24.9 C
Dili
Thursday, 25 July 2024
spot_img

Inan Faluk Fransisca ho Maria Nia Moris Depende De’it ba Fatuk no Ahu-Ruin

Díli, 19 Junu 2024 (RCC) – Tinan barak ona Inan faluk Fransisca Mesquita Ricardo Ho Idade 64 ho inan faluk Maria Soares Boavida ho idade 67 nafatin hili fatuk mutin no ahu-ruin iha Bidau Santana ba fa’an hodi sustenta ba moris lor-loron no mós ba oan sira eskola tanba laiha estadu atu tau matan ba sira.

Iha entrevista ho inan Fransisca Mesquita Ricardo hateten, tinan barak ona, nafatin halibur fatuk ba fa’an hodi uza ba presiza lor-loron tanba laiha servisu seluk atu halo.

Ami hili fatuk ne’e kleur ona, komesa iha tempu indonézia to’o agora,  uluk ami hili iha metiaut to’o 2006 ne’e maka ami muda fali mai iha bidau santana ne’e mos ha’u nafatin hili fatuk no ahu-ruin hodi fa’an tanba laiha servisu seluk ba ha’u atu halo hodi sustenta ba uma laran no hare’e mos ba oan sira nia eskola”, Dehan Fransisca.

Inan faluk Fransisca mos akresenta tan katak, fatuk ne’ebé nia hili kada karon ida nia folin depende ba ne’e bo’ot no ki’ik, maibé dalaruma ema sosa no dalaruma mos to’o fulan tomak ema la sosa.

“Fatuk ne’ebé ha’u fa’an kada karon ida depende ba fatuk bokar no lotu, fatuk bokar ne’e ami fa’an ba $2 de’it, ida lotuk ne’e maka ami fa’an ba $5, tanba ne’e, osan ne’ebe ami hetan husi folin fatuk nian ne’e maka ami bele uza mos ba matabisu lor-loron nian no mos fó ba oan sira hodi selu bemo ba eskola, tanba ha’u nia oan iha nain tolu maka sei eskola hela iha UNTL, ho nune’e ha’u nafatin esforsu a’an hodi buka osan liu husi hili fatuk no ahu-ruin ba fa’an atu bele hare’e ba sira nia eskola no mos presiza lor-loron nian tanba sira nia pai mate ona ne’e se maka atu tau matan tan mai ha’u ho oan sira, maibe fatuk ne’ebé ha’u fa’an hanesan sorti de’it mak ema mai hola, se la’e laiha liu to’o tiha fulan tomak mos ema la hola, to’o tempu ema atu  hola mak foin mai hola ne’e bele hola to’o rua-nulu, tolu-nulu bele mos to’o ha’at nulu hanesan ne’e‘, nia akresenta.

Aleinde ne’e inan faluk ne’e mós rekomenda ba Parte governu relasiona ho polítika governu nian ne’ebé atu taka hotu fatuk ne’ebé sira halibur hodi fa’an ne’e, maibé tenke hanoin mós sira.

“Ami rona governu atu taka hotu kona ba fatuk sira ne’e hodi hadia Estrada no halo Jardin tanba ne’e ami   rekomenda de’it ba governu katak, bele mai taka ba, maibe tente hanoin ami nia kolen, tanba ami ferik ona ne’e ami nia moris maka ida ne’e ona, agora se governu mai taka tiha ami atu halo tan servisu saida, se karik ami tur iha uma de’it entaun ami bele mate, atu estadu ka NGO ruma mak atu ka’er Estrada ne’e tesik mai, ami prontu, maibe tenke hanoin mos ami povu,’ informa Fransisca.

Iha fatin hanesan, inan faluk Maria Soares Boavida mos Informa tan katak nia laen kaben mate iha 2006, tanba ne’e inan faluk ne’e nia moris depende de’it ba fatuk ne’ebé nia halibur mak hodi tangung nia oan sira nia eskola no han hemu lor-loron nian.

Ha’u nia katuas-oan mate iha 2006, tanba ne’e hau nia moris ne’e depende de’it ba fatuk ne’e maka hodi tangung ha’u nia oan na’in lima ne’e no balu eskola balu la eskola tanba aman mate ona, laiha estadu ida atu tau matan mai ha’u atu halo netik uma ka dada netik be’e hodi ajuda ha’u ho oan sira to’o agora oan sira mos ida-idak iha keluarga ona, maibe ha’u sei esforsu nafatin hodi buka osan liu husi hili fatuk ba fa’an maske ha’u faluk no alizadu,  ha’u labele hein de’it oan sira maka atu fó han de’it ha’u tanba sira mos iha keluarga no oan barak ona ne’e hira mak sira hodi fó han sira nia oan no hira mak sira hodi fó han tan ha’u,  atu haruka oan sira ba buka servisu maibe ohin loron servisu laiha, hanesan ohin loron ita hotu hatene katak servisu ne’e ema uza sistema familia de’it, tanba halo de’it saluran sira ne’e mos ita nia oan atu ba ajuda ema dehan ema iha iha tiha ona,’ katak Maria.

Enkuantu, inan faluk Maria mós rekomenda ba governu katak, maske rai estadu nian ba maibé tenke hanoin  povu tanba povu nia moris mak hanesan ne’e  ona’, hakotu Maria.

Jornalista : Adelina Fátima

Editor: Luhamutu

Related Articles

- Advertisement -spot_img

Latest Articles

ARKIVU.
RCC.