Díli, 08 Maiu 2024 (RCC) – Relasiona Ho Udan Bo’ot Ne’ebé Fó Impaktu Tebes Ba Iha Valeta No Sai Intupidu, Tanba Ne’e Xefe Suku Comoro Elígio José Da Silva Husu Ba Komunidade Ida-Idak Tenke Iha Konsiénsia Hodi Tau Lixu Tuir Orariu Ne’ebé Iha
Iha entrevista ho xefe suku Elígio José da Silva informa ba jornalista sira, kona-ba udan bo’ot ne’ebé lori fo’er ba iha valeta sira, Suku Comoro halo ona programa kada semana hodi halo limpeza, maibé komunidade balun maka laiha iha konsénsia hodi tau lixu tuir nia fatin.
“Suku Comoro halo ona programa kada semana hodi halo limpeza, ida ne’e konsellu suku nafatin halo no sempre fó liu husi xefe aldeia sira atu avizu ba komunidade sira, hodi halo limpeza iha ida-idak nia aldeia, tanba ami halo programa ne’e, kada semana ida aldeia ida, maibé, fila ba komunidade ida-idak nia konsiénsia, atu nune’e so’e fo’er iha nia fatin, dala barak ha’u hare’e ita laiha konsiénsia,dalaruma hemu be’e hotu so’e agua arbiru de’it, no mós sira ne’ebé iha kareta ne’e hatu’un de’it sigaru nia kulit ba rai, la hatene tuir fo’er ne’e nia fatin iha ne’ebé, no hotu-hotu la hanoin kona atu hateten ba komunidade sira, atu halo limpeza iha ita bo’ot sira nia fatin ka uma oin.
Tanba ne’e Xefe suku Elígio José da Silva husu ba komunidade sira atu nafatin halo limpeza iha loron Sexta no Sábadu no mós tenke so’e fo’er tuir oráriu ne’ebé iha atu nune’e bele mo’os no labele intupidu ba iha valeta sira.
“Ami nafatin iha hanoin hodi hateten ba komunidade sira, hodi halo limpeza iha loron sexta no sabadu, no ita menus uitoan tanba transporte, tanba dala ruma fo’er ne’e aumenta tiha no fo’er ema balun lakohi soe tuir nia fatin. Iha ona oráriu atu soe fo’er katak, iha tuku 07:00 kalan to’o tuku 07:00 dadeersan soe fo’er, ita mós tenke kumpri hodi soe fo’er, liu husi ne’e labele so’e tan, atu nune’e ita hare’e bele mo’os. Ho nune’e ami mobiliza ona ba komunidade sira, ida-idak tenke hamo’os nia aldeia liu-liu iha uma oin, se fo’er iha karik, labele so’e arbiru, atu nune’e udan mai labele lori fo’er arbiru de’it ba valeta sira, hodi halo intupidu no halo be’e halai la di’ak”. Hakotu Nia.
Jornalista : Estajiaria Adelia Mendonça
Editor : Luhamutu
