24.9 C
Dili
Thursday, 25 July 2024
spot_img

Negosiante Fa’an Tua ho Walikota Hafuhu Malu Hanesan Fe’en ho La’en

Díli, 04 Jullu 2024 (RCC) – Elda de Orleans ho Júlio da Silva sente la hakmatek tanba Walikota sempre duni sira atu labele fa’an sasán iha área tasi-tolu.

Iha entrevista, Elda de Orleans, ho idade 38 hela iha tasi-tolu hateten, fatin ne’ebé nian fa’an tua sente la seguru tanba Walikota sempre ba duni hela de’it sira.

“Tua ne’ebé ha’u fa’an ne’e sosa tutan husi maubara mai, no  ami ba sosa iha  sira ne’e masa ida 2 dolar no ami fa’an fali 4 dolar, maibé, kuandu loron ida maka ema la hola entaun sei demora ba loron rua ka tolu mak foin hotu, karik walikota sira mai duni ami entaun ami pasénsia leba lori lao de’it no karik sira la mai duni ne’e ami nafatin fa’an iha ne’e maske fatin la seguru mai ami tanba Walikota sira sempre mai duni hela de’it,” Dehan Elda de Orleans.

Ho nune’e Elda de Orleans informa, osan ne’ebé sira uza hodi bisnis ne’e kréditu iha fundasaun moris rasik no kada semana tenke setor.

“Osan ne’ebé ami uza hodi sosa tua ne’e ami foti kréditu iha moris rasik, kada semana ami tenke  setor, karik ami la setor entaun ema bele mai lelan ami nia sasán iha  uma, tanba ne’e  ami tenke buka osan liu husi fa’an tua no bu’at seluk  hodi hetan osan,” ni informa.

Aleinde ne’e, nia akresenta tan katak, antes sira atu fa’an tua ka sasán sira seluk, sempre hare’e lai walikota sira mak foin  fa’an, karik walikota iha entaun sira la ba fa’an iha fatin refere.

“Ami halo tuir walikota sira tanba ema dehan lei Governu mak hanesan ne’e, no wainhira ami hafuhu walikota sira fila tiha maka ami mai fa’an fila fali iha ne’ebé ami fa’an sasán ka tua ba ne’e, karik walikota sira seidauk fila entaun ami nia sasán ka tua ne’ebé ami fa’an sei tau subar hela, maibé,  agora ita rona katak amu Papa atu mai ona ne’e maka walikota sira la duni ona ami, uluk ne’e lor-loron ami hafuhu malu lo’os, kuandu walikota sira mai ona ne’e ami tenke muda sés tiha, no ami hare’e sira fila tiha mak ami foin mai fa’an fila fali ami nia tua ho sasán sira seluk tanba tua mutin ne’ebé ami fa’an la liu husi loron rua ka tolu, karik liu  husi ne’e tua ne’e a’at ona no fakar de’it, ho nune’e ami sente triste,  ami fa’an hakmatek de’it karik di’ak, maibé, ema mai duni hela de’it hanesan ne’e, ami buka moris mak hanesan fa’an tua hodi selu oan sira nia eskola no hodi ba han hemu loron kalan nian, se karik governu la prepara fatin ba ami atu fa’an sasán hakmatek entaun ami nia moris ne’e atu husu tan ba se?, no osan iha ne’ebé maka ami atu fó ba oan sira nia eskola no uza ba han hemu loron kala nian,”  katak Elda.

liu husi biban ne’e, Elda de Orleans mós hakarak husu ba governu atu prepara fatin ba sira hodi buka moris ho hakmatek.

“Husu Governu karik hatene katak ami povu nia moris maka ida ne’e entaun tenke prepara fatin ida ba ami hodi buka moris hakmatek iha fatin ne’e, atu nune’e ami la bele halai ba halai mai tan,” nia dehan.

Iha fatin hanesan, Júlio da Silva ho idade 31 husi Munisípiu Aileu hela iha tasi-tolu informa tan katak, fa’an tua hodi fó ba oan sira nia eskola no uza ba han hemu lor-loron nian.

“Tanba moris maka tenke buka osan liu husi fa’an tua hodi uza ba han  hemu no fó ba oan sira ba eskola, tanba ne’e tua ne’ebé ami fa’an di’ak ida ema hola hotu, di’ak ema la hola tan no tua ne’ebé ami fa’an ne’e sosa husi Likisa ho folin masa ida 1,50 centavus no fa’an fali Akua bo’ot ida 1 dolar, maibé ami fa’an la hakmatek tanba Walikota duni hela de’it ami entaun ani hare’e walikota mai,  ami aruma lori fali ba uma, karik walikota la mai entaun ami nafatin fa’an tua iha ne’e,” Hakotu Júlio da Silva.

Jornalista : Adelina Fátima

Editór : Luhamutu

Related Articles

- Advertisement -spot_img

Latest Articles

ARKIVU.
RCC.