Dili, 22 Abril 2024 (RCC)- Augusto ho Angela Sira nia Moris Depende De’it ba Fa’an Dose iha Dalan Ninin hodi Sustenta Sira nia Moris. Augusto Fa’an Dose Iha Dalan Ninin Kampu Baru Durante Tinan Rua No Angela Fa’an Iha Dalan Ninin Kampu Baru Durante Fulan Rua Ona.
Iha entervista, Augusto Quintão hateten, tamba ho situasaun ekonomia ne’ebé hakdasak motiva nia hodi fa’an dose iha trotoar leten, hodi buka osan ba nia a’an no nia família sira.
“Buat ne’ebé maka motiva ha’u atu fa’an molen fa’an dose iha dalan ninin, buat barak tamba ho ita nia situasaun ekonomia ne’ebé maka agora hakdasak, ha’u hare’e iha joven barak ne’ebé maka laiha dalan, entaun ha’u koko ida ne’e hanesan motiva ida katak, nusa la bele hamri’ik rasik, maske tu’ur iha trotoa leten hodi fa’an, ne’ebé ha’u, buat ida motiva ha’u di’ak liu ne’e barak la halimar, ha’u nia jerasaun no joven foin-sae sira, tinan rua ona ha’u iha fatin ne’e fa’an molen fa’an dose. Modal fa’an dose hanesan ne’e, ita la presiza barak, importante iha vontade de’it, ne’ebé modal ne’e 30 dolares hodi bisnis to’o agora, osan husi ha’u nian rasik maka modal hodi fa’an, loron ida ita gasta osan hodi halo molen ne’e ita gasta 30 dolares, tamba iha mina trigu no buat seluk no hetan fali 120 dolares, no osan rasik rai ba futuru, iha oan iha fe’en ne’ebé karik aban bainrua oan sira eskola, ita bele uza fali osam sira ne’e hodi selu sira nia eskola no hahan lor-loron nian, problema barak problema kona-ba komunidade laiha, maibé problema ho natureza iha, dala ruma udan, dala ruma anin i fatin ida ne’e mós protejidu estadu nian ne’ebé okupa hela iha trotoar leten, maibé iha loron ida karik buat hotu sei nakfila ba fatin seluk, ita halo bisnis iha dalan tenki iha komitmentu, se ita ta’uk, hakfodak, buat hotu-hotu sei la lao, ha’u nia sentimentu ha’u kontente tebes tamba ha’u bele buka fundus rasik ba ha’u nia moris, la tane-liman, ema barak ema dehan moris iha sidade laiha servisu, maibé ita iha rasik servisu di’ak liu”. dehan Augusto
Augusto husu ba joven sira atu lalikan hein de’it ba Guvernu atu fó servisu, maibé sira rasik mak kria fatin servisu ba sira nia a’an hodi bele buka osan.
“Ha’u nia mensajen ba ha’u nia maluk sira hotu liuliu ba joven sira, lalikan hein de’it husu ba guvernu dehan katak, imi prepara servisu ba ami, servisu barak ita bele halo hela, maibé ita seidauk hare’e hetan ne’ebé buat hotu-hotu ne’e ida-idak ho nia konsiénsia de’it, hakarak atu hetan osan esforsu a’an, hakarak atu hetan osan tenki servisu, hakarak hetan osan fó a’an oinsá bele hetan osan” nia dehan.
Iha sorin seluk, Angela Emu informa tan katak, nia rasik deside atu fa’an dose iha dalan ninin hodi buka osan ba nia presiza no selu kursus, maske nia hasoru problema barak, maibé nia la lakon vontade atu esforsu no boot ona la bele hare’e liu ba inan/aman.
“Ha’u remata eskola no tuir kursus de’it, kursus ne’e partaim de’it ne’e oras rua de’it, tuku 08:00 to’o tuku 10:00, sai iha uma la halo buat ida, entaun ha’u ho alin sira dehan ba apa ho ama, nusa ami iha uma de’it, nusa ami la halo gorengang atu ba fa’an, sira dehan di’ak importante imi mak hakarak, la’os ami mak haruka imi, ne’e maka sira dehan hakarak fa’an ne’e fa’an de’it, ha’u komesa fa’an iha fulan rua hanesan, la barak ida hanesan 5 dolares hanesan ne’e no osan ne’e apa ho ama sira maka fó, semana ida gastu 15 dolares no loron ida hetan 20 dolares, osan ne’e uza ba ha’u nia presiza no uza ba hodi selu kursus, dala ruma dose la hotu, ita fa’an ne’e hanesan ne’e duni, dala ruma hotu no dala ruma la hotu ne’e maka problema, sentimentu ladún di’ak tamba la hotu, maibé ha’u la lakon vontade hodi esforsu nafatin tamba buka osan, hakarak hato’o ba kolega sira, bainhira remata husi eskola ne’e keta hare’e husi inan/aman de’it, iha motivasaun bele fa’an ka halo saida de’it, ita mós boot ona tenkiser ajuda apa ho ama sira no keta moe mós, ita la’os husi ema riku, ita ema oan ki’ak ne’ebé fa’an ne’e keta moe”,hakotu Angela.
Jornalista Estajiada : Adelia Mendonça
Editor : Luhamutu
