24.9 C
Dili
Thursday, 25 July 2024
spot_img

Komunikadu Imprensa

Adidus Migrasaun hetan autorizasaun hodi emite vistus

Servisu Migrasaun Ministériu Interiór Repúblika Demokrátika Timor-Leste, ho kontente, anunsia delegasaun kompeténsia ba adidus migrasaun kolokadu iha reprezentasaun diplomátika Timor-Leste nian iha Singapura, Indonézia, Portugál, Xina, Malázia, Filipina no Austrália. Ne’e hanesan pasu importante ida ne’ebé ho objetivu atu simplifika no desentraliza prosesu emite vistus ne’e, nune’e bele promove efisiénsia ne’ebé boot iha kontrolu movimentu ema iha fronteira no hodi jere ema estranjeiru iha territóriu nasionál.

Hahú agora, adidus migrasaun iha nasaun sira ne’ebé temi iha leten iha kompeténsia hodi emite vistus ba serbisu, negósiu, hela termporáriu, estabelesimentu rezidénsia, tránzitu, turizmu no eskala aeroportuária. Medida ida ne’e foti tuir Lei Migrasaun no Azilu nian, ne’ebé refleta kompromisu governu hodi simplifika prosedimentu, hasa’e dezenvolvimentu ekonómiku no aumenta reseitas estadu.

Emisaun vistus sei tuir prosedimentu sira ne’ebé estabelese ona iha lejizlasaun relevante no sei vigora kedas hafoin publikasaun despaxu ne’e iha Journál Repúblika.

Dezenvolvimentu ne’e reprezenta momentu signifikativu ida iha polítika migrasaun nian, hodi ajuda hametin relasaun internasionál no fasilita investór estranjeiru tama, no mós atu hametin servisu ne’ebé oferese husi adidu migrasaun ne’ebé koloka ho misaun diplomátika nasionál, hodi hakbesik Servisu Migrasaun ba ema sira ne’ebé hakarak tama mai Timor-Leste.

Servisu Migrasaun Ministériu Interiór Timor-Leste reafirma kompromisu hodi promove migrasaun ne’ebé seguru, ordenadu no regulár, tuir prinsípiu soberania nasionál no respeitu ba direitu umanu. REMATA

Related Articles

- Advertisement -spot_img

Latest Articles

ARKIVU.
RCC.