Dili, 06 Junhu 2024 (RCC)-Mario da Costa Baptista ho Idade 25 no José Monteiro Lopes ho Idade 21, Fa’an Sasan Uza Biskleta Hodi Selu Rasik Kursu no Responde ba Nesesidade Uma Laran.
Iha entervista ho Mario Da Costa Baptista hateten katak, nia fa’an sasan uza bisikleta ne’e di’ak tebes ba nia, tanba nia lori sasan ba mai entre Motael, Palasiu no Largo ema hola nia sasan ho di’ak.
“Ha’u fa’an sasan uza bisikleta senti di’ak tebes, tanba fa’an sigaru ho be’e ba mai ema hola di’ak oitoan ne’e mak hakarak fa’an be’e ho sigaru uza bisikleta tanba la dun kolen, sasan ne’ebé mak ha’u fa’an mak hanesan be’e sigaru pulsa no masker, fatin ne’ebé mak ha’u fa’an ne’e ha’u halai to’o largo palasiu no motael, ha’u fa’an durante tinan rua ba kotuk, no fa’an sasan hahu husi fa’an krupuk, batar funan, modal iha oitoan mak fa’an fali sigaru mak sosa rasik bisikleta, hodi fa’an fali be’e sigaru no masker pulsa la iha familia ida maka suporta ha’u hodi fa’an, maibé ha’u nia hakarak rasik mak ha’u fa’an no osan modal ne’e ha’u nia rasik, kada loron sorti di’ak hetan osan $6 dolar sorti la di’ak ne’e $3 dolar, osan ne’ebé maka ha’u hetan ne’e selu ba kursus, no sosa material sira ne’ebé mak uza ba kursus nia”, Dehan Mario iha dalan ninin, Palasiu Governu.
Negosiante ne’e husu ba joven sira ne’ebé maka la iha servisu, hakarak sai susesu entaun fa’an sasan ki’ik sira hodi hadia moris, lalika buka maka problema de’it.
“Husu ba maluk sira ne’ebé maka hakarak kria de’it problema, hakarak sai susesu liu husi bu’at ne’ebé ki’ik mak foin bele susesu laos ba liu susesu mak ba fali buat ne’ebé mak ki’ik, tanba dalaruma ita husi buat ne’ebé maka bo’ot ita monu mós hamrik la bele ita la bele haree buat kiik ne’e la vale maibé husi ki’ik bele halo valorize mai ita nia moris no ita nia futuru”, nia salienta.
Iha sorin seluk, vendedór bisikleta José Monteiro Lopes informa, fou-foun nia fa’an de’it sigaru nune’e rai osan hodi sosa rasik bisikleta hafoin nia fa’an tan sasan sira seluk. Vendedór ne’e mós, rekomenda ba joven sira ne’ebé mak buka problema, karik bele banati tuir saida mak sira halo hodi hadia moris, tanba mete problema funsaun laiha.
“Hakarak fa’an sasan uza bisikleta, tanba uluk fou-foun ne’e ha’u fa’an sigaru de’it, maibé kolega mós mai barak tan ne’e hanoin atu fa’an de’it sigaru mós la di’ak, entaun sosa bisikleta fa’an sigaru be’e no fore rai hodi lori lao, ha’u rasik mak hakarak atu fa’an sasan, sasan ne’ebé mak ha’u fa’an kada loron sorti di’ak hetan osan $50 dolares, no $60 dolares, sorti la di’ak maka hetan $30 dolare , sasan ne’ebé mak ha’u fa’an mak hanesan sigaru, pulsa, fore rai, be’e no masker, ha’u fa’an halai ba mai husi largo ho palacio de’it, Husu ba maluk joven sira agora dadaun balun buka maka problema halo baroilu dili laran bele karik haree tuir ami ne’ebé maka fa’an sasan ki’ik sira ne’e hodi ita buka ita nia moris, karik ita mete maka problema de’it mós funsaun ba ita la iha loron kalan mak problema han toba de’it ne’e la dun di’ak ba ita joven sira karik bele, karik iha hanoin iha bele mai fa’an sasan hanesan ami hodi ita hadia ita nia moris”, nia hakotu.
Jornalista estajiada : Agostinha Soares da Costa
Editor : Luhamutu
