Díli, 20 Agustus 2024 (Rcc) – Forum Komunikasaun Feto Timor-Leste (FOKUPERS) Koordena Maka’as Asaun Violensia Hasoru Feto, Tanba Ne’e Sira Ezije Autoridade Kompotentes Atu Lori Kriminozu Sira ba Justisa.
Iha komunikadu imprensa , Diretora Interina Fokupers, Natalia de Jesus Cesaltino haktuir ba jornalista sira fatin refere farol Díli katak, Fokupers mai ho nia vizaun katak, Feto timor-leste moris ho dame iha uma laran no komunidade hodi respeita igualdade jéneru ho misaun hapara violensia, (20/08/2024).
“Fokupers mai ho nia vizaun katak, Feto timor-leste moris ho dame iha uma laran komunidade no nasaun unidade hodi respeita igualdade jéneru ho misaun hapara violensia hahú husi nível individu uma laran to’o nível instituisional nian liuhusi movimentu hodi hakbi’it feto iha aspektu hotu-hotu ho servisu intergradu. Nune’e feto ho mane iha konsistensia kompriensaun no kapasidade atu sai husi problema injustisa no dezigualidade jéneru. Tanba ne’e fokupers mós iha papél importante ida ba sosiedade hodi hare’e kona-ba violénsia doméstika ne’ebe akontese iha Timor-Leste no oinsa maka bele halo prevensaun iha nível komunidade, família no sosiedade sira, liu-liu atu asegura feto no labarik feto sira atu livre husi diskriminasaun hanesan asediu seksual, violasaun, torturasaun, lakon Liberdade no vida tanba violénsia,” dehan Diretora Interina Fokupers, Natalia De Jesus.
Aleinde ne’e nia informa tan katak, iha tinan hirak ikus ne’e fokupers ema hotu akompana iha media sosial sira relasiona ho aktu violensia hirak ne’e liu-liu ida akontese iha merkadu taibesi hodi sai hanesan atensaun públiku.
“Iha tinan hirak ikus ne’e fokupers no ita hotu akompana iha media sosial hanesan jornál, televizaun, facebook no seluk tan, notísia hirak ne’e hatudu katak, feto no labarik feto barak mak sai vítima hanesan aktu asediu seksual, violénsia físiku, violénsia psikolojiku, violénsia ekonómika no omesídiu agravadu no mós violensia sira seluk. Aktu hirak ne’e maka halo violasaun hasoru feto no labarik feto ne’ebe akontese iha munisípiu sira hanesan, Likisá, Baukau, Ainaro, Bobonaro (Batugade, Atabae, Kailaku), Same No Díli ( Bebonuk, Komoro, Raikotu) no ikus akontese tan iha Merkadu Taibesi ne’ebe sai atensaun ba públiku,” nia informa.
Ho nune’e Diretora Interina Fokupers, Natalia de Jesus aprezenta mós relatóriu iha tinan 2020 to’o 2022, ne’ebe kazu violénsia bazeia ba jéneru okupa fatin a’as liu entre 71% to’o 75% no husi total ne’ebe fokupers halo monitoriza iha tribunal hodi atinje ba 95%.
“Relatóriu organizasaun sosiedade sívil iha tinan 2022 hodi konfirma katak, entre tinan 2020 to’o 2022, kazu violénsia bazeia ba jéneru okupa fatin a’as liu entre 71% to’o 75% no husi total kazu ne’ebé ne’ebe JSMP monitoriza iha tribunal sira, fokupers rejista mós 95% sobrevivente violénsia domestika no maioria hela iha uma mahon fokupers, tanba tauk la seguru no trauma. Faktu ne’e hatudu katak, violénsia bazeia ba jéneru reprezenta persentajem bo’ot liu iha Sistema justisa formál Timor nian, maibé to’o ohin loron ita nia instituisaun estadu, partikularmente setor justisa sira la hatudu esforsu no la halo ezersísiu ho vizaun instituisional ida kalru hodi responde ba realidade hirak ne’e ho nune’e Fokupers lamenta no koordena mak’as kona-ba aktu violénsia sira ne’e nu’udar siklu violénsia ne’ebé kontinua tanba implementasaun lei kontra violénsia domestika (LKVD) no. 7/2010 seidauk máximu mesmu iha polítika no isisiativa oi-oin maibé sie iha nível serimonial de’it, ho nune’e fokupers mós halo nia auto avaliasaun atu hadia di’ak liu tan fokupers nia prestasaun servisu prevensaun no responde ba violénsia hasoru feto no lbarik feto sira,” nia relata.
“Liu husi biban ne’e fokupers hakarak apela no ezije ba entidades no autoridades hotu hanesan, Parlamentu Nasional, Igreja Katólika, Organ Judisiáriu, Pntl,Sekretáriu Estadu Igualdade, Ministériu Xave Sira, Provedor Direitus Humanos No Justisa, Organizasaun Sosiedade Sivil, Lideransa Komunitáriu, Komunidade Sira Hotu No Mós Prezidente Repúblika atu bele hare’e no tau atensaun máximu ba aktu hirak ne’e,” hakotu Diretora Interina Fokupers, Natalia de Jesus.
Jornalista : Adelina Fátima
Editor : Luhamutu
