Dili, 30 Maio 2024 (Rcc)-Estudante Cornelio Kei Idade 21 ho Lorindo Marques Ximenes hadia Telefone iha Largo Lecidere hodi selu ba sira nia Eskola,Tanba Hanesan Joven Lakohi Tane Liman Beibeik ba Inan Aman no Familia sira.
Iha entervista ho Cornelio kei hateten, nia hakarak hadia telefone, tanba hakarak atu sustenta nia moris no haree ba nia eskola, nia hanesan joven ida lakohi husu bei-beik ba nia inan-aman,tan ne’e hakarak buka rasik osan, atu nune’e sosa saida de’it komforme nia hakarak.
“ Ema ida la motiva ha’u, maibe ha’u mak hakarak mai hadia telefone atu sustenta ha’u nia moris, tanba ita husu hela de’it mos la dun diak, entaun ha’u ba eskola, eskola sai ba kursu , kursu sai ha’u mai liu iha ne’e, tanba osan ita husu hela de’it ba ita nia inan aman mos la dun diak, entaun ha’u hakrak rasik buka osan atu gasta ba saida de’it mos konforme ita, nia hakarak, ne’e mak ha’u hili dalan ida ne’e hodi mai hadia telefone, kona-ba sasan sira ne’e ami nain hira mak tau osan hamutuk ami mak hola rasik, no ami hamutuk nain lima mak tau osan hamutuk hodi ba sosa ekipamentus sira, no maneira ne’ebé mak ami uza hodi dada kliente sira mak hanesan dadersan mai loke tiha hare’e ema balu tama iha ne’e ami bolu ema no ema hakarak mai entaun mai hadia, karik la mai mos ami pasensia hodi hein ema sira ne’ebé mak mai hadia telefone no ami iha ne’e mos barak demais, telefone ne’ebé mak ami hadia ne’e telefone saida de’it , maibe telefone ida ne’ebé mak nia sasan iha ne’e ami bele hadia, ida sasan la iha ami la bele hadia,kada telefone a’at ida ami hadia ne’e folin tun liu mak dolar sanulu resin tolu, 13$ sae mak dolar sanulu resin haat 14$ ba leten, hadia telefone hanesan laiar ,bateria, tombol, chas fatin, ne’e ami hadia folin diferensia, kada loron ita moos haree ema mai barak entaun ita hetan osan mos barak, maibe, ema mai oituan osan mos lao tuir ida ne’e dalaruma ami hetan de’it $10 dolares, osan ne’ebé mak ami hetan ne’e ami tau hamutuk tiha barak tiha mak ami foin fahe, osan ida agora ne’e ami sei rai tinan oin mak ami foin fahe”,dehan Cornelio iha largo lecidere dili.
Nia mos akresenta tan kona-ba Problema ne’ebé nia sempre hasoru mak hanesan konsumidór sira lori telefone mai hadia tiha ba, dalaruma la di’ak sira lori fali mai sira hadia fila fali de’it, maibe nafatin pasensia hodi hala’o sira nia atividade ida ne’e
“Problema ne’e sempre akontese mai ami, no baibain ema dehan loron ida ita triste no loron ida fali ita kontenti, tanba hanesan konsumidór sira lori telefone mai ami hadia tiha sira lori tiha ba uma mak la di’ak entaun sira lori fali mai ami hadia fila fali, dalaruma mos ami halo a’at tiha ema nia telefone ida ne’e mak sai hanesan problema ida mai ami, no ami fo garansia ba sira loron tolu, maibe liu loron tolu mak sira lori fali mai ami husu sira hodi aumenta osan ami hadia fila fali, karik iha loron tolu nia laran mak sira lori fali mai entaun ami foti ami nia laiar foun hodi troka fali la presiza fo tan osan mai ami ,maibe ami pasensia nafatin hodi hala’o ami nia atividade ida ne’e, no kona-ba fatin ne’ebé mak ami uza ne’e muda ba mai de’it fatin la’os permanente mai ami, ami hadia telefoni ne’e hahu husi tinan kotuk no kona-ba Esperensia ne’ebé mak ha’u iha ne’e hetan husi kolega sira no mos ami akompaña husi youtube, hodi ami mos sai hatene.”nia informa.
