Díli, 07 Maiu 2024 (RCC) – Sekretariu Estadu Toponomia Urbana Sei Halo Dialogu Ho Komunidade Sira Husi Aldeia Tolu Iha Suku Komoro Ne’ebe Sei Hetan Evakuasaun Iha Tempu Badak.
Iha entrevista ho xefe suku komoro, Elígio José da Silva hateten, sei halo tan dialogo ho komunidade sira husi aldeia tolu hanesan fomentu 1, fomentu 2 no Moris-foun ne’ebe komuniade balun sei hela iha area risku no mós espasu públiku.
“Husi Komoro aldeia ha’at ne’ebé mak atu hetan evakuasaun ne’e mak hanesan aldeia 12 de Outobru Tasi-Tolu, Moris Foun, Fomentu 1 no Fomentu 2, ho nune’e Aldeia 12 de Outobru halo ona dialogu iha ne’ebá no komunidade sira mós kopera atu halo dezenvolvimentu, maibé, governu mós tenki konsidera netik komunidade sira, bainhira atu hasai sira tenke fó netik material balun, atu halo sira nia uma iha fatin seluk. Aldeia Fomentu 1, Fomentu 2 no aldeia Moris-Foun, agora SETOU sei halo levantamentu atu kria ekipa tolu iha Bebonuk, Madohi nomós Comoro, hanesan ha’u rasik maka lidera iha ekipa númeru 3. Ekipa númeru 1 husi suku Bebonuk sei lidera husi SEARA mai to’o iha ponte 1, 2 CPLP, Ekipa numeru 2 husi Madohi, sei lidera husi parte Madohi mai to’o iha ponte 3, no ha’u lidera husi ponte 3 ba to’o Kasnafar.” hatete xefe suku
Aleinde ne’e xefe suku Elígio José da Silva akresenta tan katak, sei foti dadus tuir komunidade ida-idak iha aldeia ha’at ne’e hodi hatene totál husi uma kain hirak ne’e hodi halo levantamentu katak sé maka sei hetan evakuasaun.
“Ami foti dadus hodi halo levantamentu ida ne’e ba família ida-idak hodi tau kedas númeru iha ne’eba, tanba ami hanesan ekipa ba foti dadus de’it no ami la’o durante loron rua ona hodi halo rejistasaun ba uma kain hirak ne’ebé maka atu hetan evakuasaun husi ekipa SETOU, ha’u hanoin husi komunidade 300 resin ne’e, ida ne’ebé maka sei rejista iha ekipa ha’u nian no ekipa númeru 2 ha’u seidauk hatene total familia hira maka rejista ona. Tanba ne’e ami sei halo kontinuasaun hodi halo dialogu, no ohin ami sei halo dialogu hamutuk ho komunidade sira, konserteza komunidade sira sei ba tuir hotu hodi halo levantamentu no sei hare’e iha área ida ne’ebé mak kona iha risku ne’e tenke hasai tanba ida ne’e iha espasu públiku. Lolo’os ne’e ami hakarak halo dialogu tiha, maibé, tanba planu ida iha Tasi-Tolu ami halo duni dialogu ho komunidade sira no komunidade sira husu, entaun ha’u hatete ba sira, ita ko’alia de’it, laiha solusaun tanba ha’u mós iha kra’ik hein ema ezekuta de’it, nu’udar komunidade imi mak hili ha’u, entaun tenke hare’e ba parte estadu nian mós, tanba sira mak superior, ha’u mós tenke rona husi sira hodi halo di’ak ba ita, tanba uluk sekretáriu estadu hateten dehan, iha área Tasi-Tolu hetan evakuasaun iha loron 01 fulan Maio, maibé, ami tenta hodi halo dialogu hodi foti fali desizaun seluk katak, loron 01 fulan Juñu tenke ser halo evakuasaun , tanba ne’e parte Tasi-Tolu iha ona solusaun, no komunidade sira mós kopera atu estadu bele halo dezenvolvimentu, maibé, estadu mós hanoin tanba sira atu halo uma mós presiza osan, tanba bainhira hetan sobu, pelu menus fó netik osan ruma, atu nune’e sira sai mós, bele halo fali uma iha fatin seluk.” hakotu xefe suku
Jornalista : Adelina Fátima
Editor : Luhamutu
