24.9 C
Dili
Thursday, 25 July 2024
spot_img

Negosiante Ki’ik Husu governu kria Fatin ba Sira hodi fa’an

Dili, 10 Jullo 2024 (RCC)-Negosiante Joao Soares Gonsalves ho  Cornelio Martins nudar negosiante Ki’ik ne’ebe buka Moris Liu husi fa’an iha dalan Ninin hakarak husu ba governu tenki kria Fatin ba Sira hodi nune’e bele buka Moris.

Iha intervista ho Negosiante Joao Soares gonsalves ho idade 50 husi munisipiu Ermera Hela iha Rai – kotu haktui katak, nudar negosiante ne’ebe buka moris hanesan fa’an gazolina iha dalan ninin Area Tasi -tolu nian,  tanba hodi susteneta ba nesesidade lor-loron nian nune’e mos hodi selu oan sira nia eskola.

“Ami hanesan negosiu ne’e ami buka hanesan fa’an oituan -oituan para ami hetan nia untung ka funan uza ba labarik sira eskola nune’e mos ba persija nesesidade lor-loron nian hanesan han hemu nian, maibé osan husi folin gazolina nian   ne’e la sufisiente tanba familia ne’e dala ruma barak no labarik sira eskola  no untung ne’e sente hanesan la favorese ba ita para atu uza hanesan nesesidade lor-loron nian”, dehan Joao Soares.

Nune’e mos Nia Konta katak bainhira fa’an gazolina iha dalan ninin sente la hakmatek tanba wali kota  sempre duni sira.

“Dala ruma hanesan governu wali kota sira mai duni tun  sae,  ami  sente la hakmatek no dalaruma bensin hanesan ne’e mos sira mai hadau tiha no koko sorte deit ami lori liu entaun dadersan mai fa’an fali no ema hadau entaun pasensia deit ona,” katak Joao Soares

Tanba ne’e Nia hakarak husu ba parte governu karik governu iha hanoin fo fatin ida  ba sira atui  bele buka moris hodi nune’e bele  selu  oan sira nia eskola.

“Governu sira ami fa’an iha ne’e laos fa’an permanente ne’e iha dalan ninin ne’ebe  fora husi protokolu trotoar leten ne’ebe  sei karik governu iha hanoin fo fatin ba ami buka oituan -oituan para sufisiente ba labarik Sira ba eskola. No ba trotoar leten nee governu Bandu tanba Fatin nee ba Ema Lao ain maibé Ami fa’an laos petmanente tanba lorokraik Ami sei ba Uma maibé petmanente Mak hanesan dada fali Lona Sira nee Mak dehan la kumpri Lei. Sei  ami hanesan povo ki’ik ne’e sei bele fo fatin ba ami fa’an, tanba ne’e  la petmanente to’o aban banirua, maibé

karik estadu dehan imi ba fatin ne’ebe ami prepara tiha ona fatin ne’e para imi atu fa’an, nee ami prontu para kopera ho governu ami bele fa’an iha ne’eb”, afirma Joao Soares.

Iha fatin hanesan,  Cornelio Martins ho idade 30  husi munisipiu Ermera   hela iha Rai kotu mos Informa katak, hakarak faan gazolina iha dalan Ninin tanba atu  susteneta ba moris lor-loron.

“Ami hakarak fa’an gazolina iha dalan ne’e ami hakarak fa’an no hetan rendementu oituan-oituan hodi susteneta moris lor-loron nian, ne’e mak ami hakarak fa’an iha estrada ibun ne’e. No gazolina ne’ebe ami fa’an ne’e sosa iha pertamina ami sosa iha ne’eba dala ruma balun iha dolares 1 centavos 20 no balun iha dolares 1 centavos 25 entaun mina ne’e fa’an folin la hanesan entaun ami buka ida ne’ebe mak hanesan folin  tun oituan para ami mai fa’an mos bele hetan netik oituan hodi uza ba persija lor-loron nian maibé dala ruma fa’an ladun hetan barak ida hetan oituan-oituan deit,” haktuir Cornelio  Martins.

Nia   esplika katak, bainhira fa’an iha dalan ninin sente triste  iha loron Segunda too Sexta  tanba saneamentu sempre duni sira tan nune’e sente la hakmatek fa’an iha loron refere.

“Dala ruma saniamentu sira tun mai dala ruma ami tristi ho sira ne’e, tanba dala ruma amu fa’an hela hanesan ne’e to’o tempu sira la mai ne’e sente kontente no tempu sira tun mai mak duni ami entaun ami tenki lori ba uma entaun ami dala ruma loron ida la hetan rendementu. Ne’e ami sente triste ami sente hanesan loron Segunda to’o Sexta ami fa’an la hakmatek tanba derepenti sira mosu mai ami foti  la biban ona entaun Sira hadau hotu.  so loron Sabadu Domingo sira ne’e ami bele fa’an ho hakmatek tanba sira la mai. Maibé, konta hanesan Segunda to’o Sexta fa’an sente hanesan la kontente tanba sira duni hela deit,” hateten Cornelio Martins.

Maske  nune’e maibé sira nafatin ho fuan bo’ot hodi tu’ur iha dalan ninin  nafatin buka motis  tanba bainhira la tu’ur iha dalan ninin mak ema sei la hola sasan ne’ebe sira fa’an. Tanba nee Sira husi ba parte governu prepara mos Fatin ba Sira.

“Sira duni hela deit  ami maibé sei  karik ami la tur hanesan ne’e  labele no ema sei la hola ami nia sasan, entaun ami nafatin obriga a’an hodi tur iha estrada ibun mak  ema tenke  hola dala ruma sira muda tiha ami ba fatin hanesan tama ba laran maibé iha laran ema fa’an sasan barak jadi balun iha oin balun iha kotuk entaun ema mai hola  ida ne’ebe iha oin no ida ne’ebe fa’an iha kotuk sei la hetan tanba ne’e ami obriga -an tenke mai fa’an iha estrada ibun atu nune’e ema  lao  ba mai no balun persija ne’e bele hola  sasan ne’ebe ami fa’an  nune’e mos ami nia hakarak governu prepare fatin oituan ba ami sira hanesan fa’an iha estrada ibun. Atu nune’e Ami bele fa’an ho hakmatek”  hakotu  Cornelio Martins.

Jornalista : Tonia Neto

Editor : Luhamutu

Related Articles

- Advertisement -spot_img

Latest Articles

ARKIVU.
RCC.