Dili, 30 Agustu 2024( RCC) – Autoridade Lokál Suku Bebonuk Hamutuk ho Veteranu sira iha Suku Refere Komemora Loron 30 Fulan Agostu Hodi Hanoin Hikas Loron Konsulta Populár ba Dala 25.
Iha diskursu xefe suku bebonuk Alfredo da Costa hateten iha fatin sede suku Bebonuk ba jornalista RCC katak, maske orsamentu ba komemorasaun loron 30 de Agosto nian la iha, maibé nia iha inisiativa rasik realiza atividade refere hodi konvida Veteranu sira husi suku Bebonuk rasik hodi konta istória kona-ba loron referendu ninian, (30/08/2024).
“Atividade ida ohin ne’e osamentu la iha ha’u lori ha’u nian no iha hanoin rasik mak realiza atividade ne’e, atu nune’e konvida aman veteranu sira hodi mai konta istória kona-ba loron 30 fulan Agosto nian, atu nune’e komunidade sira no joventude sira bele hatene no entede di’ak liu tan kona-ba istória referendu nian, tanba ne’e ha’u husu ba joven bebonuk atu mai rona ita nia aman sira nia lia atu nune’e ita bele hatene di’ak liu tan kona ba loron importante ida ohin nian , ohin 30 de Agosto loron importante tebes mai ita tanba ne’e ha’u haksolok tebes ho ha’u nia aman veteranu sira tanba bele konta ona istória mai ami ne’ebe iha ne’e, maibé ha’u sente triste oituan tanba joven sira la partisipa ho másimu iha atividade ida ne’e” hateten Alfredo da Costa.
Iha fatin hanesan veteranu Mariano De Jesus Soares informa relasiona ho loron 30 fulan tinan ne’e katak, loron ne’e sai hanesan loron ne’ebé determinasaun independensia nian iha timor leste.
“Loron 30 fulan Agostu hanesan loron ne’ebé determinasaun hodi determina ita nia vitória iha tinan 1999, tanba ne’e ha’u atu dehan de’it katak loron 30 fulan Agostu la fasil, tanba ne’e ha’u husu ba joventude sira liu-liu joventude Bebonuk bele ka lae, ita kolabora ho autoridade lokál sira hodi hamutuk ho sira atu hala’o atividade sira iha suku laran labele husik ema mak mai ukun ita nafatin no manda ita maibé ita mós fiar an katak ha’u mós bele atu liberta ha’u nia an rasik liu husi atividade sira ne’ebé mak iha Aldeia no mós ha’u nia suku rasik” informa Mariano De Jesus Soares.
Jornalista : Anita Váz
Editor : Luhamutu