Nia mos fo mensajen ba nia maluk joven sira katak, karik halimar de’it bele buka servisu saida de’it mak ita bele
“Ha’u nia mensajen mak hanesan husu ba maluk joven sira hotu idade ne’ebé mak ita hanesan, karik halimar de’it bele buka servisu saida de’it mak ita bele hodi ita hetan netik osan, labele tane liman liu ba inan aman tane liman liu ba familia, tanba saida mak ita atu halo ne’e fó vantajen mai ita, hodi hetan osan ne’e ita hala’o de’it”, kei akresenta
Iha sorin seluk lorindo marques ximenes hateten, nia kolega sira mak fo motiva ba nia hodi hadia telefone, atu nune’e hetan osan oituan hodi selu bemo no foto kopi.
“Relasiona ho hadia telefone ne’e Kolega sira balun mak motiva ha’u hodi hadia telefone, loro-loron ami ba kampus aula iha ami tuir, karik aula la iha ami mai fali iha ne’e hodi hadia telefone, ha’u hetan osan oituan hodi selu bemo, no mos foto kopi nian, sira seluk mos fa’an katupa lolos ami fa’an hamutuk, maibe, haree ba kolega sira barak loos mak sira fa’an hamutuk, entaun ha’u buka meus hodi hadia fali telefone, ami hadia telefone ne’e hahu husi tinan 2022 to’o mai agora, no fatin mak permanente iha largo lecidere, maibe di’ak ida ami muda ba mai, kona-ba telefone ne’ebé mak ami hadia ne’e ami nia rasik ami nain tolu ha’u nia kolega mak hadia hamutuk, entaun ami nain tolu tau osan hamutuk mak sosa material sira ne’e, uza ami nia osan rasik mak sosa hodi ami hadia fila -fali ba ema nia telefone, foufoun ami loke ne’e ami nia osan modal mak $30 dolares, ba dahuluk ami sosa uluk mak oben, maibe oben iha oin tolu mak hanesan oben loke telefone nia kulit ne’e ketak, oben sobu baut telefone nia mos ketak, oben ida tan mak telefone iphone nia mos ketak, no ami loke ne’e kada loron ami hetan osan $70 dolares lae $80 dolares, maibe agora tinan ida ne’e kada loron ami hetan de’it $20 dolares sae liu mak $ 30 dolares, iha tinan 2022-2023 diferentes ho tinan ida agora, osan ne’ebé ami hetan ne’e bazeia ba telfone nia modelu de’it hanesan android oppo,realme sira ne’e folin $15 dolares, maibe iphone sira ne’e $20 dolares ba leten, osan ne’ebé mak durante ami nain tolu hetan ne’e ami nia la fahe ba malu, maibe ami nia rai ida ne’ebé mak presiza mak foin foti hodi uza de’it , no Problema ne’ebé ami hasoru mak dalaruma kliente sira mai hadia hatun fali folin ne’ebé mak ami fo ba sira hanesan $15 sira hatun fali ba $10 dolares, dalaruma mos ami tur iha ne’e loron ida tomak mos ema la iha, fatin ida ne’e di’ak mai ami hodi tur, tanba fatin publiku di’ak ida ema mai barak ne’e ami mos hetan osan tuir ida ne’e maibe kona-ba konplitu ruama ne’e la iha Esperensia ne’e ha’u hetan husi kolega ida agora servisu iha timor plaza mak bolu ha’u hodi hanotin no ami rua hadia hamutuk ha’u sai hatene tiha mak ha’u loke fali ho kolega nain rua ne’ebé mak agora dadaun ami nain tolu hamutuk ne’e.” nia deklara
Nia mos fo mensajen ba joventude ne’ebé mak ho idade produtivu buka meius oinsa para hetan osan, labele aproveta de’it inan aman no ema seluk nia kosar ben, tanba joven ida ne’ebe forsa liman ain kompletu presiza tenki buka rasik
“ Mensajen ba joven sira katak joven ne’ebé mak idade produtivu idade hanesan ha’u di’ak liu ita buka meius oinsa para hetan osan, loron ida mak hetan dolar ida,$1 ka dolar rua $2 ne’e moos di’ak ona, tanba ita tur halimar loron ida tomak ita ba hemu tua buka problema ne’e la diak, no a’at liu tan mak ita halo asaun ne’ebé mak la dun monu ba ema seluk nia laran, tanba joven sira agora barak mak sei idade produtivu forsa hela lakohi buka rasik, maibe hakarak aproveta de’it inan aman ou apreveita de’it ema seluk nia kosar ben, tanba ita joven ida ita forsa liman ain kompletu presiza tenki buka rasik, ema ho kondisaun difisente de’it sei bele buka rasik hodi sustenta nia moris tanbasa ita liman ho ain kompletu la bele buka rasik.” nia hakotu
Jornalista Estajiada :Agostinha Soares da Costa
Editor : Luhamutu
