Díli, 09 Agustus 2024 (RCC) – Guarda Munisipal Kontinua Duni Vendedor Sira Ne’ebe Fa’an Sasan iha Estrada Ninin Merkadu Kampung Baru Hanesan Animal, Tanba Ne’e Vendedor sira Sente Triste Tanba Lai Iha Fatin Seguru ba Sira atu Buka Moris.
Iha entrevista Fernando Amaral Bello ho idade 42, husi munisipio Baucau hanesan vendedores iha merkadu Kampung baru, haktuir ba jornalista RCC iha fatin refere katak, estadu duni sira hanesan ne’e tenke prepara mós fatin ne’ebé seguru sira, (08/08/2024).
“Ami la’os dehan la kontribui ho estadu, maibé walikota duni ami ne’e problema estadu nian, estadu haruka ami tenki kolabora no tenki kumpri, maibé bainhira estadu hasai ami husi merkadu hanesan ne’e tenki prepara fatin ne’ebe seguru mai ami, atu nune’e ami ba fa’an mós ho diak, maibé, kuandu muda de’it hanesan ne’e lori ami ba fa’an husik hela ami iha fatin ne’eba no iha du’ut laran , rai-mamuk hanesan ne’e, entaun ami ba fa’an mós ema la tama hodi sosa ami nia sasan ida, tanba ne’e estadu tenki hanoin ami hodi haruka mós bemo hanesan 06,03 no 011 sira ne’e putar tama ba laran, atu ema komprador sira bele sosa ami nia sasan, maibé lori ami hanesan fahi ba husik hela iha ne’eba, to’o ikus ita nia sasan sira ne’e sai dodok hotu no agora duni ba duni mai hela deit hanesan ne’e, ami kumpri saida mak estadu haruka ami tenki halo tuir maibé estadu tenki prepara fatin ne’ebe seguru ba ami,” dehan Fernando Amaral.
Ho nune’e aman Fernando Amaral ho laran triste hodi informa tan katak, bainhira estadu duni sira hanesan ne’e, sé maka atu atende sira nia oan ba eskola no lori saida maka atu sosa fali ai-fuan hirak ne’e hodi fa’an fila fali.
“Tanba ami mós triste bainhira estadu duni hanesan ne’e ami la fa’an sasan, se mak atu atende ami nia oan sira nia eskola, no uma laran hahan laiha, tanba ami nia moris ida hanesan ne’e sosa buat hotu depende deit ba fa’an sasan sira hanesan ne’e, kuandu walikota foti hanesan ne’e ami lakon bo’ot, ai-fuan hirak ne’ebé ami fa’an maka Pateka, hudi no aifuan sira seluk, no aifuan hirak ne’e ami sosa karun, maibé walikota mai foti tiha hanesan ne’e ami laiha osan ona atu sosa fali,” informa Fernando Amaral.
Iha biban ne’e, aman Fernando Amaral mós hakarak relata ba parte governu katak, tenke prepara uluk fatin merkadu ne’ebé diak no mahon ba sira atu bele fa’an sasán ho hakmatek, atu nune’e maluk vendedor sira labele ba hadau malu fatin no dada lona arbiru hodi fó prezudika ba ema seluk lahetan fatin.
“Ami hakarak primeiru estadu tenki prepara uluk fatin merkadu ne’ebe diak, halo uma atu nune’e ami ba fa’an sasan iha fatin ne’ebe mahon, lae ami ba iha ne’eba ba dada lona hadau malu balun lori kalen ba dada arbiru to ikus halo tiha uma iha merkadu laran hodi prezudika fatin laiha ba ema seluk atu ba tan iha ne’eba, tanba ema ida ba uluk ne’e hari’i tiha uma ona, tanba ne’e husu estadu tenki hanoin didiak hodi hari merkadu ida ne’ebe diak ba sira pelumenus kuartu ida ou metru ida hanesan ne’e, maibé, bainhira estadu haruka de’it ba halo, entaun ema sira ne’ebe fa’an iha fatin kampung baru ne’e fatin laiha nafatin, akontese hanesan iha merkadu taibesi, estadu ba halo merkadu, vendedor sira mós ba halo tiha uma iha merkadu ne’ebá no estadu haruka dehan tama deit, entaun to’o ikus ema ba fatin laiha, tanba maluk sira ba uluk ne’e duni sai sira ida ba ikus ne’e, ho nune’e ema sira fila liman iha dalan ninin ne’e walikota duni no haruka sira fa’an hamutuk iha merkadu ne’ebá, maibé, fatin laiha pasiensia sira tenki tahan kabun hodi fa’an deit iha dalan ninin,” Fernando relata.
Iha fatin hanesan, inan Carlota da Conceiҫão ho idade 60 husi Munisipio Likisa nu’udar vendedora ne’ebé fa’an batar da’an iha dalan ninin kampung baru, akresenta tan katak, fa’an sasan iha fatin ne’e hare’e ba oras de’it tanba guarda municipal sempre duni hela deit sira.
“Ha’u nia moris mak hanesan ne’e, tanba servisu laiha ha’u fa’an batar da’an iha fatin ne’e, maibé, hare’e ba oras deit tanba walikota sira sempre mai duni hela deit ami, sira duni ami dalaruma ami foti ami nia sasan sira ne’e hamrik hodi halai do’ok tiha no sira liu tiha mak ami tau fali iha fatin ne’e hodi fa’an, tanba ami nia moris depende ba fa’an iha dalan ninin deit, karik ami la buka moris iha fatin ne’e ami atu husu ba se mak tau matan ba ami,” nia akresenta.
Aleinde ne’e inan Carlota hatutan tan katak, osan ne’ebé hetan husi fa’an batar ne’e la sufisiénte hodi sustenta ba uma laran tanba sira mai fa’an tuir oras de’it tanba ne’e dalaruma ema sosa hotu no dalaruma la hotu.
“Ha’u fa’an iha ne’e dalaruma ema sosa lae ema la sosa, no ema la sosa ha’u lori fali ba uma hodi fohan fali ba animal sira deit, tanba ne’e ha’u sente hanoin barak tanba osan la tama ,osan oituan ne’ebé ha’u hetan, hanesan iha uma ne’eba dalaruma oan sira fó fali 5 dolares ka 10 dolares, entaun ha’u tau hamutuk fali hodi sosa fali batar ba fila liman fali, osan sira ne’ebe ha’u hetan sente la sufisiente, tanba ha’u mai tu’ur iha ne’e lori oras deit hodi hadau osan oituan liu husi fa’an batar da’an ne’e, ha’u mai fa’an iha ne’e hanoin barak hanesan loron ohin ne’e ema hola kalae, no karik ema la hola ha’u tur hanoin barak los, tanba ne’e ha’u hakarak nai ulun sira bele ajuda ami hodi buka moris,” hakotu inanCarlota.
Jornalista : Romana Salsinha
Editor : Luhamutu
