25.7 C
Dili
Thursday, 20 June 2024
spot_img

Xina La Kumpri  Loron 01 Fulan Maio Nu’udar Loron Mundial Ba Traballadór Sira Hodi Nafatin Hala’o Atividade

Dili, 01 Maio 2024 (RCC) – Relasiona Ho Loron 01 Fulan Maio Nu’udar  Loron Mundial Ba Traballador Sira, Maibé China Nafatin Hala’o Atividade Hanesan Bai-Bain Hodi Fa’an Sasan Iha Kapital Dili.

Iha  entrevista ho traballadór Joaquin da Costa hateten, tuir lolo’os ohin loron labele loke loja, maibé tanba de’it ema seluk loke, ho nune’e sira mós nafatin loke loja hodi hetan rendimentu uitoan ba sira nia presiza.

“Tuir lolo’os ne’e ohin la loke loja, maibe ohin tuku 08:00 ami na’in rua mai hare’e ema seluk loke loja, entaun ha’u hatete ba patraun dehan ema seluk loke loja, entaun ita mos bele loke ita nia loja, tanba ne’e ha’u ho patraun mós komesa loke hodi fa’an no hein kompradór sira atu mai sosa sasán, tanba ne’e ami mós aproveita loke duni loja hodi hetan osan rahun ruma. No loron ohin mak loron traballadór ba ita hotu, klaru katak ita labele halo servisu, maibé tanba de’it fe’en no oan sira nia kabun, entaun ami tenki servisu hodi buka osan rahun ba loron ida rua nian”, Dehan Joaquin.

Iha sorin seluk, traballadóra Anjela M. Lay informa, senti kontente maibé, tanba de’it iha uma laiha servisu atu halo ho nune’e traballadora ne’e, deside ba ajuda nia patraun hodi fa’an sasán iha loja.

“Ohin loron ne’e ha’u senti kontenti, maibé hanesan buat ida karik konforme ita hakarak tama servisu ka lakoi tama servisu ne’e depende ba ita rasik, tanba ne’e ha’u nia hakarak atu tama servisu tanba iha uma de’it la halo buat ida, no ha’u hahú servisu iha ne’e iha tinan 2018, nune’e kada fulan ha’u nia salariu tuir estandar de’it 115 dolares, maibé salariu ne’ebé ha’u hetan ladún sufisiénte no uza liu ba han no hemu de’it, tanba ne’e ha’u hakarak rekomenda ba SEFOPE atu bele hare’e liu-liu ba salariu ne’ebé la sufisiénte ho 115 dolares, tenki hasa’e tan, tanba ami balun servisu kle’ur ona, maibé salariu nafatin de’it ho 115 dolares”, hakotu Anjela.

Jornalista : Adelina Fátima, Adelia Mendonça

Editor : Luhamutu

Related Articles

- Advertisement -spot_img

Latest Articles

ARKIVU.
RCC.