Díli, 26 Agustus 2024 (RCC) – Sekretariu Estadu Formasaun Profisional Realiza Seremónia Asina Deklarasaun Entre Traballadores 241 No Inan Aman Sira Atu Nune’e Traballador Sira Tenke Kumpri Regra Hodi Labele Sai Husi Sistema.
Iha entrevista ho Traballador Amiuc Ricardos hodi informa ba Jornalista sira iha fatin Salaun Delta Nova katak, liu-husi familia simples mak esforsu a’an durante tempu naruk atu ba servisu iha Korreia hodi buka moris, (26/08/2024).
“Husi familia simples ne’ebé esforsu a’an durante tempu naruk Nia laran atu ba servisu iha korreia, maske esperiénsia ba servisu seidauk iha, maibé nafatin esforsu atu ba buka esperiénsia iha no buka moris no mós liu-husi familia simples ne’e maka hakarak atu muda moris, tanba ne’e ha’u esforsu a’an, maibé antes atu hetan susesu, ha’u sente todan teb-tebes iha ha’u nia esforsu ida ne’e hodi hetan duni rezultadu ida ne’e, tanba ne’e ha’u agradese ba Nai Maromak, Matebian no Uma Lisan ne’ebé Loke ona ha’u nia dalan hodi hetan susesu ida ne’e, ho nune’e hanesan oan mané, esforsu ida ne’e la’os ba ha’u nia a’an rasik, maibé atu halo kontente mós ba ha’u nia inan aman no mós ba ha’u nia Família sira hotu,” Tenik Amiuc Ricardos.
Aleinde ne’e, Amiuc Ricardos salienta, hanesan joven tenke halo kontribuisaun ba Nasaun no Familia sira hotu no mos tenke kumpri regra ka sistema Nasaun nian.
“Nu’udar Joven ha’u tenke halo kontribuisaun ba ha’u nia Nasaun no ha’u nia moris fatin i no mós ba ha’u nia família sira, ho nune’e iha atividade saída de’it iha ita nia Nasaun, wainhira ha’u rona informasaun ruma iha ita nia Nasaun, ha’u tenke halo kontribuisaun, tanba ne’e ohin asina ona deklarasaun hodi kumpri regra no sistema korreia nian,” Amiuc relata.
Iha fatin hanesan, Aman husi Amiuc Ricardos ho naran Jorge Mau hateten, hanesan inan ho aman fó agradese ba sira nia Kultura, Nai Maromak, Matebian no mós ba Governu Korreia no Governu Timor-Leste, tanba liu-husi sira nia tulun traballador sira bele atinje ona sira nia mehi.
“Hanesan inan aman, wainhira sira luta hela ba mehi ida ne’e hodi atinje ba ohin loron, ha’u mós agradese, tanba ne’e liu mós husi ami nia uma Lisan, Nai Maromak no mós beialla sira nia tulun mak hodi ohin mai asina deklarasaun sira né’ebé maka durante ne’e sira hetan, no wainhira sira ba iha ne’eba maka hetan susesu di’ak, ami família mós kontente, tanba iha biban ida ne’e ami nia moris, sira mós hatene katak, inan aman simples, família simples maka dudu sira ba eskola no sira mós buka dalan hodi tuir kursu Korreia to’o ohin loron atinje duni sira nia mehi atu ba servisu iha korreia, tanba ne’e agradese ba Governu Korreia no Governu Timor-Leste hodi fó oportunidade ba sira atu susesu di’ak iha Futuru,” Dehan Aman Jorge Mau.
Ho nune’e aman Jorge Mau mós hakarak fó lia-menon ba traballador sira katak, sai husi ne’e ba servisu iha ne’ebá, tenke halo tuir nasaun nia Lei Nasaun ninian no servisu ho di’ak, labele uza sistema tuir imi nia hakarak.
“Hanesan inan aman, Lia menon ne’ebé mak ami hameno ba sira maka wainhira sira atu sai husi ne’e ba servisu iha ne’eba tenke halo tuir nasaun nia Lei no servisu ho di’ak, labele uza sistema tuir imi nia hakarak, maibé tenke kumpri sistema Nasaun nian,” Jorge Mau tatoli.
Relasiona ho asina deklarasaun entre SEFOPE, traballadores no Inan-aman ne’e, Sekretariu Estadu Formasaun Profisional Empregu, Rogeiro Araujo mos informa katak, antes atu desloka traballador sira ba servisu iha Nasaun Korreia, Australia no Japaun, husi parte SEFOPE sempre realiza seremonia despedida ba traballadores, inan-aman sira no mos parte Governu.
“Ita nia traballador sira atu desloka ba servisu iha Nasaun koreia, Austrália no Japaun, tanba ne’e husi parte sekretáriu Estadu formasaun Profisional empregu, sempre realiza Seremónia despedida ba Traballadores no Família husi traballador ira no mós Governu ho nia objetivu atu fó orientasaun ba traballador sira, wainhira sira atu ba servisu iha Nasaun ida ne’ebé maka sira atu ba, atu nune’e sira tenke kumpri akordu ne’ebe maka sira ho sira nia Família hamutuk ho governu hodi asina,” Sekretariu Estadu, Rogeiro Araujo informa.
Tanba ne’e SEFOPE, Rogeiro Araujo mos hakarak relata ba publiku katak, Traballador sira ne’ebe sai ona husi sistema, governu Korreia buka tuir hela atu deporta fila fali mai Timor ho nune’e governu Korreia sei hein hela Governu Timor-Leste atu haruka karta ida ba hodi governu Korreia hodi deporta fila fali Timor Oan 11 ne’ebe sai husi sistema ne’e mai Timor.
“Ha’u atu hatete de’it ba Públiku katak, balun ne’ebé maka sai ona husi sistema, agora dau-daun, Governu Korreia buka tuir Hela atu deporta, tanba ne’e ha’u hanoin iha semana ida ne’e nia laran, iha ema 11 maka governu Korreia sei deporta Mai iha Nasaun Timor-Leste, hanesan maluk Sira né’ebé maka hakarak sai husi sistema, signifika katak, kontrola Ida ne’ebé maka governu Korreia halo ne’e Rigorozu teb-tebes, tanba wainhira ita uza Ita nia telefone entaun Ita nia paradeiru iha ne’bé sira sempre hatene, ho nune’e falta de’it Governu Timor-Leste seidauk halo Karta hodi Haruka ba Governu Korreia, maibé kuandu governu prepara ona karta ida ba iha governu Korreia, signifika traballador ida ne’ebé mak ilegal hela ne’e hakarak Ka lakohi tenke Fila mai Timor, atu labele prejudika fila fali maluk sira ne’ebé maka buka hela oportunidade atu ba servisu iha rai liur. Tanba ne’e atu hatete de’it katak, Governu Timor-Leste maka seidauk halo karta atu haruka ba iha Governu korreia, maibé, governu Korreia ninia sistema, hatete de’it katak, wainhira ita ultra-pasa ona ba iha 50%, sira sei taka sistema ida ne’e ba iha Nasaun sira ne’ebé maka, númeru ilegal ne’e a’as, entaun agora ita sei bele hatete katak, ita sei iha hela faze ida ne’bé maka normal, hodi tama ba Nasaun ida ne’bé maka risku, maibé ita kuandu hare’e ona katak, ne’e iha ameasa ba ita nia Nasaun ka ba iha futuru signifika katak, governu mós bele hola asaun iha problema ida ne’e,” hakotu Rogeiro Araujo.
Jornalista : Adelina Fátima.
Editor : Luhamutu.
