Dili, 06 junu 2024 (RCC)-Vendedór Ai-Leba Adão Soares Ximenes ho Francisco Tomas Fa’an Sabraka ho Bani-Been iha Dalan Ninin Hodi Buka Osan ba Sustenta Nesesidade Uma Laran Nian.
Iha entrevista ho Adão Soares Ximenes hateten ba jornalista RCC katak, tanba inan aman laiha kbi’it hodi selu nia eskola ho nune’e nia deside hapara nia eskola no sai ai-leba hodi fa’an sabraka.
“Esforsu ne’e husi ita nia inan aman, se karik sira kbi’it la to’o atu selu ita oan nia eskola, no se ita eskola mak para iha dalan klaran de’it mós ladun di’ak, entaun ho sentimentu ida ne’e mak ha’u sai eskola hodi deside sai ai-leba hodi buka osan ajuda inan aman no ha’u hahu fa’an iha tinan 2024, no sabraka ne’ebé mak ha’u fa’an ne’e ha’u nian rasik, ha’u ku’u iha munisipiu mak mai fa’an iha ne’e no loron ida hetan rendimentu $.40 ka $. 50 dolar no ha’u leba sabraka lao husi Largo mai jardin no to’o mai iha Pateo, no osan husi fa’an sabraka ne’e ha’u rai hamutuk hodi ajuda inan aman, no sustenta ba nesesidade uma laran nian.” Dehan Adão iha nia fatin, Pateo.
Iha sorin seluk vendedór ai-leba Francisco Tomas informa, ekonomia uma laran obriga nia tenki leba bani-been hodi buka osan.
“Tanba ekonómia mak obrigada ho nune’e ha’u deside leba bani-been, se karik agora mak ita la halo hanesan ne’e, ita atu husu ba se, no ita atu tane liman ba estadu mós ladun di’ak, entaun di’ak liu ho ita nia moris ida hanesan ne’e, karik ita eskola entaun ita bele eskola no karik ita la eskola, entaun ita leba hanesan ne’e de’it, no iha tinan 2008 ha’u moris ho ai-leba to’o mai agora, no bani-been ne’ebé ha’u fa’an ne’e ha’u nian rasik, tanba ha’u nia katuas sira mak koa iha foho no haruka mai ha’u fa’an iha ne’e no bani-been agua ida $.5 dolar no botir ida $.10 dolar, loron ida karik ita lori sai husi uma $.50 dolar, maizumenus ema sosa $.30 ka $.20 dolar de’it.” Tomas informa.
Vendedór ne’e akresenta tan katak, rendimentu ne’ebé nia hetan husi fa’an bani-been uza ba nesesidade uma laran no ajuda ba alin sira ne’ebé eskola nia presiza.
“Durante ne’e ha’u leba bani-been lao haleu ba-mai, karik oras to’o ona, entaun ha’u tenki mai iha ne’e tanba besik, durante ne’e ha’u fa’an iha Elemloi, Timor Plaza no iha Pateo, tanba ema husi fatin hotu-hotu hatene katak, bani-been iha ne’e mak iha, entaun ema mai hotu iha ne’e hodi sosa bani-been no rendimentu hirak ne’ebé ha’u hetan husi bani-been refere, balun uza ba nesesidade uma laran nian no balun uza ba alin sira ne’ebé mak eskola nia presiza, hanesan kadernu no lapizeira, no ami fa’an iha ne’e ha’u senti di’ak tanba ema ho kareta barak mak mai sosa, se karik ema balun ne’ebé presiza hotu ona, entaun sira sempre mai sosa iha ne’e, no ami fa’an iha ne’e haree ba oras de’it, karik oras to’o ona entaun parte jestaun merkadu sira dehan labele fa’an entaun ami la fa’an ona, no ami fa’an iha ne’e to’o tuku ne’en lokraik de’it, loro-loron ami sai husi uma tuku 08:00 dader no fila ba uma tuku ne’en lokraik, no durante loron tomak ne’e ha’u la fila ba uma, hau iha dalan de’it.” Nia akresenta.
Tomas mós rekomenda ba joven sira katak, nu’udar joven labele na’ok ema nia sasan, maibé sai ai-leba hodi buka osan ba ita nia presiza.
“Ha’u nia mensazen ba joven sira ne’ebé mak ita haree viral iha media sosial, karik ita naok hanesan joven ida ne’ebé ita haree iha media social ne’e, halo moe ita nia dignidade, entaun di’ak liu mak ita leba hodi buka osan, ne’e importante tebes, tanba se karik ita naok no hadaua ema nia sasan mak labele, entaun ita leba hanesan ne’e hodi hadia ita nia moris, maske ita laiha servisu maibe ita tenki leba hodi buka osan.” Tomas hakotu.
Jornalista estajiada : Adelia Mendonça
Editor : Luhamutu
