25.7 C
Dili
Thursday, 20 June 2024
spot_img

Komunikadu Imprensa

Sorumutuk Konsellu Ministrus nian iha loron 15 fulan-maiu tinan 2024

Konsellu Ministrus hala’o sorumutu iha Palásiu Governu, Dili, no hahú ho aprezentasaun ida husi Governadór Banku Sentrál Timor-Leste (BCTL, sigla iha lian portugés), Helder Lopes, kona-ba jestaun operasionál Fundu Petrolíferu.

Aprezentasaun ne’e inklui informasaun kona-ba estratéjia no implementasaun ba investimentu, alokasaun portfolio, dezempeñu investimentu, reseita Fundu Petrolíferu no mós kona-ba levantamentu Fundu Petrolíferu nian.

Estratéjia investimentu ba Fundu Petrolíferu ne’e gia hosi objetivu klaru ne’ebé lejizlasaun nasionál estabelese ona, ho objetivu atu asegura katak reseita ne’ebé maihusi esplorasaun petrolífera sei investe atubele garante benefísiu sustentavel tantu ba jerasaun atuál no mós ba jerasaun futura.

*******

Konsellu Ministrus aprova projetu Decreto-Lei alterasaun dahuluk ba Dekretu-Lei n. 96/2022, iha loron 30 fulan-dezembru, ne’ebé kria Millennium Challenge Account-Timor-Leste no aprova ninia estatutu, ne’ebé aprezenta husi Ministra Finansas, Santina José Rodrigues F. Viegas Cardoso.

Haree ba estrutura Governu Konstitusionál IX estabelese katak Millenium Challenge Account – Timor-Leste, I.P. (MCA-TL)  dependénsia ba Ministra Finansas, sai nesesáriu atu halo alterasaun ba Dekretu-Lei n.96/2022, iha loron 30 fulan-dezembru, hodi transfere tutela no superintendénsia/ supervizaun MCA-TL nian husi Primeiru-Ministru ba membru Governu ne’ebé responsável ba área finansas.

Iha sorin seluk, sai importante mós atu aliña dispozisaun sira kona-ba estrutura MCA-TL nian, ho objetivu atu asegura implementasaun ida ne’ebé efikás no efisiente husi objetivu sira ne’ebé sai hanesan ninia baze, liuliu, atu garante tranzisaun armonioza ida kona-ba kompeténsia durante no hafoin períodu instalasaun  no evita atrazu atu foti  desizaun kona-ba MCA-TL.

 ****

Konsellu Ministrus mós aprova projetu Rezolusaun Governu ne’ebé aprezenta mós husi Ministra Finansas, kona-ba reforma sistema kontabilístiku.

Objetivu husi reforma ida-ne’e atu garante fiabilidade no modernizasaun iha inskrisaun, klasifikasaun no rejistu ba reseita no despeza sira, atubele promove transparénsia iha finansa públika no privada sira no mós promove dezenvolvimentu ekonómiku.

Objetivu prinsipál sira inklui, iha prazu fulan 12, kria padraun kontabilístiku foun ida no planu kontas ne’ebé bele aplika ba setór públiku no privadu, hodi aliña ho norma internasionál sira, no implementasaun sistema integradu ida ne’ebé inklui no asegura relasaun entre kontabilidade orsamentál, bazeia ba klasifikadór orsamentál no kontabilidade finanseira, tuir planu kontas. Sistema ne’e mós tenke simples, fasil no adekuadu atu utiliza ba nesesidade, kapasidade no rekursu ba setór públiku no privadu nasionál.

Iha prazu másimu fulan 24, sei kria mós Konsellu Kontabilístiku Nasionál ida hodi emite norma no rekomendasaun sira. Iha prazu médiu ne’e, sei kria rejime sertifikasaun ida hodi garante kualidade profisionál ne’ebé responsavel ba kontabilidade no asosiasaun profisionál ida ba profisionais kontabilidade no auditoria nian.

****

Ikusliu, Konsellu Ministrus aprova projetu Rezolusaun Governu hodi atribui donativu ida ho valór dolar amerikanu 61.500 ba Nunsiatura Apostólika iha Timor-Leste hodi halo instalasaun ba elevadór ida iha edifísiu Nunsiatura nian, nune’e hodi garante kondisaun adekuada kona-ba alojamentu no mobilidade ba Sua Santidade Papa Francisco durante ninia vizita mai Timor-Leste iha fulan-setembru. REMATA

Related Articles

- Advertisement -spot_img

Latest Articles

ARKIVU.
RCC.