Díli, 24 Juñu 2024 (Rcc) – Semana Ne’e Autoridade Protesaun Sívil Rejista Tan Kazu Dezastre Hamutuk Uma Kain 23 No Hetan Estragus 19 Iha Munisípiu Hitu, Postu Administrativu 10.
Iha konferénsia imprensa ne’e, portavóz João de Sousa Filipe hateten, kada semana autoridade protesaun sívil atualiza dadus semanal hahú husi loron 17 to’o loron 23 ne’ebé hetan akontesimentu dezastre iha teritóriu laran
“Kada semana APC halo konferénsia imprensa hodi atualiza dadus semanal nian hahú husi loron 17 to’o loron 23 Juñu 2024, munisípiu ne’ebe maka hetan dezastre hamutuk munisipiu 7, akontesimentu iha postu administrativu 10, tanba ne’e tipu dezastre ne’be maka husi komandu autoridade protesaun sívil iha munisipiu 7 maka relata mai iha sentru operasional protesaun sívil nasional liu husi komandu ne’ebe rejistu kazu dezastre hamutuk uma kain 23,” dehan Joᾶo
Ho nune’e portavóz ne’e akresenta tan katak, uma kain ne’ebé maka hetan estragus hamutuk 19 no afetadu ba xefe família hamutuk atus-ida (100) husi munisípiu hitu.
“Uma ne’ebe mak hetan estragus hamutuk 19, numeru afetadu husi 19 ne’e mak afetadu ba xefe familia hamutuk atus ida , iha munisipiu sira hanesan tuir mai ne’e, munisipiu Atauru anin sobu uma kain rua, Ainaru ahi han uma kain ida, Baucau anin sobu uma kain ha’at no ahi han uma kain ida, Kovalima rai halai estragus uma kain tolu no ahi han uma ida, Ermera anin sobu uma kain ida no ahi han uma kain ida, Raeoa ahin han uma ida no anin sobu uma ida, Vikeke anin sobu uma kain ne’en no rai hali estraga uma ida, ne’e maka total estragus hamutuk uma kain 19,” nia akresenta.
Aleinde ne’e, portavóz João informa, autoridade protesaun sívil halo responde ona ba akontesimentu hirak ne’ebe hetan afetadu ba dezastre ne’e no nafatin halo kolaborasaun ho komandu autoridade sira ne’ebe kolokada iha munisípiu ida-idak hodi simu informasaun husi autoridade lokal sira
”Afetadu hamutuk 23, maibe , liu-husi komandu autoridade protesaun sivil responde ona ba akontesimentu ne’ebe maka iha no ekipa autoridade protesaun sivil ne’ebe kolokada iha munisípiu sira sempre atende 24 oras iha kada munisipiu no mos komandu operasional nasional nia ekipa tolu prontu atende 24 oras durante loron hitu , hodi simu informasaun. Tanba ne’e ekipa komandu apc halo atendimentu direitamente kuandu iha akontesimentu , maibé, ba dahuluk ekipa halo levantamentu, daruak halo verifikasaun, datoluk apoiu emerjénsia, da-ha’at mak foin halo verifikasaun hodi hatene lolós katak tama iha kategória ida ne’ebe los, tanba kategória iha tolu, a’at naton, a’at kaman no a’at total,” nia informa.
Enkuanru, dadus ne’ebe afetadu makas liu maka anin bo’ot, iha uma kain 14 ne’e, ligadu ba anin sobu , rai halai nian iha uma kain ha’at , uma kain tolu iha Kovalima no uma kain ida akontesimentu iha Vikeke ne’e mak liga ba tipu dezastre rai halai uma kain 4, ahi han uma no estragus sasan iha uma kain lima, Ainaru, Baukau, Kovalima , Ermera no Raeoa tanba ne husi numeru afetadu 23 ne’e mak hamutuk xefe família 100 no uma ne’ebe hetan estragus maka 19,” nia hakotu.
Jornalista : Adelina Fátima
Editor : Luhamutu
