Dili, 27 Agosto 2024 (Rcc) – Governu Japaun Liu-husi UNDP Apoiu Orsamentu Miliaun 6 Média RTTL.EP hodi halo Konstrusaun ba Edifísiu Rttl,ep nian ho Andar 4.
Iha diskursu Sekretáriu Estadu Komunikasaun Sosiál, Expedito Loro Dias Ximenes hateten iha fatin Konsellu imprensa katak, orsanmentu ne’ebé governu Japaun apoiu, labele hare’e de’it ba edefiísiu RTTL,EP, maibé bele tau osan oituan hodi fó formasaun ba jornalista sira atu foka liu ba karakter investigativu nian, (27/08/2024).
“Serimónia ohin ne’e importante tebes ba konsellu imprensa tanba UNDP asina nota entendementu ho governu Japaun ne’ebé apoiu konstrusaun foun RTTL,EP nian ho andar 4, nune’e mós governu Japaun apoiu orsamentu milliaun 6 atu halo konstrusaun ne’e, hafoin governu Timor-Leste liu-husi Sekretáriu Estadu Komunikasaun Sosiál husu osan ne’ebé Japaun fo miliaun 6 ne’e labele ba hotu ba iha konstrusaun, maibé fó mós formasaun ba jornalista sira, tanba ne’e mak governu Japaun UNDP konkorda husi osan miliaun 6 ne’e atu bele tau osan uitoan ba formasaun jornalista sira, tanba ne’e mak governu liu–husi Secoms husu atu fó formasaun ba jornalista sira ne’e entrega ba iha konsellu imprensa, nune’e mak konsellu imprensa ohin halo asinatura ho MOU, ida ne’e parte ida ne’ebé governu konstituisional hakarak atu fó formasaun ba jornalista sira iha kordenasaun ho konsellu imprensa ne’e atu hatudu katak, formasaun ba jornalista sira importante no formasaun ne’ebé atu halo ne’e sei foku liu ba iha karakter investigativu no formasaun ne’ebé konsellu imprensa lidera sei halai liu ba iha oinsa formasaun ba kolega jornalista sira hotu, la‘os RTTL’EP nian de’it, ne’e konvensional, plataforma ne’ebé hakarak hafoin kordena ho konsellu imprensa, tanba ne’e agradese ba governu Japaun ne’ebé fo atensaun makas tebes ba iha dezenvolvimentu média iha Timor-leste, liu-liu fó apoiu miliaun 6 ba iha konstrusaun RTTL’EP, ne’ebé balun ita hasai ba iha formasaun kolega jornalista sira, ita mós agradese ba UNDP ne’ebé konstrusaun ida ne’e RTTL’EP governu Timor-leste atu bele ezekuta konstrusaun RTTL’EP ne’e ba iha UNDP mak ezekuta, prosesu la‘o dau–daun oras ne’e tama ona iha faze final no fulan setembru, agora sei halo anúnsia ba públiku hanesan konkursu públiku, se mak bele atu halo konstrusaun ne’e no konstrusaun RTTL’EP ne’e sei hotu iha 2026” Dehan Sekretariu Estadu Expedito Dias.
Aleinde ne’e, Sekretáriu Estadu sublina tan katak, la iha média demokrásia sei la la’o, tanba ne’e mak média iha Timor-Leste sai hanesan pilár importante ba iha dezenvolvimentu nasionál.
“Média Timor-leste hanesan mós Pilar importante ba demokrasia, pilar demokrásia katak, laiha média demokrásia mos la La‘o ho diak, tanba ne’e média importante tebes ba iha prosesu dezenvolvimentu nasional liu-liu oinsa mak hanesan Pilár ba demokrásia no oinsa mak ita bele sai ponte demokrásia ponte ba unidade nasionál ka ponte ba oinsa ita bele liga entre governu ho sidadaun hanesan ponte 2 ne’ebé liga ba malu, tanba ne’e ita presiza atu hadia nafatin ita nia kualidade intelektuál, kualidade professional, no kualidade tékniku ho kapasidade sira ne’e, ne’ebé husu ba kolega jornalista sira ita hotu akompaña agora povu sei kestiona hela kona-ba ita nia kualidade informasaun, tanba ne’e mak konsellu imprensa nia papél importante tebes oinsa mak bele haforsa formasaun ne’ebé halai liu ba iha investigativu nian, ne’ebé ha‘u hanoin katak asina akordu ohin ne’e, konsellu imprensa sei hala’o nia Kna’ar bo‘ot liu tan atu bele prepara modul ne’ebé di’ak liu ba iha formasaun iha tempu oin mai” Tenik Espedito Dias.
Iha fatin hanesan Prezidente Konsellu Imprensa, Otelio Ote informa konsellu imprensa asina akordu ho UNDP atu fo formasaun ba jornalista sira kona-ba Debate públiku no jornalismu ambiental tanba formasaun ne’e importante ba jornalista sira atu konsentra ba iha asuntu ambiente nian.
“Hanesan ita bo‘ot sira aziste ohin konsellu imprensa selebra momorandu of understanding ho UNDP kona-ba formasaun ho asuntu rua, formasaun kona-ba jornalizmu ambiental no debate públiku, formasaun journalizmu ambiental sei halo ba jornalista sira kuaze ema nain 150 sei fahe ba klase hirak tuir oráriu ne’ebé mak sira halo, formasaun ba debate públiku sei halo mós ba komunidade média sira ikus mai sei iha teste debate no bele hatudu sira nia debate iha TVet, ida ne’e formasaun ida ne’ebé importante tebes hanesan ohin ha’u dehan katak tinan ida ne’e ita konsentra duni ba jornalismu ambiental atu jornalista sira hatene kona-ba oinsa mak sai jornalista ida iha asuntu ambiente, formasaun ne’e sei halo dala 3 iha tinan ida ne’e nia laran, hafoin ita sei hare’e oinsa mak rekruta ema sira ne’ebé atu tuir formasaun ne’e, importante ita foti husi jornalista sira ne’ebé iha média konvensional hanesan radio, jornal, televizaun, no média online sira ne’ebé rejistu tiha ona iha konsellu imprensa, kona-ba orsamentu ha’u ladún hatene tanba lidera husi UNDP hanesan ita hatene parte ida husi Fundus ne’ebé governu Japaun fó liu husi UNDP, aleinde formasaun ne’e mós UNDP halo konstrusaun ba edifísiu RTTL’EP, formador UNDP ho konsellu imprensa sei kopera iha formador nasional no mos iha formador internasional, formador internasional UNDP ho konsellu imprensa sei identifika se lós mak atu mai fó formasaun, sei enkontru teknika sira UNDP ho KI atu identifika, oinsa bele hetan formadór nasional no internasional sira, se lalais liu komesa tinan ne’e sei fahe ba periodu tolu, benefisiáriu ba jornalista liu-husi jornalismu ambiental kuaze 150 no sei iha tan grupu ida ba formasaun debate publiku” informa presidente Consellu Imprensa.
Jornalista : Romana Salsinha
Editor: Luhamutu
