Negosiante Kontinua Trauma ho Hahalok Guarda Munisípiu Díli

Díli, 09 Agustus 2024 (RCC) – Negosiante Kontinua Trauma Ho Hahalok Guarda Munisípiu Díli Tanba Sira Sempre Duni Negosiante Sira ba Mai, Maibe Laiha Fatin Ne’ebé Diak ba Negosiante Sira Hodi Buka Moris.

Iha entrevista ho Maulónio da Silva Pacheco ho idade 20, husi Munisípiu Manufahi, hela iha tasi-tolu haktuir ba Jornalista RCC iha fatin Ai-lok laran katak, problema ne’ebé nia hasoru mak hanesan sira sempre hadau malu fatin nomós guarda municipal sira sempre duni sira husi fatin ne’ebé sira fa’an modo, (09/08/2024).

“Durante ha’u fa’an iha ne’e, problema ne’ebé ha’u hasoru mak hanesan ami negósiante barak entaun ami sempre hadau malu fatin ne’ebé fa’an modo, no dalaruma ami fa’an iha ne’e guarda munisipal sira sempre mai duni ami atu labele fa’an iha fatin ne’e, maibé ami ho pasénsia hodi fa’an ami nia modo tanba moris mak hanesan ne’e ona, wainhira guarda municipal sira mai duni ami sente triste no hanoin barak lós,” dehan Maulónio.

Ho nune’e Maulónio  konta tan katak, tanba inan aman laiha kbi’it atu hodi selu oan sira ba eskola, tanba ne’e nia deside fa’an modo hodi selu alin sira nia eskola no uza ba nesesidade lor-loron nian.

“Buka osan atu selu alin sira nia eskola no sustenta ba neseidade uma laran, tanba ina-aman mós hela iha foho depende de’it ba to’os, osan ne’ebé ha’u uza hodi hola modo hodi fa’an fali ne’e ha’u nian rasik, no husi modo ne’ebé ha’u fa’an kada loron  hetan rendimentu 25 dollar  sela’e 20 dollar  de’it, tanba ne’e osan hirak ne’e ha’u sente sufisiénte ba ha’u atu fó ba alin sira nomós uza ba nesesidade lor-loron nian,” Maulónio akresenta.

Aleinde ne’e Maulónio mós hakarak rekomenda ba parte governu katak, tenke tau matan ba sira hodi kria merkadu ba sira hodi buka moris iha fatin ne’ebé seguru, tanba sira nia moris depende de’it ba fa’an modo.

“Estadu sira tenke tau matan mai ami ne’ebé moris depende de’it ba fa’an modo hodi hadia fatin merkadu mai ami atu nune’e ami bele fila liman iha fatin ne’ebé seguru, tanba atu depende de’it ba inan aman, maibé inan-aman mós depende de’it ba to’os mak hodi han hemu,” nia tatoli.

Iha sorin seluk, inan Alcina Soares ho idade 52, husi munisípiu Vikeke mós informa katak, fa’an hudi tuir dalan ninin de’it tanba fatin ne’ebe seguru ba sira atu buka osan laiha no guarda municipal sempre duni hela de’it sira.

“Ha’u hakarak fa’an hudi iha dalan ninin tanba ami lori ba fatin merkadu kampung baru guarda munisipal sempre duni hela de’it ami tanba ne’e ami fa’an iha Estrada ninin hanesan ne’e to’o oras ida ka rua ami ba fa’an fali iha sorin merkadu kampung baru, maibé, ami atu ba fa’an iha ne’eba,  ami sei hein to’o guarda munisipal sira  fila tiha mak ami foin ba fa’an fali iha ne’eba no iha merkadu ne’ebá mós fatin seguru mai ami laiha, fatin hanesan para gerobak de’it maka iha,” Dehan inan Alcina.

Iha biban ne’e, Inan Alcina konta tan katak, sira nia moris depende de’it ba to’os desde tempu uluk to’o agora, tanba ne’e hudi ne’ebe nia fa’an sira nian rasik mak lori mai fa’an hodi selu oan sira nia Eskola no uza ba presíza lor-loron, maske osan hirak ne’ebe hetan husi fa’an hudi ne’e la sufisiénte.

“Tempu uluk 1975 ne’e ami halo to’os tiha ona, tanba ne’e to’o agora ami nia moris depende de’it ba halo to’os, ho nune’e hudi ne’ebé ami fa’an, ami nian rasik mak ami tesi to’o gerobak nakonu no lori mai fa’an, kada loron ami hetan dolar 25 ka dolar 30 hanesan ne’e de’it, no osan sira ne’e ami uza hodi selu oan sira nia eskola mós la to’o, maibé ami nafatin esforsu a’an hodi mai buka  osan hanesan ne’e de’it,” hakotu inan Acina.

Jornalista : Adelina Fátima

Editór : Luhamutu