Dili, 14 Agusto 2024 (Rcc)- Organizasaun Sosiál Forum Justisa Popular Hala’o Komunikadu Imprensa Relasiona Ho Asedu Seksual Ne’ebé Akontese Iha Kampus Unpaz Iha Loron 30 Fulan Jullu Tinan 2024.
Iha Komunikadu Portavóz Martinho Burak Lebo Hateten, maka’er poder sira iha instituisaun estadu nian ba to’o manorin nain sira iha espasu akadémiku sai fali espasu ba haki’ak predator seksuál.
“Solidariedade ba Vitima Asédiu Seksual iha Kampus ne’ebe akontese iha fulan-hirak ikus ne’e, mosu infrasaun ho natureza seksuál iha espasu públiku sira hosi maka’er poder sira instituisaun estadu nian ba to’o manorin sira iha espasu akadémiku sai fali espasu ba haki’ak predator seksuál sira, Hanesan haktuir iha notisia ne’ebé publika iha jornal INDEPENDENTE ne’ebé fó sai iha loron 1 fulan Agusto tinan 2024 liu bá Estudante ida Keixa Dosente ho insial DT ne’ebé kaer nia isin-lulik, Asaun ida-ne’e akontese, bainhira Fana husu atu halo orientasaun nia monografia, ne’ebé ikus mai rezulta asaun ho natureza seksual hosi nia dosante orientador ho inisial DT nu’udar dosente ida iha Fakuldade Direitu Universidade da Paz (UNPAZ) no mos kna’ar seluk hanesan Juiz iha Tribunál Rekursu, infrasaun ho natureza seksual sempre akontese fila-fila hosi ema mak iha poder (tantu podér simbóliku, ekonómiku ka kulturál) hasoru ema mak iha podér, liuliu iha ambiente kampus nian, dala barak tebes asaun sira akontese iha relasaun podér, la fasil vitima ida manán iha justisa no sempre lori vitima hetan presaun psikolojika maka’as liu. Hateten portavoz
Nia informa tan katak husu ba Reitor no nia estrutura sira iha Instituisaun Akadémika sira lha Timor-Leste atu labele promove predator seksual iha kampus no Estrutura Universidade da Paz atu akompaña no foti pozisaun hamutuk ho estudante ne’ebé sai vítima iha kampus refere hodi hetan justisa loloos
“Tanba ne’e, haree ba aktu hirak ne’e, ami hosi Forum Justisa Popular (FJP), vítima no kondena aktu imorál hirak ne’ebé akontese fila fila iha fatin públiku no liuliu iha espasu akadémiku hanesan kampus sira aktu hirak ne’e viola dignidade umana, hatuun kredibilidade Instituisaun Akadémika, halo sosiedade lakon fiar ba instituisaun akadémika inklui influensia ba degradasaun manorin-sira nian no viola lei funsaun públika no mós prinsipiu estadu direitu demokratiku ne’ebé konsagra ona iha Konstituisaun RDTL, ita hatene Kampus nu’udar espasu ba diálogu, produsaun siénsia, filozofia, étika no, verdade no justisa, la ós espasu ba prodús predator seksual, husu ba Estrutura Universidade da Paz atu akompaña no foti pozisaun hamutuk ho estudante ne’ebé sai vítima ba kazu ne’ebé mak vitima hetan hodi prosesa kazu hirak ne’e to’o hetan justisa loloos ba vítima no husu mós ba reitor no nia estrutura sira iha Instituisaun Akadémika sira lha Timor-Leste atu labele promove predator seksual iha kampus no karik deskobre hetan infrasaun sira ho natureza seksual mak komete hosi manorin-na’in sira, di’ak liu demiti hosi nia knaar nu’udar edukadór no husu ba instituisaun akadémika iha timor-leste, atu instala sistema no politika kampus nian hodi harii no promove kampus seguru no halo prevensaun ba infrasaun ho natureza seksual sira nune’e mós husu ba Instituisaun Públiku hirak mak kontrata hela servisu ba suspeitu DT atu demiti hosi servisu fatin hodi nune’e kazu mak hanesan labele akontese tan hosi ema mak hanesan iha fatin seluk; Husu ba Públiku atu tau atensaun maka’as ba predator seksuál sira ne’ebé sempre hato’o naran kampus nian no predator seksual seluk ne’ebé halo asaun fora hosi kampus no karik hetan hato’o keixa ba instituisaun relevante sira hodi prosesa tuir dalan legal, husu ba Tribunál Rekursu no parte sira ne’ebe tau matan ba kualidade Justisa iha Timor-Leste atu foti desizaun hasoru predator seksual sira iha área Tribunál. Ita labele husik predatör seksual sé de’it hela tha área Tribunál, tanba bele fo risku ba parte nakait ne’ebé buka justisa loloos no husu ba parte Kampus, liuliu fakuldade direitu atu hapara DT hosi kna’ar dosente, tanbá DT ne’ebé diskonfia komete asédiu seksuāl hasoru estudante la iha lejitimidade morál atu ko’alia kona-ba justisa tamba ne’e SFJ Husu ba Universidade sira atu hapara Predator seksuál se de’it iha Fakuldade Direitu hotu. Predator seksual laiha integridade moral atu hala’o knaar iha Fakuldade direitu hodi prepara futuru Juíz, Prokuradór no advogadu ne’ebe iha morál direitu laiha morál bele nakfilak sai monster ne’ebé fo ameasa ba sé de’it”. Nia Hakotu
Jornalista : Florentina Bianco
Editor: Luhamutu
