sustenta família duke buka problema ne’ebé mak la iha benefísiu ba ita
“problema ne’ebe mak ha’u hasoru maka ami nia kolega sira barak mak fa’an, entaun dalaruma loron ida hetan de’it mak 7 dolares, no ha’u rekomenda ba alin sira katak, di’ak liu ita buka moris ne’e di’ak liu tan, duke ita halo problema ita buka problema ne’e solusaun la iha, di’ak liu hapara buka problema sustenta maka ita nia moris”, dehan Lucio iha merkadu Kampu Baru Dili. Tenik Nia
Iha sorin seluk, Jacob Vul informa hili fa’an pentolang di’ak liu duke servisu sira seluk, tamba fa’an pentolang kada loron hetan osan maske la barak maibé iha no servisu sira seluk ne’e depende kada fulan mak foin hetan osan.
“Ha’u hakarak atu fa’an pentolan tamba osan , tamba servisu sira seluk la dun gosta, tamba kleur liu mak ita hetan osan, maibé ida ne’e lae, ida ne’e ohin loron se ita sai bele hetan kedas osan, se kuandu ita la sai, osan la iha, wainhira ita sai ona ita hetan osan maske 5 centavos 10 centavos mós ita hetan, ha’u nia hakarak rasik maka fa’an, la’os hanesan ema seluk haruka fa’an pentolan ne’e laiha, maibé ha’u mak hakarak rasik buka osan, hakarak buka osan tuir ida ne’e de’it, maibé servisu seluk lakohi, tamba servisu sira seluk sura tempu, sura fulan maka foin hetan osan, maibé, ida ne’e la iha”. Hateten Jacob Iha Kampu baru
Nia salenta pentolang ne’ebé mak fa’an ne’e ninian rasik, maibé senti triste bainhira halo pentolang ne’ebé mak barak, maibé dalaruma folin la hotu tanba depende ba ema rame entaun pentolang hotu se ema la rame entaun fa’an pentolang la hotu.
“pentolan ne’e ha’u nian rasik no modal dahuluk komforme ita de’it atu tetu na’an barak, entaun hasai osan barak liu ida ho osan 8 dolares, se ita tetu kilu rua ga tolu hanesan ne’e ho osan 16 dolares, maibé ita sura hamutuk bu’at hotu ne’e 30 dolares, no fa’an kle’ur ona, mais ha’u ba tiha foho hodi hanorin labarik eskola tinan rua, iha ne’ebá hanesan voluntariumente, maibé la iha osan, 5 centavos mos la fó ne’e maka ha’u foti desizaun, mai fa’an fali pentolan, depende ba ema hola de’it, se kuandu ami sai husi uma ona, dala ruma hotu no dala ruma mós la hotu, tamba ita lori barak, ita lori 60-70 sira ne’e, depende ema hola de’it, ema rame entaun ema hola hotu, se la rame entaun rai hela balun, no problema maka hanesan la hotu ne’e mak ita senti triste oituan, no depende ba ema ida-idak, tamba nia hanoin nia futuru, entaun nia buka moris, maibé nia buka ransu de’it no buka problema ne’e depende ema ida-idak, ba ha’u nia hanoin buka osan de’it”. Nia Hakotu
Jornalista estajiada: Agostinha Soares da Costa
Editor : luhamutu
