Dili, 06 Juñu 2024 (RCC)-Relasiona ho problema ne’ebé Protokolu Presidente RAEOA Impede membru jornalista ida atu labele halo kobertura iha RAEOA, Asosiasaun Jornalista Timor–lorosa’e hato’o lamentasaun
Iha komunikandu ne’e porta voz Acasio Pinto hateten, media no jornalista presiza livre atu hala’o sira nia serbisu iha fatin ne’ebé de’it, liu-liu iha espasu públiku hanesan instituisaun estadu nian.
“Iha rezime sistema politika demokrasia, iha ambitu liberdade imprensa nian, media no jornalista presiza livre atu hala’o sira ninia serbisu iha fatin ne’ebé de’it, liu-liu iha espasu públiku hanesan instituisaun estadu nian, iha kontekstu ida-ne’e presizamente tenke iha garantia ida husi aparellu estadu atu media no jornalista sira livremente halo kobertura ba asuntu no informasaun ne’ebé iha ligasaun ho servisu públiku nian, sein impedimentu. Expasu livre no liberdade asesu ba informasaun media no jornalista nian hatur kedas ona iha konstituisaun RDTL Artigo 40 no 41 Garantia liberdade imprensa ne’e mós haktur iha Lei 8 no artigu sira seluk lei komunikasau sosial nian tanba ne’e atu proteje kualidade demokrasia demokrasia iha Timor-Leste iha kontestu garante boa governasaun no kontabilidade, media no jornalista sira hola papel importante atu asegura sidadaun sira nia direitu espresaun nian no sira nia direitu ba informasaun liu husi kobertura no publikasaun notisia no programa sira media nian, ho nune’e entidade sira hotu iha obrigasaun atu fó espasu livre ba jornalista sira atu asesu ba informasaun sira ne’ebé iha ligasaun ho servisu públiku nian tamba liberdade imprensa mak sai espasu ba sidadaun sira atu hato’o sira nia hanoin no komentariu hodi hakonu prinsipiu chack and balance ba servisu hotu-hotu entidade estadu nian.” Dehan Acasio iha sala komferensia AJTL Fatuhada, Dili.
Portavoz nee mós informa tan katak aktu violente protokolu RAEOA nian hasoru jornalista ajensia tatoli Abilio Ello Nini iha 4 de juñu 2024 nu’udar tentativa no ameasa ida ba indepedensia jornalismu no liberdade imprensa iha timor-leste
“Tamba ne’e Asosiasaun Jornalista Timor Lorosa’e ne’ebé durante ne’e halo advokasia hodi promove no hametin liberdade imprensa no liberdade espresaun iha país demokratiku ida ne’e haree kata aktu violente protokolu RAEOA nian hasoru jornalista ajensia notisioza tatoli Abilio Ello nini iha 4 de junhu 2024 nu’udar tentativa no ameasa ida ba indepedensia jornalismu no liverdade imprensa iha timor leste hanesan hatuur iha konstituisaun RDTL Artigo 40 no 41 no lei komunikasaun sosial nian iha artigu 41kona-ba atentadu ba liberdade imformasaun, aktu violente hasoru jornalista tatoli ne’e hakanek ona liberdade imprensa no valor demokrasia iha timor-leste iha tempu ne’ebé timor-leste nia index ranking liberdade imprensa iha tinan tun husi top 10 ba top 20 AJTL haree katak aktu violentu sira ne’e sei afeta index ranking liberdade iha tinan sira tuir mai, bazeia ba faktus no situasaun ne’ebé temi iha leten ajtl hakarak hato‘o nia pozisaun hanesan tuir mai AJTL kontra no kondena aktu violente hasoru jornalista tatoli ne’ebe komete husi pessoal protokolu iresponsavel RAEOA tamba aktu violente ne’e sei hatauk jornalista no media atu iha kontextu kobertura no publikasaun notisia liuliu atu garante papel media kontrolu sosial, no AJTL mós konsidera aktu violente ida ne’e la hatudu mentalidade demokratiku pessoal entidade sira estadu nian atu garante ba boa governasaun no kontabilidade iha país demokratiku timor-leste, maibé hatudu fali mentalidade vandalismu hodi impede media no jornalista atu asesu ba informasaun sira ne’ebé iha ligasaun no servisu públiku nian.”nia informa
Relasiona ho problema ne’ebé iha asosiasaun jornalista timor-lorosa’e (AJTL) husu mós ba presidente RAEOA no instituisaun relevante media sira nian, atu tau atensaun ba problema ne’ebé mak loron hirak liu ba membru jornalista ne’e hasoru iha RAEOA.
Ho pozisaun ida ne’e AJTL husu ba presidente RAEOA sr Rogerio Tiago Lobato atu foti medida no sansaun forte hasoru pesoal protokolu ne’ebé halo aktu violentu hasoru jornalista tatoli iha espasu públiku iha Oecusse Ambeno, no husu mós ba SECOMS atu komunika ho instituisaun estadu nian atu respeita media no jornalista sira nia servisu, no kolabora atu sira livremente asesu ba públiku hotu-hotu iha asesu informasaun sein iha impedimentu, ba konsellu imprensa no asosiasaun jornalista sira hotu, atu kontinua sosializa komunikasaun sosial ba entidade sira ne’ebe estadu nian liu-liu entidade estadu RAEOA nian, atu sira komprende papel media no jornalista nian iha nasaun demokratiku ida ne’e, no husu mós ba media no kanal hotu-hotu iha rai-laran atu fo solidariedade ba malu hodi kontinua publika kazu ne’e hodi hetan solusaun lolos no justu, jornalista no kanal media sira hotu atu nafatin kumpri kodigu etika jornalistika, lei komunikasaun sosial nian, no prinsipiu sira jornalismu nian, bainhira hala’o kna’ar jornalismu iha ne’ebé de’it atu nafatin asegura no garante liberdade imprensa no liberdade espresaun iha timor leste.
Jornalista : Sergio Borges
Editor: Luhamutu
