Díli, 28 Maio 2024 (RCC) – Haris Fatin Publiku Iha Largo Lecidere Sai Preokupasaun ba Vizitante no Negosiante Sira Atu Uza ho Dignu.
Iha entrevista, Melania Fernandes de Carvalho nu’udar Negosiante ne’ebe fa’an sasan iha Largo Lecidere, sente triste tanba haris fatin ne’ebe sira uza kada semana ida loke loron tolu deit.
“Kona ba haris fatin hau senti ami uza la ho dignu no susar tebes ba ami tanba iha semana ida nia laran, haris fatin loke ba publiku loron tolu de’it, dalaruma hahú husi loron Segunda to’o kuarta entaun haris fatin sira ne’e diak hotu hela, maibe hahu fali husi loron, kinta,sexta,no Sábado ne’e haris fatin sempre falla, dalaruma ami sempre hirus malu tan, sira ne’ebe servisu iha ne’eba ne’e, tanba ami ba sira sempre dehan intupidu no be’e laiha, entaun ami sei diskute malu tia ho sira foin mak loke odamatan ba ami, wainhira ami foin sai sira lansun taka kedas, ema seluk ba mos haris fatin ne’e sempre hanesan ne’e hela deit, durante iha ne’e sempre hasoru hela de’it problema hanesan ne’e, tanba ne’e ami senti triste no ladun diak ba ami, dalaruma ami sei halai fali ba uma tanba semana ida haris fatin loke de’it loron tolu, bai-bain loke iha tuku 8 to’o tuku 12 no meiudia taka tiha loke fali iha tuku 1:30, maibé iha Segunda, Tersa, no kuarta mak ami uza di’ak no odamatan mos sira sempre loke, iha fali Kinta to’o Sabadu ne’e ami ba haris fatin ne’e sira sempre hakilar ami dehan be’e laiha, no ami mos dehan ba nia katak be’e laiha bolu imi nia patraun mai hodi Hadia tanba haris fatin ne’e loke ba publiku hodi ema hotu-hotu asesu, tanba ne’e hakarak husu ba kompania ne’ebe mak ka’er projetu konaba haris fatin nian ne’e bele tun direta mai hodi haree ho matan rasik hodi hadia. Dehan Melânia Fernandez.
Iha sorin seluk Fransisco Falo nu’udar cleaner ba Haris fatin publiku ne’e informa, Vizitante sira uza la ho konsiénsia no soe foer iha laran mak hodi sai intupidu.
“Kona-ba haris fatin hau mak hein iha ne’e vizitante sira mai, balun uza haris fatin la ho konsiénsia tanba haris fatin ne’e loke ba publiku no estadu mak selu, nune’e ema hotu bele asesu ba haris fatin ne’e, maibe, dalaruma estudante oan sira ne’ebe ba halo traballu ruma iha ne’ebá hanesan alin feto sira balun ba uza hela soe fali sasan sira iha ne’eba mak halo intupidu, no ami ba hamós mak foin hasai fali, tanba ne’e bainhira sira tama hau sempre avizu ba sira katak tama uza sasan sira hotu lori sai ba tau iha lixu fatin, haris fatin ne’e loke hahú husi dadersan tuku 8 to’o 5:30 lokraik , fatin tau foer mos iha no tisu sira mos iha laran, maibe, vizitante balun ba uza la komprende entaun so’e fali fo’er iha laran hodi halo intupidu iha ne’e,” Hakotu Fransisco.
Jornalista Estajiada : Romana Soares Salsinha
Editor : Luhamutu
