Dili, 07 Junhu 2024 (RCC)-Inan Faluk Felipa Cornelio ho Estudante Joanita Maria Guterres Fa’an Kelu ho Kafé iha Dalan Ninin Kanpu Baru Hodi Hare’e ba Oan Sira nia Eskola no Selu Rasik Eskola.
Iha Entrevista Inan Faluk Felipa Cornelio hateten, nia hakrak fa’an kelu atu hare’e ba nia oan sira nia eskola, tanba ne’e merkadu kampu baru sai fatin ne’ebé maka di’ak ba nia hodi fa’an ninia produtu ne’ebé maka nia iha.
“Ha’u hakrak fa’an kelu tanba osan atu selu ba oan sira eskola la iha, tanba ne’e ha’u prontu hamri’ik iha dalan ninin kampun baru hodi fa’an ha’u nia produtu, fa’an kelu nee tinan barak ona, karik feira ruma iha ami ba fa’an iha ne’eba, se feira la iha ami loro-loron mai fa’an iha ne’e, kelu ne’ebé maka ami fa’an ne’e, ida ho folin 0,50 centavos, kada loron ami hetan osan sa’e liu mak hanesan $15 dolar, se lae hetan $10 dolar de’it, la’e tun liu ba $4 dolar $5 dolar , loron ida ne’e ami kesi kelu ne’e to’o $10 dolar nian maka hodi mai fa’an, tanba ne’e fatin ne’ebe ha’u fa’an senti di’ak mai ha’u, tanba ema barak entaun bele sosa ami nia kelu ida ne’e, ami fa’an iha ne’e jestaun merkadu sira la duni ami, tanba ami nia sasan ne’e la halo fo’er merkadu, ne’ebé sira la duni ami fa’an kelu ne’e”, dehan Felipa iha merkadu kampun baru.
Iha sorin Seluk Joanita Maria Guterres informa katak, nia hakarak fa’an sasan hanesan kafe white-koffee iha dalan ninin, hodi hetan osan atu selu mikrolete no sosa material eskola nian, no husu ba maluk estudante sira atu labele garantia de’it ba inan aman maibé buka rasik osan hodi senti realidade moris ne’e oinsa.
“Ha’u hakrak fa’an sasan tanba ha’u nudar estudante ne’e mak ha’u fa’an kafe ho white coffee sira ne’e hodi hetan osan atu bele selu mikrolete ba eskola no sosa rasik lapizeira kaderu,ida ne’e la’os ema seluk mak fó motiva mai ha’u, maibé ho hanoin rasik mak ha’u fa’an, no osan ne’ebé kada loron hetan mak hanesan $5 dolar no osan ne’ebé ami sosa ba sasan sira ne’e hanesan $2 dolar, ami hetan fali rendimentu $3 dolar. Ho nune’e ha’u husu ba maluk estudante sira seluk katak, ita la bele garantia los ba ita nia inan aman maibe aprende buka atu nune’e ita mos bele senti realidade moris ne’e oinsa”, Nia hakotu.
Jornalista Estajiada: Agostinha Soares Da Costa
Editor : Luhamutu
