Dili, 24 Abril 2024 (RCC)- Laurentino Gomes Ho Marito Amaral Barros Sira Nia Moris Depende De’it Ba Gerobak, Tamba La Iha Dalan Seluk Hodi Buka Moris, Atu Sustenta Nesesidade Uma Laran No Selu Alin Sira Nia Eskola
Iha entrevista, negosiante Laurentino hateten osan ne’ebé nia hetan husi fa’an modo uza hodi han loro-loron no balun uza hodi halo kultura.
“Moris nu’dar fa’an modo iha gerobak iha merkadu hali-laran, to’o agora, ami nunka hetan osan bo’ot hodi halo uma, osan ne’ebé ami hetan hodi uza ba nesesidade loro-loron de’it, tamba gerobak mós barak ami lao ba mai la dun hetan osan, kada loron ida ema hola barak entaun bele to’o $40 dolar se lae loron ida hetan to’o $20 de’it, gerobak ne’e ami halo rasik hodi uza ba fa’an ami nia modo, maibé iha dalan ninin sira ne’e ema fa’an hotu modo entaun susar mai ami atu hetan osan, sei ita tur hein de’it iha merkadu se mak atu fó osan ba ita di’ak liu lao hasai kosar tiha de’it hetan funan oito’oan ka barak uza hodi han hemu nian no balu tau ba kultura, modo sira ne’ebé ami fa’an ne’e ami sosa tutan fali husi Remixiu, Maubisi, Ermera, no husi Hera ami hein sira iha merkadu Taibesi de’it, kalan sira lori mai ami sosa kedas, depois tuku 4 dadersan ami komesa lori lao modo to’o tuku sanulu resin rua 12 ami deskansa depois han hotu, ami kontinua lori lao nafatin to’o tuku 4 loraik ami fila ba uma kalan ami ba hein iha merkadu Taibesi para sira lori modo sira ne’e ami sosa nafatin, fatin ne’ebé ami ba fa’an ida-idak tenki lao tuir nia salur hanesan ho bemo sira ne’e”.
Iha Sorin Seluk Marito Amaral Barros hateten, moris mak obriga nia hodi buka osan atu sustenta nesesidade uma laran no selu alin sira nia eskola.
“Ita nia moris mak obriga hodi fa’an modo sustenta família uma laran no ajuda alin sira nia eskola, se ita la buka osan se mak atu fó osan ba ita, agora ita eskola remata mos ita hanesan ne’e hela de’it, di’ak liu ita buka moris para apoiu alin sira nia eskola, ha’u hahu fa’an modo iha tinan 2023 to’o agora osan ne’ebé ami hetan la rai hamutuk ida, osan balu ami uza no balu fó ba alin sira, , kada loron ida ema hola barak entaun bele to’o $40 dolar se lae loron ida hetan to’o $20 de’it, gerebok ne’e ami halo rasik hodi uza ba fa’an ami nia modon , maibé iha dalan ninin sira ne’e ema fa’an hotu modo entaun susar mai ami atu hetan osan, sei ita tur hein de’it iha merkadu se mak atu fó osan ba ita di’ak liu lao para buka osan, sasan sira ami fa’an ne’e ami nian rasik”.
Marito husu ba joven sira atu labele moe hodi buka osan,“hau nia mensagem ba maluk joven sira tempu ida agora ne’e tenki buka servisu la bele moe no baruk tamba ita nia moris depende ba ita nia a’an, se ita badinas hetan osan, se ita baruk ten la servisu ita sei la hetan osan, tempu agora atu buka osan la’os atu buka problema”.
Jornalista estagiário : Augusto Tilman
Editor : Luhamutu
