24.9 C
Dili
Thursday, 25 July 2024
spot_img

La Tauk  no Moe Hamriik Iha Dalan Ninin Hodi Fa’an Sigaru

Dili, 19 Junho 2024 (RCC)_ Inan Feton Abelita Dorateia da Costa Pinto no Teresinha Gonsalves ho Fernanda Gomes deside faan sigaru iha estrada ibun tanba hodi selu eskola.

Iha intervista ho Abelita Dorateia ho idade 16 husi Munisípiu Viqueque no hela iha Raikotu haktuir ba jornalista RCC iha nia faan fatin estrada ibun Tasi-tolu katak, ajuda inan aman faan sigaru  tanba hodi  selu eskola.

“Ha’u mak hakarak ajuda ha’u nia mae tanba durante husi kiik too bot nunka ajufa no hare ema  seluk ajuda  faan iha estrada entaun ha’u mós  sente laran kaman atu ajuda duni. No osan sira ne’ebé ha’u hetan husi folin sigaru ne’e rai hodi uza ba eskola nune’e mós  hodi hola buat ne’ebé mak importante ba ha’u hanesan ha’u nia persija la bele naran hola tanba tur iha estrada tanba de’it atu eskola mak ha’u tur hodi faan sigaru,” hateten Abelita Dorateia.

Nia hatutan, rendementu ne’ebé nia hetan  kada loron  dólares 20 to’o dólares 30 maibé osan hira ne’e balun nia rai hodi uza ba eskola no balun hodi sosa fali sigaru hodi faan.

” Sigaru ne’ebé hau faan dala ruma ema sosa entaun  loron ida hetan dólares 20 no dólares  30 maibé kuandu ha’u hetan hanesan ne’e entaun balun ha’u tabung ketak hodi uza ba eskola no balun sigaru nia rai ketak hodi hola fali sigaru atu nune’e hau bele  faan nafatin,” dehan Abelita.

Tanba ne’e nia hato’o mensajem badak ba  joven sira katak apriende buka rasik ho kosar ben tanba inan aman la permanente ho ita.

“Hato’o mensajem ba maluk joven sira katak agradese tanba inan aman sei iha maibé keta haluha tanba inan aman moris ne’e la permanente ho ita tanba ne’e apriende hodi  buka rasik ho ita nia kosar ben de’it,”  katak Abelita.

Iha fatin hanesan inan Fernanda Gomes  ho idade 46 husi munisípiu Ermera  no hela iha Tasi -tolu hateten, faan sigaru iha estrada tanba atu selu oan sira nia eskola nunee mós hodi sustenta nesesidade uma laran. Maibé sente triste tanba dala ruma wali kota duni no hadau sasán ne’ebé sira fa’an.

“Faan sigaru iha estrada ninin hodi sustenta oan sira eskola han hemu loron kalan fó ba lia ami nia kultura mak ne’e. Pois ami faan iha estrada hanesan ne’e wali kota sira mai hasai  hotu ami nia sasán no hadau hotu maibé tanba moras mak obriga ami nafatin mai faan iha esrrada,”  haktuir inan Fernanda.

Nune’e mós nia esplika katak osan ne’ebé nia uza hodi sosa sigaru faan ne’e hetan impresta husi fundasaun moris rasik, maibé nia sosa sigaru faan dala ruma ema sosa no dala ruma lae tanba nee sente triste.

“No sigaru ne’ebé ha’u faan ne’e foti osan iha moris rasik mak hodi hola sigaru no faan, ha’u foti osan dolares 300 husi moris rasik no kada semana hatama dólares 13.05. Maibé ha’u sente triste tanba dalaruma ema hola no dala ruma mós la hola. No di’ak ida ema hola loron ida hetan dólares 10 no 20 de’it”. Dehan inan Fernanda.

Iha sorin seluk inan Teresinha Gonsalves husi munisípiu Ermera mós salienta katak,  atu selu oan sira nia eskola tanba ne’e mak deside hodi tur iha estrada ninin  hodi faan sigaru, maibé dala ruma loron ida hetan de’it dólares 5 too dólares 10 tan nune’e sira sente osan ne’e la sufisiente ba nia.

“Ami faan sigaru ne’e tanba ami nia oan eskola tanba ami  hodi selu ami nia oan eskola ne’e mak lorloron ami mai tur iha estrada ne’e faan sigaru. Maibé loron ida ami hetan dólar 5 no dólar 10 de’it no  osan sira  ne’e sente la sufisiente ba ami  tanba hanesan loron ida mak hetan dólar 10 mak oan sira husu tiha ba selu eskola entaun mak ne’e de’it ona.  Entaun ami hein fali loron aban hodi tur no nafatin faan mak hetan dólares 5 no dólares 10 ami sei uza hodi hola ai-han no balun rai hela hodi fo ba oan sira ba eskola,” katak inan Teresinha.

Nia mós esplika liu tan katak fatin ne’ebé sira uza hodi faan sente la seguru tanba dala ruma wali kota hadau  sira nia sasán ne’ebé sira fa’an. Tanba ne’e sira husu ba wali kota  karik sasán ne’ebé sira hadau bele lori ba soe iha Tibar maibé labele faan fali

“Ami faan iha estrada ninin sente la seguru tanba lor-loron wali kota sira mai duni no hasai tiha ami nia ai ne’ebé uza hodi faan sigaru ba ne’e,  pois ami nia ai ne’ebe sira hasai la lori ba Tibar ida maibé sira ba faan fali tanba ne’e ami husi ba.wa’i kota sira ai ne’ebé sira hasai ne’e lori ba soe iha Tibar  atu nune’e ami sente puas. Ne’e la’ós ba soe maibé hadau ami nia sasán hodi ba faan fali ba ami nia maluk mak hola fali tanba ne’e ami la puas. Maibé sira hadau  hanesan ne’ebé estadu laselu sira ne’e mak sira mai hasai ami nia sasán hodi gasta ba sira nia fulan nian ka.oinsa ami la hatene,” hakotu inan Teresinha.

Jornalista : Tonia Neto

Editor : Luhamutu

Related Articles

- Advertisement -spot_img

Latest Articles

ARKIVU.
RCC.