24.9 C
Dili
Thursday, 25 July 2024
spot_img

Vendedor  Merkadu Manleuana Ezije Ba Governu Toma Atensaun Ba Haris Fatin Públiku

Dili, 19 Junu 2024 (RCC)-Vendedor merkadu Manleuana ezije ba governo tenki tau atensaun ba haris fatin públiku ne’ebe sira utiliza la favorável tanba i’is maka’as no fó inpaktu ba negosiante  sira  ne’ebe  maka  fa’an  besik  iha fatin  refere nia saúde.

Iha intervista ho vendedora Ana Judit Maria Fereira iha merkadu Maleuana haktuir ba jornalista RCC katak, haris fatin públiku ne’ebe mak antes ne’e govenu  hari’i  tiha ona maibé la tau atensaun ba haris fatin ne’ebe intupidu no fo inpaktu ba negosiante sira ho nune’e iha tinan 2021 to’o mai agora  vendedor sira mak tau osan hamutuk hodi hasai foer hirak ne’e.

Haris fatin ne’e iha tinan 2021,ami tau hamutuk osan hodi ba ema nia kareta pribadi mak hasai sentina ne’ebé mak nakonu ona, estadu dehan fulan ne’en mai hasai fóer sira iha ne’eba, maibe to’o tia fulan ne’en liu mós, sira la hasai hodi halo intupidu to’o sentina sira ne’e a’at hotu kedas,  no ami tur iha ne’e ema tama barak entaun  nia iis maka’as fó impaktu ba ami sira  tur besik hodi fa’an sasan iha fatin ne’e, tanba merkadu Manleu ema barak liu komunidade mós ba iha haris fatin ne’e, no ami vendedor iha merkadu Manleu mós barak no komprador sira mós barak no ema tama sai hotu mak iha haris fatin ne’e de’it,entaun haris fatin intupidu hela hanesan ne’e defisil los ba ami atu uza”.

Ana Judit haktuir durante  merkadu loke laiha pessoál hamoos sentina públiku sira iha merkadu Manleuana ho nune’e vendedor sira mak ho inisiativa hodi hamo’os iha kada sexta-feira.

“Agora estadu atu hadia sentina diak liu selu mak diak atu nune’e ema hotu uza ho konsiensia, bainhira la selu mak ema hirak ne’ebé uza ne’e sei halo fóer liu tan fali, tanba iha   haris fatin laran presija hamós, durante  merkadu loke no haris fatin hirak ne’e sei diak, laiha ema ida mak servisu iha ne’eba espesial ba hamós haris fatin,bainhira atu hamós ne’e ami sira vendedores iha  merkadu laran mak sexta-sexta  hamós de’it”.

Vendedora Ana Judit salienta  dadaun ne’e governu hahú hadiak ona haris fatin balun iha merkadu Manleuana ho nune’e nia husu hafoin inagura haris fatin tau seguransa hodi hare’e atu nune’e garante haris fatin nafatin mós.

  Agora estadu haree no hadia ona balun, no sira  hadia hotu tau seguransa ona ,agora hadia hela ida iha kraik ne’e entaun ema hotu-hotu mai tama hotu iha ida ne’e no intupidu hela mós pasensia sira tama de’it ba tanba sira seluk sei hadia no governu seidauk inagura entaun labele tama lai ,ami iha merkadu manleu hanesan komunidade ida ami hakarak husu governu hadia haris fatin diak liu lalais atu tau seguransa ida iha ne’eba hodi hare no livre ba vendedor sira iha merkadu laran atu uza ho mo’os no bee mak importante liu,” dehan Ana Judit.

Iha fatin hanesan Marcelino da Silva Soares hateten, vendedores iha merkadu Manleu hasoru problema liu-liu ba iha haris fatin públiku tanba haris fatin hirak nee ho kondisaun  ne’ebé  la di’ak tanba nee sira husu ba governu bainhira hadia haris fatin nee tenke  tau seguransa  ruma hodi  nunee bele tau matan ba haris fatin refere.

Ami vendedores iha merkadu Manleu problema liu mak haris fatin,tanba haris fatin kondisaun ladiak depois ema barak no ema mai husi fóho iha ne’e tanba tama sai kahur malu no laiha seguransa ba iha haris fatin hirak ne’e hodi fó impaktu ba ami, tanba ne’e ami husu kuandu hadia ona tenki tau seguransa ruma iha ne’e hodi hare no organiza didiak haris fatin ne’e,se la tau seguransa mak ita nia maluk vendedor sira ne’ebé mai husi fóho bele estraga de’it haris fatin ne’e tanba sira la hatene hamós ida. Tanba durante iha ne’e ami vendedores merkadu manleu hasoru problema boot mak haris fatin de’it,haris fatin laiha seguransa no ema tama sai arbiru  dalaruma ami hare ladiak tanba ema barak liu ita labele kontrola,haris fatin iha ne’e haat maibé ho kondisaun a’at hotu, dalaruma iha ne’e ami transporte iha entaun ami ba fali uma hodi uza haris fatin tanba besik tinan 2 resin ona tanba kondisaun haris fatin la diak, dehan Marcelino da silva.

Relasiona ho preokupasaun vendedor sira nian Vise-Ministru, Ministériu Komérsiu no Industria, Nino Pereira sexta-feira ne’e tun direita ba  iha merkadu Manleuana hodi observa kondisaun fatin refere no diálogu no vendedores no mós rona informasaun husi ekipa Jestaun Merkadu hodi hadiak no reabilita fatin refere.

Vise-Ministru, Ministériu Komérsiu no Industria, Nino Pereira hateten, rekonese Problema ne’ebe maka Vendedór sira durante ne’e hasoru maka hanesan haris fatin, be’e no mos fatin ne’ebe la seguru ba sira.

“Sira ko’alia ona kona-ba haris fatin, kanalizasaun be’e, estasionamentu fatin ba para kareta no motor nian, tanba ne’e maka agora  hala’o hela, no ema hotu-hotu ezize dehan tenke lalais, maibe prosesu mak hanesan ne’e ona, tanba ne’e ami nafatin iha responsabilidade atu asegura katak oinsa mak projeitu rehabilitasaun ne’e bele la’o tuir nia tempu, importante maka ita bele rona malu, no husi parte jestaun merkadu ho vendedór sira atu bele organiza merkadu ne’e sai saudavel no seguru ba ema hotu-hotu”, hakotu  Nino Pereira.

Jornalista  : Adelina Fatima

Editor : Luhamutu

Related Articles

- Advertisement -spot_img

Latest Articles

ARKIVU.
RCC.